أَسڒْمذ ن سِيذِيثْنغ عِيْسَى لْكِتَاب ن مَتَّى 15 - ثريفيث 2020

لْعَادَاث إِي وَار د يُوْسِين شَا زِي أَربِّـي

¹ سّنِّي ؤُسِين-د ڒْحِزب ن يفَرِّيسِيْين ذ يمْسڒْمَاذن ن شَّرِيعَا غَار عِيْسَى زِي ثنْدِينْت ن لْقُدْس نَّان-اَس:

² "مَايمِّي يمحْضَارن نّش بطّْڒن لْعَادَاث ن ڒجْذُوْذ نّغ؟ مَايمِّي وَار سِيرِيذن شَا يفَاسّن نْسن قْبڒ مَا ٱذ شّن اَغْرُوْم."

³ ئِنْدق-د عِيْسَى ينَّا-ٱسن: "إِيوَا مَايمِّي كنِّيو ثْبطَّاڒم ڒُوْصِيّث ن أَربِّـي حمَا اَذ تسْخذْمم لْعَادَاث نْوم؟

⁴ مِينْزِي أَربِّـي ينَّا: وقَّر بَابَاش ذ يمَّاش. أَقَا ونِّي غَا يُوْكَّرن بَابَاس نِغ ذ يمَّاس، أَتَاف يتْخصَّا-يَاس اَذ يمّث.

^5-6 وَلَكِن كنِّيو ثقَّارم بلِّي وَار يدْجِي بُو لَابُد إِ يِوْذَان اَذ وقَّرن نِغ اَذ عَاوْنن لْوَالِدِين. تْمنْيَاث نِّي إِي غَا ؤُشن إِ لْوَالِدِين نْسن اَثنْت ؤُشن إِ ثمْزِيذَا. أَمُّو كنِّيو ثْبدّْڒم ڒْمَعْنَا ن وَاوَاڒ ن أَربِّـي حمَا اَذ تݣّم مَامّش ذَاوم يعْجب ڒْحَاڒ س لْعَادَاث نْوم.

⁷ آ لْمُنَافِقِين! قَا نَّبي إِشَعْيَا ينَّا ڒْحَقّ وَامِي خَاوم يسِّيوڒ ذݣ يِجّن ن زْمَان:

⁸ <شَّعْب-أَ يتْوقَّر-اَيِي س وقمُّوْم وَاهَا، مَاشَا ؤُڒ نّس يݣّْوج خَافِي.

⁹ ئِوْذَان-أَ عبّْذن-اَيِي ذِي ڒْخَاوِي، ڒَاحقَّاش سڒْمَاذن ثِمسْڒَايِين يدْجَان ذ ڒُوْصِيَاث ن بْنَاذم وَاهَا.>"

¹⁰ ئِڒَاغَا-د عِيْسَى إِ ڒْغَاشي ينَّا-ٱسن: "صنّْطث مْلِيح، فهْمث:

¹¹ مَا ذِنِّي شَا ن ثْمسْڒَايْث يتَاذْفن اَقمُّوْم تْحَارَّام بْنَاذم؟" ينَّا-ٱسن: "لَّا، مِين د يتفّْغن زݣ وقمُّوْم اَقَا مَانَاينِّي إِݣ يتْحَارَّامن بْنَاذم."

¹² قَارّْبن-د غَارس يمحْضَارن نّس نَّان-اَس: "مَا ثسّْنذ بلِّي يفَرِّيسِيْين وَار ذَاسن يعْجِيب بُو ڒْحَاڒ وَامِي سْڒَان إِ وَاوَاڒ نّش؟"

¹³ ئِنْدق-د عِيْسَى ينَّا-ٱسن: "كُڒ اَرْبِيع وَار ث يࢲُّو شَا بَابَا يدْجَان ذݣ وجنَّا اَذ ينقْڒع س يࢲوْرَان نّس.

