أَسڒْمذ ن سِيذِيثْنغ عِيْسَى لْكِتَاب ن مَتَّى 26 - ثريفيث 2020

ئِجّن ن ثمْغَارْث ثݣَّا اَمَان ن لْوَرْذ إِ سِيذِيثْنغ عِيْسَى

¹ وَامِي يكمّڒ عِيْسَى اَوَاڒ نِّي ينَّا-ٱسن إِ يمحْضَارن نّس:

² "ثسّْنم بلِّي ڒْعِيذ اَمقّْرَان ن أَيث-إِسْرَائِيل يقِّيم-اَس يُوْمَاين. ذَايس إِي غَا يتْوَاسلّم مِّيس ن بْنَاذم اَذ يتْوَاصلّب."

³ سّنِّي مُوْنن اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل ذِي ثدَّارْث ن اَرَّايس ن ڒْفُقَهَا ونِّي ؤُمِي قَّارن قِيَافَا.

⁴ مْشَاوَارن جَارَاسن حمَا اَذ طّْفن عِيْسَى س ثحْرَايْمِيث اَث نْغن.

⁵ نَّان جَارَاسن: ئِتْخصَّا وَار ث نْتطّف شَا ذِي ڒْعِيذ حمَا شَّعْب وَار يتݣّ شَا لْفَوْضَا.

⁶ عِيْسَى اَقَاث ذݣ وبِيلَاج ن بَيْت عَنْيَا ذِي ثدَّارْث ن يِجّن قَّارن-اَس سِمْعَان بُو-جْذَام.

⁷ ثقَارّب-د غَارس يجّن ن ثمْغَارْث غَارس يجّن ن ثْزيَّات يتْوَاصنْعن س لْمَرْمَر، ذَايس اَمَان ن لْوَرْذ يغْڒَان س وَاطَّاس. ثْفرّغ-اَس-ثن خ وزدْجِيف نّس وَامِي يقِّيم غَار مِيسَّا.

⁸ وَامِي ت ࢲْرِين يمحْضَارن مِين ثخْذم، ئِقّس-اَسن ڒْحَاڒ نَّان جَارَاسن: "مَايمِّي قَاع اَضيّع-أَ؟

⁹ أَتَاف اَمَان نِّي إِڒِي منْزن س وَاطَّاس ن تْمنْيَاث اَذ مُّوْشنْت إِ يمسْعَان!"

¹⁰ ئِسّن عِيْسَى مِينْخف سِّيوْڒن جَارَاسن ينَّا-ٱسن: "مَايمِّي ثسْخيَّاقم ثَمْغَارْث-أَ؟ أَقَا مِين ذَايِي ثݣَّا ذ اَصبْحَان اَطَّاس.

¹¹ ئِمسْعَان اَقَاثن اَكِذْوم إِ ڒبْدَا، نش وَار كِذْوم تْغِيمِيغ شَا إِ ڒبْدَا.

¹² ثْفرّغ-اَيِي اَمَان-أَ ن لْوَرْذ خ دَّات ينُو حمَا اَذَايِي ثْسوْجذ إِ ثنْضڒْث ينُو.

¹³ أَقَا تسْڒَام ڒْحَقّ: مَانِي مَا يُوْوض لْإِنْجِيل ذِي دُّنشْت-أَ اَمن-ثكْمَاڒ، أَتَاف اَذ عَاوْذن خ ثَمْغَارْث-أَ ذ مِين ذَايِي ثݣَّا اَم يِجّن ن ذِكْرَا خَاس."

¹⁴ أُوْشَا يكَّر يَهُوْذَا إِسْخَريُوطِي ونِّي زِي ثنْعَاش ن اَرُّسُل يرُوْح نتَّا غَار اَرُّوْيَاس ن ڒْفُقَهَا

¹⁵ ينَّا-ٱسن: "مِين ذَايِي غَا ثُوْشم مڒَا ؤُوِيغ-اَوم-د عِيْسَى؟" حسْبن-اَس ثْڒَاثِين ن ثْپـيَّاسِين ن نُّقَارْث ؤُشِين-اَس-ثنْت.

¹⁶ سّنِّي يرزُّو يَهُوْذَا لْفُوْرْصَا مَامّش إِي غَا يݣّ اَذ يزّنْز عِيْسَى.

