أَسڒْمذ ن سِيذِيثْنغ عِيْسَى لْكِتَاب ن مَتَّى 14 - ثريفيث 2020ڒْمُوْث ن سِيذْنَا يَحْيَى 1 ذِي ڒْوقْث نِّي اَزدْجِيذ هِيرُوْدُس يَارَّا-د ڒخْبَار خ عِيْسَى. 2 ينَّا-ٱسن إِ يخدَّامن نّس: "وَانِيتَا يعنِّي ذ يَحْيَى نِّي، ئِتْوَاسكَّر-د نتَّا زِي ڒْموْث! س مَانَايَا إِي غَارس جّْهذ إِي زِي يتݣّ لْمُعْجِزَاث-أَ." 3 قْبڒ إِ مَانَايَا، أَزدْجِيذ هِيرُوْدُس تُوْغَا يطّف يَحْيَى يشدّ-يث يݣِّي-ث ذِي ڒحْبس خ سَّبَاب ن هِيرُوْدِيَا ثَمْغَارْث ن وُوْمَاس فِيلِيپَّـاس. 4 ڒَاحقَّاش يقَّار-اَس يَحْيَى إِ وزدْجِيذ هِيرُوْدُس: "حْرَام شك اَذ تَاوِيذ ثَمْغَارْث ن وُوْمَاش." 5 أَزدْجِيذ هِيرُوْدُس يرزُّو اَذ ينغ يَحْيَى، وَلَكِن يݣّْوذ زِي شَّعْب ڒَاحقَّاش يَحْيَى تْوَاڒَان-ث ذ نَّبي. 6 وَامِي يݣَّا وزدْجِيذ هِيرُوْدُس ڒْعِيذ لْمِيلَاد نّس، ثكَّر يدْجِيس ن ثمْغَارْث نّس هِيرُوْدِيَا ثشْضح زَّاث إِ ينوْجِيْون، يعْجب-اَس ڒْحَاڒ إِ وزدْجِيذ هِيرُوْدُس. 7 خ مَانَايَا يجُّوْدْج ينَّا-ٱس تَّار-اَيِي مِين ثخْسذ، أَذَام ث ؤُشغ. 8 نتَّاث عْلَاحْسَاب مِين ذَاس ثْوصَّا يمَّاس، ثكَّر ثنَّا-ٱس إِ وزدْجِيذ هِيرُوْدُس: "ؤُش-اَيِي-د ذَا اَزدْجِيف ن يَحْيَى خ سِّنِيّث!" 9 ڒخْدّنِّي ينْدم وزدْجِيذ، وَلَكِن يوصَّا اَذَاس ث يُوْش ڒَاحقَّاش تُوْغَا يجُّوْدْج زَّاث إِ ينوْجِيْون ذِي ڒْفَارْح نّس. 10 ئِسّكّ غَار ڒحْبس ونِّي ذَاس غَا يقسّن اَزدْجِيف إِ يَحْيَى. 11 يُوْوِي-د اَزدْجِيف نّس ذِي سِّنِيّث يُوْشَا-ٱس-ث إِ ثْحنْجِيرْث نِّي، ثْرُوْح ثُوْوِي-يَاس-ث إِ يمَّاس. 12 كَّرن يمحْضَارن ن يَحْيَى ؤُسِين-د يْسِين دَّات نّس ݣِّين-ت ذݣ ونْضڒ. سّنِّي ؤُيُوْرن، خْبَرن عِيْسَى س مِين يوقْعن. سِيذِيثْنغ عِيْسَى يسشّ خمْسَاڒَاف ن يرْيَازن 13 وَامِي د يَارَّا عِيْسَى ڒخْبَار نِّي، ئِرُوْح سّنِّي وَاحْذس ذِي ثْغَرَّابُوْت غَار يِجّن ن ومْشَان يخْڒَا. أَرِّين-د ڒخْبَار ڒْغَاشِي، ذْفَارن-ث زِي ثْندَّام خ يضَارن. 14 وَامِي د يضْرَا عِيْسَى زِي ثْغَرَّابُوْت يُوْفَا قَاع اَنشْت نِّي ن يِوْذَان، قّْسن-اَس يسْݣنْفَا يمهْڒَاش نْسن. 15 وَامِي يعْذُو ڒْحَاڒ، قَارّْبن غَارس يمحْضَارن نّس نَّان-اَس: "ڒْوقْث ثعْذُو، أَمْشَان-أَ ذ ڒخْڒَا وَاهَا. سكّ يوْذَان-أَ غَار ڒدْشُوْرَاث بَاش اَذ د سْغن مِين غَا شّن." 16 ينَّا-ٱسن عِيْسَى: "مَايمِّي غَا رَاحن؟ ؤُشم-اَسن كنِّيو مِين غَا شّن." 17 نَّان-اَس يمحْضَارن نّس: "نشِّين غَارْنغ ذَا غِير خمْسَا ن ثْخبَّازِين ذ ثْنَاين يسڒْمَان." 18 ينَّا-ٱسن: "أَوِيم-اَيِي-د مَانَاينِّي غَارِي نش." 19 يُوْمَر ڒْغَاشِي نِّي اَذ قِّيمن خ اَرْبِيع. يطّف خمْسَا ن ثْخبَّازِين نِّي ذ ثْنَاين ن يسڒْمَان نِّي، ييْسِي ثِيطَّاوِين نّس غَار وجنَّا يشكَّر أَربِّـي. يرْزَا ثِخبَّازِين نِّي خ ثْنَاين يُوْشَا-ٱسن-ثنْت إِ يمحْضَارن نّس، ڒخْدّنِّي فرْقن-ثنْت خ يِوْذَان نِّي مَارَّا. 20 مَارَّا شِّين جِّيوْنن. كَّرن جمْعن مِين خَاسن يشطّن، ثنْعَاش ن ثقْرَابِين عمَّرنْت س يڒقُّوْزن. 21 لْعَدَد ن يِنِّي يشِّين نِثْنِي خمْسَاڒَاف ن يرْيَازن بْڒَا ثِمْغَارِين بْڒَا يحنْجِيرن. سِيذِيثْنغ عِيْسَى يݣُّوْر خ ڒمْوَاج ن ڒبْحَر 22 ڒخْدّنِّي يُوْمَر عِيْسَى يمحْضَارن نّس اَذ نْين ذِي ثْغَرَّابُوْت اَذ ࢲْوَان غَار وجمَّاض-ين ن ڒبْحَر، نتَّا يتمْسَافَاض خ ڒْغَاشِي. 23 وَامِي خَاسن يمْسَافَاض خ ڒْغَاشِى نِّي، يݣَعّذ غَار وذْرَار اَذ يࢲَّادْج ذِنِّي وَاحْذس. غَار ثْمدِّيث عَاذ اَقَاث ذِنِّي وَاحْذس. 24 ثَغَرَّابُوْت نِّي ثݣّْوج اَطَّاس زِي ڒْبَرّ، ڒمْوَاج تَاوِين-تث تَارَّان-تث ڒَاحقَّاش اَرِّيح يتْصُوْض-د زِي جِّهث نّغْنِي. 25 عْڒَاين يقَارّب-د ڒفْجَر، ئِرُوْح عِيْسَى غَار يمحْضَارن نّس يݣُّوْر خ يضَارن خ وَامَان ن ڒبْحَر. 26 وَامِي ث ؤُفِين يݣُّوْر خ يضَارن خ وَامَان ن ڒبْحَر، نْخڒْعن نَّان قَا وَانِيتَا ذ ڒخْيَاڒ! سْنكَّرن ثْغُويِّث س ثِيݣّْوْذِي. 27 ڒخْدّنِّي ينَّا-ٱسن عِيْسَى: "أَهْنَام! أَقَا ذ نش، وَار تݣّوْذم شَا!" 28 ينَّا-ٱس بُطْرُس: "آ سِيذِي مڒَا ذ شك، ڒَاغَا-ٱيِي-د اَغَارك د اَسغ خ وَامَان." 29 ينَّا-ٱس عِيْسَى: "أَرَاح-د!" ئِكَّر يهْوَا-د بُطْرُس زِي ثْغَرَّابُوْت يݣُّوْر خ يضَارن خ وَامَان غَار عِيْسَى. 30 وَلَكِن يݣّْوذ وَامِي يࢲْرَا اَرِّيح يتْصُوْض س جّْهذ. ئِبْذَا يغَرّق، يسْنكَّر ثْغُويِّث ينَّا: "آ سِيذِي، عْثق-ٱيِي!" 31 ڒخْدّنِّي يُوْشَا-ٱس عِيْسَى فُوْس نّس يطّف-يث ينَّا-ٱس: "لْإِيمَان نّش ذ وقْلِيل وَاهَا، مَايمِّي إِي ذَايِي ثْشكّذ؟" 32 صَافِي نْيَان ذِي ثْغَرَّابُوت يرْسَا اَرِّيح نِّي. 33 أُوشَا سجّْذن-اَس يِنِّي يدْجَان ذِي ثْغَرَّابُوْت نَّان: "ذ صَّح، شك ذ مِّيس ن أَربِّـي!" 34 وَامِي يزْوَا عِيْسَى نتَّا ذ يمحْضَارن نّس ڒبْحَر، ؤُوْضن غَار ثْمُوْرْث ن ݣَنِيسَارَت. 35 أَيثْبَاب ن ثْمُوْرْث نِّي ࢲْرِين عِيْسَى عقْڒن-ث. ڒخْدّنِّي سُوْفْغن ڒخْبَار ذِي مَارَّا ثْمُوْرْث نِّي، ؤُوِين-اَس-د يمهْڒَاش مَارَّا. 36 تَّارن-اَس اَثن يجّ اَذ حَاذَان غِير طّْارْف ن وَارُّوْض نّس. صَافِي مَارَّا يِنِّي ث يحَاذَان ݣنْفَان. |