¹⁴ اجّم-ثن! نِثْنِي ذ يضَرْغَاڒن تْجَرَّان يضَرْغَاڒن. مڒَا اَضَرْغَاڒ يجَرّ اَضَرْغَاڒ، أَتَاف اَذ وْضَان س ثْنَاين إِذْسن ذِي شَان ثسْرَافْث."

¹⁵ ينَّا-ٱس بُطْرُس: "فسّر-اَنغ ڒْمَعْنَا-يَا."

¹⁶ ينَّا-ٱس عِيْسَى: "ؤُڒَا ذ كنِّيو عَاذ وَار ثفْهِيمم شَا؟

¹⁷ مَا وَار ثسِّينم بلِّي مِين يتَاذْفن ذݣ وقمُّوْم يتْرَاح غَار وعدِّيس، ئِتفّغ زِي دَّات؟

¹⁸ وَلَكِن مِين د يتفّْغن زݣ وقمُّوْم يتَاس-د زݣ وُوْڒ، أُو ذ مَانَايَا يتْحَرَّامن بْنَاذم.

¹⁹ ڒَاحقَّاش زݣ وُوْڒ إِي زِي د تكَّانْت لْأَفْكَار ثِعفَّانِين ذ ثْمنْغِيْوْث ذ زّْنَا ذ لْفَسَاد ذ ثُوْكَّارْذَا ذ ࢲُّوْر ذ ڒْبَاطڒ.

²⁰ ذ ثِمسْڒَايِين-أَ إِݣ يتْحَارَّامن بْنَاذم، وَلَكِن مڒَا يشَّا س يفَاسّن بْڒَا مَا ثن يسِيرذ، أَتَاف وَار يتْحَارِّيم بُو بْنَاذم."

لْإِيمَان ن ثمْغَارْث ن أَيْث-كَنْعَان

²¹ ئِكَّر عِيْسَى يُوْيُوْر سّنِّي يرُوْح غَار جْوَايه ن ثنْدِينْت ن صُوْر ذ ثنْدِينْت ن صَيْدَا.

²² ثُوْسَا-د غَارس يجّن ن ثمْغَارْث زِي أَيث-كَنْعَان ثْزدّغ ذِنِّي. تْرَاغَا ثقَّار-ٱس إِ عِيْسَى: "رْحم-اَيِي آ سِيذِي، آ مِّيس ن أَيث-دَاود! قَا يدْجِي ذَايس يجّن ن جّنّ ذ اَعفَّان يتْعدَّاب-يت اَطَّاس."

²³ وَار ذَاس ينِّي عِيْسَى ؤُڒَا ذ يجّن ن وَاوَاڒ. قَارّْبن غَارس يمحْضَارن نّس نَّان-اَس: "ثَمْغَارْث-أَ سُوْفغ-يت خَانغ، زِي صْبَاح نتَّاث ثْذفَّار-اَنغ ثسْغُوْيِيو خَانغ."

²⁴ ينَّا-ٱسن عِيْسَى: "قَا نش تْوَاسّكّغ-د غِير غَار يحُوْڒِيْين يودَّارن، يعْنِى يوْذَان ن أَيث-إِسْرَائِيل."

²⁵ وَلَكِن ثَمْغَارْث نِّي ثُوْسَا-د غَارس ثْسجّذ-اَس ثنَّا-ٱس: "آ سِيذِي، عَاون-اَيِي!"

²⁶ ئِنْدق-د عِيْسَى ينَّا-ٱس: "مَاشِي مَعْقُوْل اَذ يتْوَاكّس وغْرُوْم ن يحنْجِيرن اَذ يمنْضَار إِ يقْزِينن."

²⁷ ثنَّا-ٱس ثمْغَارْث نِّي: "غَارك ڒْحَقّ آ سِيذِي، وَلَكِن ؤُڒَا ذ يقْزِينن نِّي تتّن يفتْوِيتّن ن ؤُغْرُوْم إِݣ يتْوطَّان زِي طَبْڒَا ن أَيثْبَاب نْسن."

