أَسڒْمذ ن سِيذِيثْنغ عِيْسَى لْكِتَاب ن مَتَّى 19 - ثريفيث 2020

طَّلَاق عْلَاحْسَاب مَامّش يقَّار سِيذِيثْنغ عِيْسَى

¹ وَامِي يكمّڒ عِيْسَى اَوَاڒ نّس، ئِفّغ زِي ثْمُوْرْث ن لْجَلِيل يُوْوض غَار جْوَايه ن يَهُوْذِيَا ذ وجمَّاض-ين ن يغْزَار ن لْأُرْدُن.

² ذْفَارن-ث يجّن ن لْعَدَد ن يِوْذَان، يسْݣنْفَا يمهْڒَاش نْسن ذِنِّي.

³ قَارّْبن-د غَارس شَان يِوْذَان زِي ڒْحِزب ن يفَرِّيسِيْين حمَا اَث جَرّْبن. نَّان-اَس: "مَا حَلَال اَذ يدْجف شَان ورْيَاز إِ ثمْغَارْث نّس ذِي اَيِّي ڒْحَاجث؟"

⁴ ئِنْدق-د عِيْسَى ينَّا-ٱسن: "مَا وَار ثغْرِيم مِين يقَّار لْكِتَاب؟ زݣ وَامِي ثدْجَا دُّنشْت يخْڒق لْخَالِق اَرْيَاز ذ ثمْغَارْث.

⁵ ينَّا أَربِّـي: أَقَا اَرْيَاز اَذ يجّ بَابَاس ذ يمَّاس اَذ يمُوْن اَك ثمْغَارْث نّس، أَذ ذوْڒن س ثْنَاين إِذْسن ذ يجّن.

⁶ خ مَانَايَا وَار تِيڒِين شَا ذ ثْنَاين؛ لَّا، أَذ يڒِين ذ يجّن. إِذن، مِين يسْمُوْن أَربِّـي وَار ث يسْفَرّق شَا بْنَاذم."

⁷ نَّان-اَس يفَرِّيسِيْين: "إِيوَا، مَايمِّي يوصَّا مُوْسَى اَرْيَاز اَذ يُوْش ثَبْرَات ن وَادْجَاف إِ ثمْغَارْث نّس اَذَاس يدْجف؟"

⁸ ينَّا-ٱسن عِيْسَى: "ئِجِّي-كنِّيو مُوْسَى اَذ تدْجْفم إِ ثمْغَارِين نْوم مِينْزِي غَارْوم ؤُڒ يقْسح، وَلَكِن ذݣ ومزْوَارُو وَار تُوْغَا شَا اَمُّو.

⁹ قَّارغ-اَوم نش: مَارَّا ونِّي غَا يدْجْفن إِ ثمْغَارْث نّس اَمن وَار ثزْنِي، يُوْوِي شَان يشْتن نّغْنِي، أَتَاف يزْنَا."

¹⁰ نَّان-اَس يمحْضَارن نّس: "مڒَا اَمُّو لْحَالَا ن ورْيَاز اَك ثمْغَارْث نّس، حْسن-اَس اَتَاف وَار يمدْجش شَا."

¹¹ ينَّا-ٱسن عِيْسَى: "زمَّرن اَذ قبْڒن اَوَاڒ-أَ غِير يِنِّي ؤُمِي يُوْشَا أَربِّـي ثِزمَّار اَث قبْڒن.

¹² ذِنِّي ڒبْعَاض زݣ وَامِي خڒْقن وَار زمَّرن اَذ مڒْشن. ذِنِّي ڒبْعَاض نّغْنِي قّْنن-ثن يِوْذَان. أُو ذِنِّي ڒبْعَاض نّغْنِي ؤُݣِين اَذ مڒْشن خ سَّبَاب ن ڒْمُلْك وجنَّا. ونِّي يزمَّرن اَذ يقْبڒ ثِمسْڒَايِين-أَ اَثنْت يقْبڒ."

سِيذِيثْنغ عِيْسَى يتْبَرك يحنْجِيرن يمزْيَانن

¹³ ؤُوِين-د يِوْذَان شَان يحنْجِيرن ذ يمزْيَانن غَار عِيْسَى حمَا اَخَاسن يسرْس يفَاسّن اَخَاسن يࢲَّادْج، وَلَكِن عَارّْضن-اَسن يمحْضَارن نّس.

¹⁴ ئِكَّر عِيْسَى ينَّا-ٱسن: "اجّم يحنْجِيرن يمزْيَانن اَغَارِي د اَسن. وَار ذَاسن تْعَارَّاضم شَا ڒَاحقَّاش ڒْمُلْك وجنَّا يتِيڒِي غَار يِنِّي إِي يدْجَان اَم يِيْنَا."

¹⁵ يݣَّا خَاسن يفَاسّن نّس يُوْيُوْر سّنِّي.

