أَسڒْمذ ن سِيذِيثْنغ عِيْسَى لْكِتَاب ن مَتَّى 27 - ثريفيث 2020ڒْموْث ن يَهُوْذَا إِسْخَرْيُوطِي 1 وَامِي يصْبَح ڒْحَاڒ، مَارَّا اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل مْشَاوَارن جَارَاسن حمَا اَذ نْغن عِيْسَى. 2 شَرْفن-ث ؤُوِين-ث اَث سلّْمن إِ لْحَاكم اَرُّوْمَانِي ؤُمِي قَّارن بِيلَاطُس. 3 يَهُوْذَا ونِّي إِݣ يزّنْزن عِيْسَى، وَامِي يࢲْرَا بلِّي عِيْسَى يتْوَاحْكم ينْدم. وَامِي ينْدم يرُوْح غَار اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل يَارَّا-ٱسن ثْڒَاثِين نِّي ن ثْپـيَّاسِين ن نُّقَارْث. 4 ينَّا-ٱسن: "نش عْصِيغ وَامِي سلّْمغ يجّن إِ ڒْموْث نتَّا وَار يݣِّي مِينْخف!" نَّان-اَس نِثْنِي: "ونِّي ذ شّْغڒ نّش! نشِّين، مِين ذَانغ يرُوْحن؟" 5 ڒخْدّنِّي ينْضَر تْمنْيَاث نِّي ذِي ثمْزِيذَا ثَمقّْرَانْت، يفّغ سّنِّي يرُوْح يجيّف يخف نّس. 6 أَرُّوْيَاس ن ڒْفُقَهَا جمْعن تْمنْيَاث نِّي نَّان: "تْمنْيَاث-أَ ذ تَّمَن ن يذَامّن ن بْنَاذم. شَّرِيعَا نّغ وَار ذَانغ ثْسمّح اَثنْت نْسرْس ذِي صّنْدُوْق ن ثمْزِيذَا." 7 مْشَاوَارن جَارَاسن، سْغِين زَّايْسنْت ثَمُوْرْث نِّي ؤُمِي قَّارن <ئِيْير ن ونِّي يتْصنَّاعن ڒقْشُوْع> حمَا اَذَايس ݣّن يمضْڒَان إِ ڒْبَارَّانِي. 8 س مَانَاينِّي إِي ذَاس قَّارن <ئِيْير يذَامّن> اَڒ ڒخُّو عَاذ. 9 أَمنِّي يكمّڒ وَاوَاڒ إِݣ ينَّا نَّبِي إِرْمِيَا ذݣ يِجّن ن زْمَان: <جمْعن ثْڒَاثِين نِّي ن ثْپـيَّاسِين، تَّامَان نِّي إِي خف تَافْقن يِوْذَان ن أَيث-إِسْرَائِيل إِي خَاس ݣِّين خ نتَّا. 10 سْغِين زَّايْسنْت ثَمُوْرْث ن ونِّي يتْصنَّاعن ڒقْشُوْع؛ أَمنِّي إِي ذَايِي يوصَّا سِيذِي أَربِّـي.> تَاوِين سِيذِيثْنغ عِيْسَى غَار لْحَاكم بِيلَاطُس 11 ئِبدّ عِيْسَى زَّاث إِ لْحَاكم نِّي اَرُّوْمَانِي. ئِسّقْسَا-ث لْحَاكم ينَّا-ٱس: "مَا ذ شك ذ اَزدْجِيذ ن أَيث-إِسْرَائِيل؟" ينَّا-ٱس عِيْسَى: "أَقَا ثنِّيذ-ت شك." 12 وَامِي ث تَهَامن اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل، وَار خَاسن يَارِّي شَا. 13 ينَّا-ٱس بِيلَاطُس: "مَا وَار تسْڒِيذ شَا مِين قَّارن ذ مَارَّا مِين خَاك تْشثْشَان؟" 14 وَار خَاسن يَارِّي عِيْسَى بُو وَاوَاڒ. ئِقِّيم لْحَاكم نِّي يتْعجّب اَطَّاس. 15 ذِي مْكُڒ ڒْعِيذ أَمقّْرَان ينُوْم لْحَاكم يضدْجق-اَسن-د إِ يِجّن ن ومحْبُوْس عْلَاحْسَاب ونِّي يخس شَّعْب. 16 ذِي ڒْوقْث نِّي غَارْسن يجّن ن ومحْبُوْس مَعْرُوف قَّارن-اَس بَارَابَاس. 17 وَامِي مُوْنن يِوْذَان، ئِسّقْسَا-ثن لْحَاكم بِيلَاطُس ينَّا-ٱسن: "مَانْون إِي ثخْسم اَذَاوم د رْخُوْغ، مَا إِ بَارَابَاس نِغ إِ عِيْسَى ونِّي ؤُمِي قَّارن لْمَسِيح؟" 