أَمنْسِي ن ڒْعِيذ اَمقّْرَان ن أَيث-إِسْرَائِيل

¹⁷ نْهَار اَمزْوَارُو ن ڒْعِيذ ن ثفْضِيرْث قَارّْبن-د يمحْضَارن غَار عِيْسَى نَّان-اَس: "مَانِي ثخْسذ اَذَاش نْسوْجذ اَمنْسِي ن ڒْعِيذ اَمقّْرَان؟"

¹⁸ ينَّا-ٱسن عِيْسَى: "رُوْحم غَار ثنْدِينْت إِنِيم-اَس إِ فْڒَان قَا ينَّا-يَاش سِيذِيثْنغ ثْسَعَّات ينُو ثِيْوض-د اَكِش إِي غَا عيّْذغ نش ذ يمحْضَارن ينُو."

¹⁹ يمحْضَارن ݣِّين مِينْخف ثن يوصَّا عِيْسَى سّنِّي سْوجْذن اَمنْسِي ن ڒْعِيذ.

²⁰ ثُوْوض-د ثْمدِّيث، ئِقِّيم عِيْسَى اَك ثنْعَاش ن اَرُّسُل نّس غَار مِيسَّا.

²¹ قِّيمن تتّن ينَّا-ٱسن عِيْسَى: "أَقَا تسْڒَام ڒْحَقّ: يجّن زَّايوم اَذَايِي يزّنْز."

²² أُوْشَا خيّْقن اَطَّاس بْذَان تْسقْسَان-ث ئِج-يج نَّان-اَس: "وَار يدْجِي بُو ذ نّش، يَاش آ سِيذِي؟"

²³ ئِنْدق-د عِيْسَى ينَّا-ٱسن: ونِّي إِي كِذِي يسِّيسْنن ذِي طّبْسِي ذ ونِّي إِي ذَايِي غَا يزّنْزن.

²⁴ مِّيس ن بْنَاذم اَذَاس يوْقع عْلَاحْسَاب مَامش خَاس يقَّار لْكِتَاب، وَلَكِن يَا ڒفْضِيحث ن بْنَاذم نِّي إِي ث غَا يزّنْزن! حْسن إِ نتَّا مْڒِي وَار د يخْڒِيق شَا."

²⁵ أُوْشَا ينَّا-ٱس يَهُوْذَا يعْنِي ونِّي إِي ث غَا يزّنْزن: "وَار يدْجِي بُو ذ نش، يَاش آ سِيذِي؟" ينَّا-ٱس عِيْسَى: "ذ شك إِي ث ينَّان."

²⁶ وَامِي عَاذ تتّن، ئِيْسِي-د اَغْرُوْم يشكَّر أَربِّـي يرْزَا اَغْرُوْم نِّي يُوْشَا-ٱسن-ث إِ يمحْضَارن نّس ينَّا-ٱسن: "يْسِيم-ث شّم-ث، وَا إِݣ يدْجَان ذ دَّات ينُو."

²⁷ ييْسِي-د ڒْكَاس يشكَّر أَربِّـي يُوْشَا-ٱسن-ث. ينَّا-ٱسن: "سْوم زَّايس مَارَّا إِذْوم.

²⁸ ڒْكَاس-أَ ذَايس يذَامّن ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان حمَا اَذَاسن يغْفَر أَربِّـي ڒْمُعْصِيَاث نْسن.

²⁹ أَقَا قَّارغ-اَوم: زِي سَّا اَڒ ثْسَاونْت وَار سسّغ شَا زݣ وَامَان-أَ ن وضِيڒ حتَّا اَڒ نْهَار نِّي إِي ثن غَا سْوغ اَكِذْوم زِي جْذِيذ ذِي ڒْمُلْك ن بَابَا."

³⁰ غنّْجن يجّن ن يِزْڒِي ن ڒْعِيذ، سّنِّي فّْغن رُوْحن غَار وذْرَار ن زِّيتُوْن.

سِيذِيثْنغ عِيْسَى يسَّاوَاڒ خ ونْكَار ن بُطْرُس

³¹ ينَّا-ٱسن عِيْسَى إِ يمحْضَارن نّس: "دْجِيڒث-أَ ثَانِيتَا اَذَايِي ثْسمْحم مَارَّا إِذْوم مِينْزِي يقَّار لْكِتَاب: أَذ ؤُوْثغ ونِّي يرَاسّن يحُوْڒِيْين، كُڒ يجّن زِي ثْحِيمرْث مَانِي غَا يَرْوڒ.

³² وَلَكِن خْمِي د غَا كَّرغ زِي ڒْموْث، أَذَاوم يزْوَارغ غَار ثْمُوْرْث ن لْجَلِيل."

³³ ئِنْدق-د بُطْرُس ينَّا-ٱس: "وَاخَّا اَذَايش غَا سمْحن مَارَّا، نش وَار ذَايش سمْحغ شَا عمَّارْص."