أَحنْجِير إِݣ يدْجَان ذ تَّاجَر

¹⁶ ئِقَارّب يجّن ن وحنْجِير غَار عِيْسَى ينَّا-ٱس: "آ لْمُعَلِّم، مِين غَا ݣّغ ذ اَصبْحَان حمَا اَغَارِي ثِيڒِي ثُوْذَارْث ن ڒبْدَا؟"

¹⁷ ينَّا-ٱس عِيْسَى: "مَايمِّي إِي ذَايِي تسّقْسِيذ خ مِين يصبْحَان؟ غِير يجّن إِݣ يدْجَان ذ اَصبْحَان. مڒَا ثخْسذ اَذ تَاذْفذ ثُوْذَارْث ن ڒبْدَا، اݣّ اَرَّاي س ڒُوْصِيَاث."

¹⁸ ينَّا-ٱس وحنْجِير نِّي: "مَان ڒُوْصِيَاث؟" ينَّا-ٱس عِيْسَى: "وَار نقّ، وَار زنِّي، وَار تَاشَار، وَار شهّذ بُو ࢲُّوْر،

¹⁹ وقَّر بَابَاش ذ يمَّاش، خس اَجَّار نّش اَمشْنَاو يخف نّش."

²⁰ ينَّا-ٱس وحنْجِير نّي: "تْوقَّرغ مَارَّا مَانَايَا. مِين ذَايِي يقِّيمن اَث ݣّغ؟"

²¹ ينَّا-ٱس عِيْسَى: "مڒَا ثخْسذ اَذ تݣّذ كُڒْشِي نِيشَان، رُوْح زنْز مَارَّا مِين غَارك ذ اَݣْڒَا صدّق-يث خ ڒْمُسَاكِين. سّنِّي اَغَارك يِيڒِي يجّن ن ڒْكنْز ذݣ وجنَّا، ڒخْدّنِّي أَرَاح-د شك ذْفَار-اَيِي-د."

²² أَحنْجِير نِّي، وَامِي يسْڒَا إِ مَانَاينِّي يرُوْح يخيّق اَطَّاس ڒَاحقَّاش غَارس اَطَّاس ن وَاݣْڒَا.

²³ ينَّا-ٱسن عِيْسَى إِ يمحْضَارن نّس: "أَقَا تسْڒَام ڒْحَقّ: مشْحَاڒ يقْسح خَاس خ تَّاجَر اَذ يَاذف ڒْمُلْك وجنَّا.

²⁴ قَّارغ-اَوم عَاوذ: أَقَا يسْهڒ اَذ يعْذُو يجّن ن وڒْغم زِي ثِيطّ ن ثْسيْنفْث قْبڒ مَا ٱذ يَاذف يِجّن ن تَّاجَر ذِي ڒْمُلْك ن أَربِّـي."

²⁵ ئِمحْضَارن ستْعجّْبن اَطَّاس وَامِي سْڒِين مَانَاينِّي، نَّان-اَس: "خْيَار، ؤُݣ يزمَّرن اَذ ينْجم؟"

²⁶ ئِخْزَر غَارْسن عِيْسَى ينَّا-ٱسن: "مَانَايَا وَار ذَاس زمَّرن شَا يِوْذَان، وَلَكِن كُڒْشِي يزمَّر-اَس أَربِّـي."

²⁷ ئِنْدق-د بُطْرُس ينَّا-ٱس: "أَقَا نشِّين نسْمح ذِي كُڒْشِي نذْفَار-يش، مِين غَارْنغ غَا يِيڒِين!؟"

²⁸ ينَّا-ٱسن عِيْسَى: "أَقَا تسْڒَام ڒْحَقّ: ذِي ثُوْذَارْث نّغْنِي خْمِي غَا يقِّيم مِّيس ن بْنَاذم خ لْعَرْش نّس ن لْعَظَمَا، ؤُڒَا ذ كنِّيو ذَايِي د يذْفَارن اَذ تقِّيمم خ ثنْعَاش ن لْعَرْشَاث حمَا اَذ تْحكْمم خ ثنْعَاش ن ثْقبَّاڒ ن أَيث-إِسْرَائِيل.

²⁹ أُو مَارَّا يِنِّي يسمّْحن ذِي ثُوْذْرِين نْسن نِغ ذِي أَيثْمَاس نِغ ذِي سُوْيْثْمَاس نِغ ذِي بَابَاس ذ يمَّاس نِغ ذِي ثَارْوَا نْسن نِغ ذݣ يمَرْجعِيون نْسن خ سَّبَاب ينُو نش، أَتَاف اَغَارْسن ثِيڒِي مِيَّا ن ثْسقَّار كْتَار، أَذ وَرْثن ثُوْذَارْث ن ڒبْدَا.

³⁰ أَطَّاس إِي يدْجَان ذ يمزْوُوْرَا اَذ ذوْڒن ذ ينݣُّوْرَا، ئِنݣُّوْرَا اَذ ذوْڒن ذ يمزْوُوْرَا."