²⁸ ئِكَّر عِيْسَى ينَّا-ٱس: "شم آ ثَمْغَارْث، لْإِيمَان نّمْ يجْهذ س وَاطَّاس!" ينَّا-ٱس: "مِين ثْرزُّوْذ اَذ تَافذ." ذِي ثْسَعَّات نِّي ثْݣنْفَا يدْجِيس.

سِيذِيثْنغ عِيْسَى يسشّ اَرْبعَاڒَاف ن يرْيَازن

²⁹ ئِبعّذ سّنِّي عِيْسَى، يُوْيُوْر خ شّطّ ن ڒبْحَر ن لْجَلِيل. ئِݣَعّذ غَار يِجّن ن وذْرَار يقِّيم ذِنِّي.

³⁰ ؤُسِين-د غَارس اَطَّاس ن ڒْغَاشِي. ؤُوِين-د اَكِذْسن يزحَّافن ذ يضَرْغَاڒن ذ يزيْنُوْنن ذ ينشْرُوْفن ذ وَاطَّاس ن يمهْڒَاش نّغْنِي. سرْسن-ثن غَار يضَارن نّس يسْݣنْفَا-ثن.

³¹ تْعجّْبن يِوْذَان نِّي وَامِي ࢲْرِين يزيْنُوْنن سَّاوَاڒن، ئِنشْرُوْفن ݣنْفَان، ئِزحَّافن ݣُّوْرن، ئِضَرْغَاڒن تْوَاڒَان. كَّرن حمْذن أَربِّـي ن أَيث-إِسْرَائِيل.

³² ئِڒَاغَا-د عِيْسَى إِ يمحْضَارن نّس ينَّا-ٱسن: "نش قّْسن-اَيِي يِوْذَان-أَ. ثڒْتِيَّام زݣ وَامِي اَقَاثن اَكِذِي وَار غَارْسن شَا مِين غَا شّن. وَار خْسغ شَا اَثن سّكّغ نِثْنِي وَار شِّين شَا حمَا وَار تسْخِيفّن خ وبْرِيذ."

³³ نَّان-اَس يمحْضَارن نّس: "ذِي ڒخْڒَا-يَا مَانِي غَا نَاف اَغْرُوْم إِي زِي غَا نْسشّ قَاع لْعَدَد-أَ ن يِوْذَان؟"

³⁴ ينَّا-ٱسن عِيْسَى: "شْحَاڒ غَارْوم ن وغْرُوْم؟" نَّان-اَس: "غَارْنغ سبْعَا ن ثشْنِيفِين ذ شَا ن يسڒْمَان ذ يمزْيَانن."

³⁵ يُوْمَر عِيْسَى ڒْغَاشِي اَذ قِّيمن ذِي ثْمُوْرْث.

³⁶ ئِطّف سبْعَا نِّي ن ثشْنِيفِين ذ يسڒْمَان نِّي، ئِشكَّر أَربِّـي. يرْزِي-ثن يُوْشِي-ثن إِ يمحْضَارن نّس، ئِمحْضَارن نّس فرْقن-ثن خ ڒْغَاشِي نِّي.

³⁷ مَارَّا شِّين جِّيْوْنن، شطّنْت سبْعَا ن ثقْرَابِين عمَّرنْت س يڒقُّوْزن.

³⁸ مَارَّا يرْيَازن نِّي إِݣ يشِّين نِثْنِي اَرْبعَاڒَاف إِذْسن بْڒَا ثِمْغَارِين بْڒَا يحنْجِيرن.

³⁹ وَامِي يمْسَافَاض خَاسن عِيْسَى خ ڒْغَاشي نِّي، ئِنْيَا ذݣ يِجّن ن ثْغَرَّابُوت يرُوْح غَار جْوَايه ن مَݣْدَلَى.