³⁴ ينَّا-ٱس عِيْسَى: "أَقَا تسْڒِيذ ڒْحَقّ: ثَا، دْجِيڒث-أَ قْبڒ مَا ٱذ يدّن ؤُيَازِيض اَتَاف اَذَايِي ثنْكَرذ ثْڒَاثَا ن ثْوَاڒَاثِين."

³⁵ ينَّا-ٱس بُطْرُس: "نش وَار ش نكَّرغ شَا وَاخَّا اَكِذش إِي غَا مّْثغ." أَمنِّي إِي نَّان مَارَّا يمحْضَارن.

سِيذِيثْنغ عِيْسَى يتْࢲَادْجَا ذݣ وذْرَار ن زِّيتُوْن

³⁶ يُوْسَا-د عِيْسَى اَك يمحْضَارن نّس غَار يِجّن ن ومْشَان قَّارن-اَس <ݣَتْسِمَانِي.> ينَّا-ٱسن: "قِّيمم ذَا، نش اَذ رَاحغ ذِيهَا اَذ ࢲَّادْجغ."

³⁷ يُوْوِي اَكِس بُطْرُس ذ ثْنَاين ن ثَارْوَا ن زَبَادِي، ئِبْذَا يتْنخْڒَاع يتْخيَّاق.

³⁸ ينَّا-ٱسن: "ڒَعْمَر ينُو عْڒَاين اَذ يدُّوْقّز س لْحُزن. قِّيمم ذَا ثْفَاقم اَكِذِي."

³⁹ ئِبعّذ خَاسن شْوَايْت، ئِسجّذ غَار ثْمُوْرْث يبْذَا يتتَّار إِ أَربِّـي ينَّا: "آ بَابَا، مڒَا مُمْكِن سْبعّذ-يث خَافِي ڒْكَاس-أَ ن ڒَعْذَاب. مَاشِي مَامش خْسغ نش؛ لَّا، مَامش يخس ڒْخَاضَر نّش شك."

⁴⁰ ئِذْوڒ غَار يمحْضَارن-أَ يُوْفِي-ثن طّْصن، ينَّا-ٱس إِ بُطْرُس: "مَا وَار ثْزمَّرم شَا اَكِذِي ثْفَاقم وَاخَّا ذ يجّن ن ثْسَعَّات وَاهَا؟

⁴¹ إِڒِيم عْلَابَال ࢲَّادْجم حمَا وَار تِيذْفم شَا ذِي ڒمْحَاين. ؤُڒ ن بْنَاذم يوْجذ وَلَكِن دَّات نّس ثضْعف."

⁴² ئِبعّذ خَاسن ثْوَاڒَا وِيس ثْنَاين، ئِتَّار إِ أَربِّـي ينَّا: "آ بَابَا، مڒَا ڒْكَاس-أَ ن ڒَعْذَاب وَار خَافِي ثسْبعّْذذ شَا سْوِيغ-ث، أَتَاف اَذ يِيڒِي مِين يخس ڒْخَاضَر نّش."

⁴³ ئِذْوڒ-د عَاوذ غَارْسن يُوْفِي-ثن طّْصن ڒَاحقَّاش يغلّب خَاسن يِيضص.

⁴⁴ ئِبعّذ خَاسن عَاوذ، يࢲُّودْج ثْوَاڒَا وِيس ثْڒَاثَا ينَّا مَامش ينَّا قْبڒ.

⁴⁵ ئِذْوڒ-د غَار يمحْضَارن-أَ ينَّا-ٱسن: "عَاذ ثطّْصم، عَاذ ثْريّْحم؟ صَافِي، بَرَكَا! أَقَا ثُوْوض-د ڒْوقْث نِّي إِي ذِي غَا يتْوَاسلّم مِّيس ن بْنَاذم غَار يفَاسّن ن يِنِّي يعصَّان.

⁴⁶ كَّرم أَ نُوْيُوْرم، قَا ونِّي إِي ذَايِي غَا يزّنْزن اَقَاث يُوْسَا-د."

أَيث-إِسْرَائِيل ذ يرُوْمَانِيْين تطّْفن سِيذِيثْنغ عِيْسَى

⁴⁷ يَالَّاه عِيْسَى يسَّاوَاڒ يُوْوض-د يَهُوْذَا، ئِجّن زِي ثنْعَاش نِّي ن اَرُّسُل نّس. يُوْوِي-د اَكِذس ڒْغَاشِي اَطَّاس يْسِين ڒسْيُوْف ذ يدبُّوْزن. سّكّن-ثن-د اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل.

⁴⁸ ونِّي إِي ث غَا يزّنْزن يعْنِي يَهُوْذَا قْبڒ تُوْغَا يتَافق اَكِذْسن خ يِجّن ن لْعَلَامَا ينَّا-ٱسن: ونِّي خف غَا سدْجْمغ ذ ونِّي إِي خف ثْرزُّوْم، طّْفم-ث."

⁴⁹ ڒخْدّنِّي يقَارّب يَهُوْذَا غَار عِيْسَى ينَّا-ٱس: "سَّلَام آ سِيذِي." أُوْشَا يسدْجم خَاس.

⁵⁰ ينَّا-ٱس عِيْسَى: "آي اَمدُّوْكڒ، مِينْغَار د ثُوْسِيذ اݣّ-يث." أُوْشَا قَارّْبن-د غَار عِيْسَى حرْثن خَاس، طّْفن-ث.

⁵¹ ئِكَّر-د يِجّن زݣ يِنِّي ذِنِّي يدْجَان اَك عِيْسَى يسْوِيزّذ يجْبذ-د سِّيف، يُوْوْثَا زَّايس يسْمغ ن اَرَّايس ن ڒْفُقَهَا يقسّ-اَس اَمزُّوْغ.

⁵² ينَّا-ٱس عِيْسَى: "أَرّ سِّيف نّش غَار ومْشَان نّس، ڒَاحقَّاش مَارَّا يِنِّي يكسِّين سِّيف تْمتَّان س سِّيف.

⁵³ مَا تْغِير-اَش وَار زمَّرغ اَذ تَّارغ إِ بَابَا اَذَايِي د يسّكّ ڒخُّو كْتَار زِي ثنْعَاش ن لْجُيُوْش ن لْمَلَائِكَاث؟

⁵⁴ وَلَكِن مَامّش إِي غَا يكمّڒ وَاوَاڒ إِي ينَّا سِيذِي أَربِّـي بلِّي مَانَايَا يتْخصَّا اَذ يوْقع اَمُّو؟"

⁵⁵ ڒخْدّنِّي ينَّا-ٱسن عِيْسَى إِ يِوْذَان نِّي: "مَا تْغِير-اَوم قَا نش ذ لْمُجْرِم وَامِي د ثيْسِيم ڒسْيُوْف ذ يدبُّوْزن حمَا اَذَايِي ثطّْفم نِغ؟ تُوْغَا تْغِيمِيغ مْكُڒ نْهَار ذِي ثمْزِيذَا ثَمقّْرَانْت، سڒْمَاذغ ذِنِّي وَار ذَايِي ثطِّيفم شَا.

⁵⁶ وَلَكِن مَارَّا مَانَايَا يوْقع حمَا اَذ يكمّڒ مِين يُوْرِين ذِي لْكُتُب ن لْأَنْبِيَا." أُوْشَا سمْحن ذَايس مَارَّا يمحْضَارن نّس اَروْڒن.

سِيذِيثْنغ عِيْسَى زَّاث إِ لْحُكَّام ن أَيث-إِسْرَائِيل

⁵⁷ يِنِّي يطّْفن عِيْسَى ؤُوِين-ث غَار اَرَّايس ن ڒْفُقَهَا قَّارن-اَس قِيَافَا. مُوْنن اَكِذس يمقّْرَانن ن أَيث-إِسْرَائِيل ذ يمْسڒْمَاذن ن شَّرِيعَا.

⁵⁸ ئِذْفَار-يث بُطْرُس زِي ڒݣّْوَاج، يُوْذف غَار ڒمْرَاح ن ثدَّارْث ن اَرَّايس ن ڒْفُقَهَا. يُوْذف يقِّيم ذِي ڒمْرَاح اَك يعسَّاسن حمَا اَذ يࢲر مِين غَا يوقْعن.

⁵⁹ أَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل رزُّوْن ؤُو غَا يشهْذن ࢲُّوْر خ عِيْسَى حمَا اَث نْغن.

⁶⁰ وَار ؤُفِين شَا مِينْخف رزُّوْن وَاخَّا اَطَّاس إِي خَاس يشهّْذن ࢲُّوْر. منْبَعْد حْضَارن-د ثْنَاين

⁶¹ نَّان: "أَرْيَاز-أَ ينَّا: زمَّرغ اَذ هذْمغ ثَمْزِيذَا ثَمقّْرَانْت ن أَربِّـي، أَت بْنِيغ ذِي ثڒْتِيَّام."