18 تُوْغَا يسّن بِيلَاطُس بلِّي سلّْمن-اَس عِيْسَى ڒَاحقَّاش حسْذن-ث. 19 وَامِي يقِّيم لْحَاكم بِيلَاطُس خ ڒْكُرْسِي ن ڒحْكَام، ثسّكّ-د غَارس ثمْغَارْث نّس ثنَّا-ٱس: "تَارك-اَس إِ ورْيَاز-أَ يصْفَان ڒَاحقَّاش عدّْبغ اَطَّاس دْجِيڒث-أَ ذِي ثِيرْجِيث خ سَّبَاب نّس." 20 وَلَكِن اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل قڒْبن اَزدْجِيف إِ ڒْغَاشِي حمَا اَذَاسن-د يسُوْفغ بَارَابَاس، عِيْسَى اَذ يمّث. 21 ئِسّقْسَا-ثن لْحَاكم ينَّا-ٱسن: "مَانْون إِي ثخْسم زِي ثْنَاين-أَ اَذَاس رْخُوْغ؟" نَّان-اَس: "بَارَابَاس." 22 ينَّا-ٱسن بِيلَاطُس: "إِيوَا، مِين ذَاس غَا ݣّغ إِ عِيْسَى ونِّي ؤُمِي قَّارن لْمَسِيح؟" نَّان-اَس مَارَّا: "صلّب-يث!" 23 ينَّا-ٱسن بِيلَاطُس: "مَايمِّي؟ مَان لْجَرِيمَا إِݣ يݣّا وَانِيتَا؟" وَلَكِن اَرنِّين سْنكَّرن ثْغُوْيّث س جّْهذ قَّارن: "صلّب-يث!" 24 وَامِي يُوْفَا بِيلَاطُس بلِّي وَار يقْضِي وَالُو اَرْنِين ذِي لْفَوْضَا، ييْسِي اَمَان يسِيرذ يفَاسّن نّس زَّاث إِ ڒْغَاشِي نِّي ينَّا-ٱسن: "أَقَا نش تْبرِّيغ اَزدْجِيف ينُو زݣ يذَامّن ن ورْيَاز-أَ! أَقَاث خ يِيرِي نْوم!" 25 أَرِّين خَاس مَارَّا إِذْسن نَّان-اَس: "ئِذَامّن نّس خ يِيرِي نّغ ذ ثَارْوَا نّغ!" 26 سّنِّي يضْڒق-اَسن-د إِ بَارَابَاس. عِيْسَى ؤُوْثِين-ث س وسْغُوْن، أُوْشَا يسلّم-اَسن-ث بِيلَاطُس حمَا اَث صلّْبن خ صَّلِيب. 27 ؤُوِين-ث ڒْعَسْكَار ن لْحَاكم غَار ڒمْرَاح ن ڒقْصَار ن لْحَاكم، سْمُوْنن-د ذِنِّي مَارَّا لْفِرْقَا ن ڒْعَسْكَار نِّي. 28 كّْسن-اَس اَرُّوْض نّس، ݣِّين خَاس اَسڒْهَام ذ اَزݣّوَاغ. 29 مُوْذن-اَس يجّن ن تَّاج ن يسنَّانن، ݣِّين-اَس-ث خ وزدْجِيف نّس. ݣِّين-اَس غَانِيم ذݣ وفُوْس اَفُوْسِي، وضَان-اَس غَار يْفَادّن بْذَان تْبُوْصَرن خَاس. قَّارن-اَس سَّلَام آي اَزدْجِيذ ن أَيث-إِسْرَائِيل! 30 سُّوْسُوْفن خَاس، يْسِين غَانِيم نِّي بْذَان شَّاثن-ث زَّايس غَار وزدْجِيف. تَاوِين سِيذِيثْنغ عِيْسَى حمَا اَث صلّْبن 31 وَامِي خَاس كمّْڒن اَبُوْصَار، كّْسن-اَس اَسڒْهَام نِّي ݣِّين-اَس اَرُّوْض نّس ؤُوِين-ث حمَا اَث صلّْبن. 32 فّْغن سّنِّي ڒْعَسْكَار ؤُفِين يجّن ن ورْيَاز قَّارن-اَس سِمْعَان زِي ثنْدِينْت ن لْقُرِينَا، ݣِّين خَاس س بزّز اَذ يَرْبُو صَّلِيب ن عِيْسَى. 33 ؤُوْضن غَار يِجّن ن ومْشَان قَّارن-اَس <ݣُولْݣُوطَا> (ڒْمَعْنَا ن يِيسم-أَ: أَمْشَان ن جُمْجُمَا). 