أَسڒْمذ ن سِيذِيثْنغ عِيْسَى لْكِتَاب ن مَتَّى 20 - ثريفيث 2020ڒْمَعْنَا ن يخدَّامن ن ومَرْجع وضِيڒ 1 "أَقَا ڒْمُلْك وجنَّا اَمشْنَاو يجّن ن بَاب ن ومَرْجع وضِيڒ. ئِفّغ غَار صْبَاح زِيش اَذ يݣّ يخدَّامن ذݣ ومَرْجع وضِيڒ نّس. 2 ئِتَافق اَك يخدَّامن نِّي خ يِجّن ن دِينَار إِ نْهَار، ئِسّكّ-يثن غَار ومَرْجع نّس. 3 ئِفّغ-د غَار جْوَايه نِّي ن تسْعَا يُوْفَا يخدَّامن نّغْنِي قِّيمن ذِي ڒْموْقف بْڒَا ڒْخذْمث. 4 ينَّا-ٱسن: رُوْحم ؤُڒَا ذ كنِّيو غَار ومَرْجع ينُو، أَتَاف اَذَاوم خدْجْسغ مِين ثسْذَاهدْجم. 5 كَّرن رُوْحن. ئِفّغ-د غَار جْوَايه ن ثنْعَاش عَاوذ غَار جْوَايه ن ثْڒَاثَا وعشِّي يݣَّا نّفْس ڒْخذْمث. 6 أُوْشَا يفّغ-د عَاوذ غَار جْوَايه نِّي ن خمْسَا وعشِّي، يُوْفَا يخدَّامن نّغْنِي قِّيمن بْڒَا ڒْخذْمث. ينَّا-ٱسن: مِين كنِّيو يُوْغِين ثقِّيمم ذَا نْهَار اَمن-يكْمَاڒ بْڒَا ڒْخذْمث؟ 7 نَّان-اَس: وَالُو، وَار ذَانغ يسخْذم حَدّ. ينَّا-ٱسن: رُوْحم ؤُڒَا ذ كنِّيو غَار ومَرْجع ينُو. 8 وَامِي ثغْڒِي ثْفُوْشْت، ينَّا-ٱس بَاب ن ومَرْجع إِ ؤُوقَّاف نّس: ڒَاغَا-د إِ يخدَّامن خدْجس-يثن. بْذَا زݣ يِنِّي إِي د يُوْسِين ذ ينݣُّوْرَا عَاذ إِ يمزْوُوْرَا. 9 يِنِّي يبْذَان ڒْخذْمث غَار خمْسَا وعشِّي، يُوْشَا-ٱسن دِينَار دِينَار. 10 وَامِي د وْسِين يمزْوُوْرَا تْغِير-اَسن اَذَاسن يُوش كْتَار وَلَكِن لَّا، ؤُڒَا ن نِثْنِي يُوْشَا-ٱسن دِينَار دِينَار. 11 وَامِي ذَاسن يُوْشَا دِينَار، مْخيَّاقن اَك بَاب ن ومَرْجع. 12 نَّان-اَس: ئِخدَّامن-أَ إِي د يُوْسِين ذ ينݣُّوْرَا خذْمن يجّن ن ثْسَعَّات وَاهَا، شك ثُوْشِيذ-اَسن اَمشْنَاو نشِّين إِݣ يُوْوْثِين تَمَارَا ن نْهَار اَمن-يكْمَاڒ ذِي ثْفُوْشْت. 13 ئِنْدق-د بَاب ن ومَرْجع ينَّا-ٱس إِ يِجّن زَّايْسن: وَار ش شْمِيثغ شَا آي اَمدُّوْكڒ. يَاش شك ثْتَافْقذ اَكِذِي خ يِجّن ن دِينَار نِغ لَّا؟ 14 يْسِي تخْڒِيسث نّش ؤُيُوْر. خْسغ اَذَاس ؤُشغ إِ وَا إِي د يُوْسِين ذ اَنݣَّارُو اَنشْت نّش. 15 مَا وَار غَارِي ڒْحَقّ اَذ ݣّغ مِين خْسغ زِي ثْمسْڒَايِين ينُو؟ نِغ ثْحسْذذ-اَيي وَامِي دْجِيغ صَاخِي؟ 16 أَمنِّي يِنِّي يدْجَان ذ ينݣُّوْرَا اَذ ذوْڒن ذ يمزْوُوْرَا؛ يِنِّي يدْجَان ذ ئِمزْوُوْرَا اَذ ذوْڒن ذ ينݣُّوْرَا." سِيذِيثْنغ عِيْسَى يسَّاوَاڒ عَاوذ خ ڒْموْث نّس 17 وَامِي يݣَعّذ عِيْسَى غَار ثنْدِينْت ن لْقُدْس، ذݣ وبْرِيذ ئِرُوْح يُوْوِي ثنْعَاش نِّي ن يمحْضَارن نّس وَاحذْسن ينَّا-ٱسن: 18 "أَقَا نتْݣَعَّاذ غَار لْقُدْس مَانِي غَا يتْوَاخْذع مِّيس ن بْنَاذم إِ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا. أَخَاس حكْمن س ڒْموْث، 19 أَث سلّْمن