⁶² أُوْشَا يبدّ اَرَّايس ن ڒْفُقَهَا ينَّا-ٱس إِ عِيْسَى: مَا وَار ثقَّارذ وَالُو شك؟ مِين خَاش شهّْذن يِوْذَان-أَ؟"

⁶³ ئِقِّيم عِيْسَى يسْقَر وَار ذَاس يِينِّي وَالُو. أُوْشَا ينَّا-ٱس اَرَّايس نِّي: "تتَّارغ زَّايش اَذَانغ ثجَّادْجذ س أَربِّـي يدَّرن حمَا اَذَانغ ثِينِيذ: مَا شك ذ لْمَسِيح، ذ مِّيس ن أَربِّـي؟"

⁶⁴ ينَّا-ٱس عِيْسَى: "أَقَا ثنِّيذ-ث شك. إِنَّمَا، أَقَا قَّارغ-اَوم: زِي سَّا اَڒ ثْسَاونْت اَذ تࢲرم مِّيس ن بْنَاذم يقِّيم خ وفُوْسِي ن لْقَوِي. أَث ثࢲرم عَاوذ يهوَّا-د اَك وسيْنُو ن وجنَّا."

⁶⁵ ڒخْدّنِّي اَرَّايس نِّي ن ڒْفُقَهَا يغَرص اَرُّوْض خ يِيخف نّس ينَّا-ٱسن: "مَا ثسْڒِيم-اَس يقَّار لْمُنْكَر خ سِيذِي أَربِّـي؟ وَار نحْذِيج بُو ڒشْهُوْذ!

⁶⁶ مِين ذَاوم يمظْهَارن؟" ندْقن-د نَّان: "وَانِيتَا يسْذَاهدْج ڒْموْث!"

⁶⁷ ڒخْدّنِّي سُّوْسُوْفن خَاس خ وغمْبُوْب شَّاثن-ث س ڒْپُـوْنْيَاث. ڒبْعَاض زَّايسن تْسقَّاڒن-ث،

⁶⁸ قَّارن-اَس: "إِيوَا آ نَّبِي لْمَسِيح، سّن ؤُو ش يُوْوْثِين زَّايْنغ!"

بُطْرُس ينكَّر سِيذِيثْنغ عِيْسَى

⁶⁹ بُطْرُس يقِّيم غَار بَرَّا ذِي ڒمْرَاح. ثْقَارّب غَارس يجّن ن ثْخدَّانْت ثنَّا-ٱس: "ؤُڒَا ذ شك ثدْجِيذ اَك عِيْسَى زِي لْجَلِيل."

⁷⁰ ئِنْكَر بُطْرُس زَّاث إِ يِوْذَان نِّي مَارَّا ينَّا-ٱس: "وَار سِّينغ شَا مِينْخف ثسَّاوَاڒذ!"

⁷¹ ئِفّغ بُطْرُس يرُوْح طَّارْف ن ثوَّارْث ن ڒمْرَاح. ثࢲْرِي-ث يجّن ن ثْخدَّانْت نّغْنِي ثنَّا-ٱسن إِ يِنِّي يحْضَارن ذِنِّي: "أَرْيَاز-أَ يتِيڒِي اَك عِيْسَى زِي نَاصِرَا!"

⁷² ئِنْكَر بُطْرُس عَاوذ ينَّا-ٱسن: "أَذَاوم جَّادْجغ، أَرْيَاز-أَ وَار ث سِّينغ شَا."

⁷³ منْبَعْد شْوَايْت قَارّْبن-د غَار بُطْرُس يِنِّي يحْضَارن ذِنِّي نَّان-اَس: "شك ذ يجّن زَّايسن، وَار ذَايس بُو شّكّ. تْوَاعقْڒذ غِير ذݣ وَاوَاڒ نّش."

⁷⁴ ئِكَّر بُطْرُس يبْذَا يتْحَرَّام يخف نّس يتْجَادْجَا يقَّار-اَسن: "نش اَرْيَاز-أَ وَار ث سِّينغ شَا!" ڒخْدّنِّي يدّن ويَازِيض.

⁷⁵ ذِنِّي يفكَّر-د بُطْرُس اَوَاڒ نِّي ن عِيْسَى وَامِي ذَاس ينَّا: قْبڒ مَا ٱذ يدّن ويَازِيض اَتَاف اَذَايِي ثنْكَرذ ثْڒَاثَا ن ثْوَاڒَاثِين. ئِفّغ غَار بَارَّا يرُو يمطَّاون ذ يمدْجَاحن اَطَّاس.