34 ؤُشِين-اَس اَمَان وضِيڒ يخلّط ذَايْسن يجّن ن دّْوَا ذ اَمرْࢲَاݣ. وَامِي ثن يقَّاس، يُوْݣِي اَثن يسو. 35 وَامِي ث صلّْبن، ݣِّين لْقُرْعَا خ وَارُّوْض نّس فرْقن-ث جَارَاسن. 36 قِّيمن ذِنِّي حْضَان-ث. 37 غَار وزدْجِيف نّس ݣِّين-اَس يجّن ن ثڒْوِيحْت ثُوْرَا ذَايس تُّهْمَا نِّي يقَّارن: "وَانِيتَا ذ عِيْسَى، أَزدْجِيذ ن أَيث-إِسْرَائِيل." 38 صلّْبن اَكِذس ثْنَاين ن يشفَّارن، ئِجّن خ وفُوْسِي يجّن خ وࢲڒْمَاض نّس. 39 ئِوْذَان إِي تكّن سّنِّي تُوْكَّرنْ-ث تْهزَّان اَزدْجِيف نْسن، 40 قَّارن-اَس: "مَا ذ شك إِي غَا يهذْمن ثَمْزِيذَا ثَمقّْرَانْت اَت تبْنِيذ ذِي ثڒْتِيَّام؟ مڒَا شك ذ مِّيس ن أَربِّـي، نجَّا يخف نّش هْوَا-د زݣ وجنَّا زِي صَّلِيب-أَ!" 41 ؤُڒَا ذ اَرُّوْيَاس ن ڒْفُقَهَا اَكِذْسن يمقّْرَانن ن أَيث-إِسْرَائِيل ذ يمْسڒْمَاذن ن شَّرِيعَا تْبُوْصَرن خَاس قَّارن: 42 "ئِسنْجم ينّغْنِي، وَلَكِن وَار يزمَّر شَا ڒخُّو اَذ يسنْجم يخف نّس!" نَّان-اَس: "هْوَا-د آي اَزدْجِيذ ن أَيث-إِسْرَائِيل ڒخُّو زݣ وجنَّا زِي صَّلِيب-أَ حمَا اَزَّايك نَامن! 43 ئِتْوكّڒ خ أَربِّـي؛ مڒَا يرْضَا خَاس أَربِّـي اَث يسنْجم ڒخُّو! ڒَاحقَّاش ينَّا: نش ذ مِّيس ن أَربِّـي." 44 أَمنِّي عَاوذ إِي ث زَوَرن يشفَّارن نِّي إِي كِس يصلّْبن. ڒْموْث ن سِيذِيثْنغ عِيْسَى 45 غَار ثنْعَاش ن ؤُزِيڒ ثهْوَا-د ثَادْجسْت خ ثْمُوْرْث اَمن-ثكْمَاڒ اَڒ وَامِي عْڒَاين ذ ثْڒَاثَا وعشِّي. 46 أَڒ جْوَايه نِّي ن ثْڒَاثَا وعشِّي يرَاغَا عِيْسَى س جّْهذ ينَّا: "إِيلِي، إِيلِي، لْمَا سبْاقْثَانِي؟" ڒْمَعْنَا ن وَاوَاڒ-أَ: "يَا أَربِّـي، يَا أَربِّـي، مَايمِّي ذَايِي ثْسمْحذ؟" 47 سْڒِين-اَس ڒبْعَاض زݣ يِنِّي يحْضَارن ذِنِّي نَّان: "أَقَا يتْڒَاغَا خ نَّبِي إِلْيَاس." 48 ڒخْدّنِّي يرُوْح يجّن زَّايْسن يقْڒع يتَازّڒ، ييْسِي يجّن ن سْپُـوْنْخَا يسغْذص-يت ذݣ وَامَان وضِيڒ ذ يسمَّامن، ئِݣِّي-ت خ يِج وكشُّوْض يُوْشَا-ٱس اَذ يسو. 49 نَّان-اَس يِوْذَان نّغْنِي ذِنِّي: "اجّ-يث، أَ نْࢲر مَا ٱذ د يَاس نَّبِي إِلْيَاس مَا ٱث يعْثق نِغ لَّا!" 50 ئِرَاغَا عِيْسَى عَاوذ س يِجّن ن ثْمِيجَّا ثمْغَر أُوْشَا يسلّم بُوْحْبڒ نّس. 51 ڒخْدّنِّي إِݣ يقَّرْس اَرّْوَاق ن ثمْزِيذَا ثَمقّْرَانْت خ ثْنَاين، زݣ وجنَّا اَڒ ثْمُوْرْث. يوْقع زِّينْزَال، نْفرْقن يِزْرَا خ ثْنَاين. 52 نُوْرْزْمن يمضْڒَان كَّرن-د اَطَّاس ن ڒْمُوْمِنِين يمُّوْثن 53 فّْغن-د زݣ يمضْڒَان. (منْبَعْد إِ ثڒْتِييَّام اَذ د يكَّر عِيْسَى زِي ڒْموْث نِثْنِي اَذ اَذْفن غَار ثنْدِينْت ن لْقُدْس اَذ د مظْهَارن إِ وَاطَّاس ن يِوْذَان.) 54 أَعَسْكَارِي نِّي اَمقّْرَان ن اَرُّوْمَانُوْس ذ يِنِّي اَكِذس يحطَّان عِيْسَى ࢲْرِين زِّينْزَال نِّي ذ مِين يوقْعن، ݣّْوْذن اَطَّاس نَّان: "وَانِيتَا ذ مِّيس ن أَربِّـي ذ صَّح!" 55 ذِنِّي اَطَّاس ن ثمْغَارِين خزَّرنت-يد زِي ڒݣّْوَاج. نِثنْتِي تُوْغَا ذْفَارنْت-ث، تْسخَّارنْت خَاس وَامِي تُوْغَاث يدْجَا ذِي ثْمُوْرْث ن لْجَلِيل. 56 ذَايْسنْت مَرْيَم ثَمَݣْدَلِيث، ذ مَرْيَم يمَّاس ن يَعْقُوْب اَمزْيَان ذ يُوْسف، ذ يشْتن نّغْنِي نتَّاث ذ يمَّاس ن ثَارْوَا ن زَبَادِي. نطّْڒن سِيذِيثْنغ عِيْسَى 57 وَامِي د ثُوْوض ثْمدِّيث، يُوْسَا-د يجّن ن تَّاجَر قَّارن-اَس يُوْسف زِي دْشَار ن أَرِيمَاتْيَا. نتَّا س يِيخف نّس تُوْغَا يذْوڒ ذ اَمحْضَار ن عِيْسَى. 58 ئِرُوْح غَار لْحَاكم بِيلَاطُس يتَّار-اَس دَّات ن عِيْسَى، ئِكَّر بِيلَاطُس يوصَّا خَاس اَذَاس ت ؤُشن. 59 ئِرُوْح يُوْسف يسهْوَا-ت-يد زِي صَّالِب، ئِكفّن-يت س ڒشْفن ينْقَا. 60 ئِسرْس-يت ذݣ ونْضڒ نّس ذ جْذِيذ. نتَّا تُوْغَا يغز-يث زِي قْبڒذݣ وزْرُو يݣَّا اَم يِيفْرِي. يسقْنُوْنِّي يجّن ن وزْرُو ذ اَمقّْرَان يَارِّي-ث خ وقمُّوْم ن ونْضڒ نِّي يُوْيُوْر. 61 مَرْيَم ثَمَݣْدَلِيث ذ مَرْيَم نِّي نّغْنِي اَقَاثنْت ذِنِّي قِّيمنْت زَّاث إِ ونْضڒ. ئِعسَّاسن خ ونْضڒ 62 ثِيوشَّا نّس، يعْنِي نْهَار ن سّبْت ن لْعِبَادَا، رُوْحن اَرُّوْيَاس ن ڒْفُقَهَا ذ ڒْحِزب ن يفَرِّيسِيْين مُوْنن غَار لْحَاكم بِيلَاطُس. 63 نَّان-اَس: "نشِّين نعْقڒ آ سِيذِي، بلِّي وَامِي تُوْغَا يدَّر وغدَّار نِّي ينَّا-د منْبَعْد إِ ثڒْتِيَّام نش اَذ د كَّرغ زِي ڒْموْث." 64 نَّان-اَس: "إِيوَا وصَّا اَذ ݣّن ڒْعَسّث خ ونْضڒ نّس حتَّا اَڒ وِيس ثڒْتِيَّام حمَا وَار د تِيسن يمحْضَارن نّس اَذ يْسِين دَّات نّس اَذ ينِين إِ شَّعْب بلِّي يكَّر-د زِي ڒْموْث. سّنِّي اَذ يوْقع وغْذَار نّس اَنݣَّارُو كْتَار زݣ ونِّي اَمزْوَارُو." 65 ينَّا-ٱسن لْحَاكم بِيلَاطُس: "هَا ڒْعَسْكَار إِي غَا يعسّْسن. رُوْحث ݣّث ڒْعَسّث خ ونْضڒ مَامّش ثخْسم كنِّيو." 66 رُوْحن ݣِّين ڒْعَسّث خ ونْضڒ: شمْعن ثَوَّارْث نّس، جِّين ذِنِّي يعسَّاسن. |