إِ يِنِّي وَار يدْجِين شَا زِي أَيث-إِسْرَائِيل. أَخَاس ضحْشن، اَث ؤُوْثن س وسْغُوْن، اَث صلّْبن. نْهَار وِيس ثڒْتِيَّام اَذ د يتْوَاسْنكَّر زِي ڒْموْث." طَّلب ن يمَّاثْسن ن ثَارْوَا ن زَبَادِي 20 ئِجّن ن ثمْغَارْث، نتَّاث ذ يمَّاثْسن ن ثَارْوَا ن زَبدِي، ثْقَارّب غَار عِيْسَى اَك ثْنَاين ن ثَارْوَا ن نّس ثْسجّذ-اَس حمَا اَزَّايس ثتَّار شَان ڒْحَاجث. 21 ينَّا-ٱس عِيْسَى: "مِين ثْرزُّوْذ؟" ثنَّا-ٱس: "إِن-اَيِي اَذ قِّيمن يِيْنَا ثَارْوَا ينُو س ثْنَاين ذِي ڒْمُلْك نّش يجّن خ وفُوْسِي يجّن خ وࢲڒْمَاض نّش." 22 ئِنْدق-د عِيْسَى ينَّا-ٱسن إِ يَعْقُوْب ذ يُوْحَنَّا: "كنِّيو وَار ثْسِّينم شَا مِين ثتَّارم. مَا ثْزمَّرم اَذ تسْوم زِي ڒْكَاس نِّي إِي زِي غَا سْوغ نش عْڒَاين؟" نَّان-اَس: "وَاه، نْزمَّر-اَس!" 23 ينَّا-ٱسن: "وَاه، أَتَاف اَذ تسْوم زِي ڒْكَاس ينُو. وَلَكِن اَغِيمِي خ وفُوْسِي ينُو ذ وࢲڒْمَاض ينُو وَار يدْجِي بُو ذ نش إِي ث غَا يُوْشن، أَذ يمُّوْش إِ يِنِّي ؤُمِي ثن يسوْجذ بَابَا." 24 عشْرَا نِّي ن يمحْضَارن وَامِي سْڒِين خ مِين رزُّوْن ثْنَاين نِّي ن وَاوْمَاثن وَار ذَاسن يعْجِيب شَا ڒْحَاڒ. 25 ئِڒَاغَا-يَاسن-د عِيْسَى مَارَّا إِذْسن ينَّا-ٱسن: "قَا ثسّْنم اَرُّوْيَاس ن ثْمُوْرَا حكّْمن خ شُّعُوْب نْسن، يِنِّي يمقّْرَانن زَّايْسن تْزيَّرن خَاسن. 26 وَلَكِن مَانَاينِّي يتْخصَّا وَار يتِيڒِي شَا جَارَاوم. لَّا، ونِّي يرزُّوْن اَذ يذْوڒ ذ اَمقّْرَان جَارَاوم يتْخصَّا-يَاس اَذ يِيڒِي ذ اَخدَّام نْوم. 27 ونِّي يرزُّوْن اَذ يذْوڒ ذ اَمزْوَارُو جَارَاوم يتْخصَّا-يَاس اَذ يِيڒِي ذ يسْمغ نْوم. 28 مِّيس ن بْنَاذم ؤُڒَا ذ نتَّا وَار د يُوْسِي شَا حمَا اَخَاس خذْمن يِوْذَان. لَّا، نتَّا يُوْسَا-د حمَا اَخَاسن يخْذم، أَخَاسن يصدّق ثُوْذَارْث نّس حمَا اَذ يسنْجم اَطَّاس زَّايْسن." سِيذِيثْنغ عِيْسَى يسْݣنْفَا ثْنَاين ن يضَرْغَاڒن ذِي أَرِيحَا 29 وَامِي فّْغن زِي ثنْدِينْت ن أَرِيحَا، ذْفَارن-د عِيْسَى اَطَّاس ن ڒْغَاشِي. 30 ذِنِّي ثْنَاين ن يضَرْغَاڒن قِّيمن خ طَّارْف ن وبْرِيذ. وَامِي سْڒِين إِ عِيْسَى يݣُّوْر-د، سْنكَّرن ثْغُوْيّث قَّارن: "آ سِيذِي آ مِّيس ن أَيث-دَاود، رْحم-اَنغ!" 31 زيَّرن خَاسن يِوْذَان نَّان-اَسن سْقَرم، وَلَكِن نِثْنِي قِّيمن سْنكَّرن ثْغُوْيّث عَاذ س جّْهذ قَّارن: "آ سِيذِي آ مِّيس ن أَيث-دَاود، رْحم-اَنغ!" 32 ئِبدّ عِيْسَى، ئِڒَاغَا-يَاسن-د ينَّا-ٱسن: "مِين ثخْسم اَذَاوم ݣّغ؟" 33 نَّان-اَس: "آ سِيذِي، قَا نخْس اَذ نُوْرْزْمنْت ثِيطَّاوِين نّغ!" 34 قّْسن-اَس إِ عِيْسَى يحَاذَا-يَاسن ثِيطَّاوِين نْسن. ذݣ ومْشَان ذوْڒن تْوَاڒَان أُوشَا ذْفَارن-ث. |