لوقا 13 - ثريفيث 2020

سِيذِيثْنغ عِيْسَى يسَّاوَاڒ خ تُّوْبَا

¹ ذِي نْهَار نِّي حْضَارن-د شَان يِوْذَان خبَّرن عِيْسَى خ شَا ن يِوْذَان زِي أَيث-لْجَلِيل تُوْغَا غَرّْصن إِ دْبِيحَاث نْسن وَامِي د يُوْسَا لْحَاكم ذ اَرُوْمَانِي بِيلَاطُوْس ينْغِي-ثن، ئِذَامّن نْسن خلّْطن اَك يذَامّن ن دْبِيحَاث نْسن.

² يَارَّا خَاسن عِيْسَى ينَّا-ٱسن: "مَا ثْحسْبم ڒْمُعْصِيَاث ن يجَالِيلِيْين-أَ كْتَار زِي ڒْمُعْصِيَاث ن مَارَّا أَيث-لْجَلِيل وَامِي د تهْوَا خَاسن ڒْمُصِيبَا-يَا؟

³ قَّارغ-اَوم لَّا. مڒَا وَار ثتُوْبم شَا، أَتَاف مَارَّا إِذْوم اَذ تمّْثم اَمشْنَاو نِثْنِي.

⁴ نِغ ثْمنْطَاش نِّي إِي خف د توْضَا صُّوْمْعث ذِي حَاي-سِيلْوَام ثنْغِي-ثن، مَا تْغِير-اَوم بلِّي ݣِّين دُنُوْب كْتَار زِي مَارَّا يوْذَان يزدّْغن ذِي ثنْدِينْت ثكْمَاڒ ن لْقُدْس؟

⁵ قَّارغ-اَوم لَّا. مڒَا وَار ثْتُوْبم شَا، أَتَاف مَارَّا إِذْوم اَذ تمّْثم اَمشْنَاو نِثْنِي."

ڒْمَعْنَا ن ثْشجَّارْث ن ثَازَارْث وَار يتَارْون شَا

⁶ ئِسِّيوڒ اَكِذْسن س ڒْمَعْنَا-يَا ينَّا-ٱسن: "ئِجّن ن ورْيَاز غَارس ثَشجَّارْث ن ثَازَارْث ثࢲُّو ذِي ڒَعْرَاصِي نّس، يُوْسَا-د نتَّا اَزَّايس يڒْقذ ثَازَارْث يُوْفَا وَار ذَايس وَالُو قَاع.

⁷ ينَّا-ٱس إِ ونِّي يخدّْمن ڒَعْرَاصِي نّس: ثَشجَّارث-أَ ثڒْت سْنِين نش تَاسغ-د غَارس حمَا اَزَّايس ڒقْذغ ثَازَارْث وَار ذَايس تِيفغ وَالُو. أَرَاح-د قسّ-يت! مَايمِّي ت غَا نجّ اَذ تْضيّع ثَمُوْرْث وَاهَا؟

⁸ يَارَّا خَاس وخدَّام نِّي ينَّا-ٱس: آ سِيذِي، اجّ-يت غِير ڒْعَام-أَ وَاهَا اَخَاس نقْشغ اَذَاس ݣّغ ڒغْبَار.

⁹ مڒَا ثُوْرو-د ثَازَارْث ذݣ وسݣّْوَاس-أَ إِي د غَا يَاسن، أَتَاف مْلِيح. مڒَا عَاذ وَالُو، أَتَاف صَافِي قسّ-يت."

سِيذِيثْنغ عِيْسَى يسْݣنْفَا اَعْرُوْر إِ يِجّن ن ثمْغَارْث

¹⁰ تُوْغَا عِيْسَى يسڒْمَاذ ذݣ يِجّن ن ثمْزِيذَا ن أَيث-إِسْرَائِيل ذِي نْهَار ن سّبْث ن لْعِبَادَا.

¹¹ يُوْفَا ذِنِّي يجّن ن ثمْغَارْث ثْمنْطَاش يسݣّوُسَا زݣ وَامِي ثهْڒش ذَايس جّنّ، ثقْوس وَار ثْزمَّر شَا اَذ تْبدّ نِيشَان.

¹² وَامِي ت يࢲْرَا عِيْسَى يڒَاغَا-د خَاس ينَّا-ٱس: "آ ثَمْغَارْث، شم ڒخُّو ثنْفكّذ زِي ڒهْڒَاش نّم."

¹³ ئِسرْس خَاس يفَاسّن نّس ڒخْدّنِّي ثْبدّ نِيشَان ثبْذَا ثْحمّذ أَريِّي.

¹⁴ أَرَّايس ن ثمْزِيذَا نِّي وَار ذَاس يعْجِيب بُو ڒْحَاڒ وَامِي عِيْسَى يسْݣنْفَا ثَمْغَارْث نِّي ذِي نْهَار ن سّبْث ن لْعِبَادَا. ئِكَّر نتَّا ينَّا-ٱسن إِ يِوْذَان: "أَربِّـي يُوْشَا ستِّيَّام ن ڒْخذْمث ذِي ستِّيَّام نِّي إِي د غَا تَاسم اَذ تْݣنْفِيم، وَار يدْجِي بُو ذِي نْهَار ن لْعِبَادَا."

¹⁵ ينَّا-ٱس سِيذِيثْنغ: "آ لْمُنَافِقِين، مَا وَار ثْضدْجْقم شَا يفُوْنَاسن ذ يغْيَاڒ نْوم زِي ڒْكُوْرِي ذِي نْهَار ن لْعِبَادَا حمَا اَثن ثْسسّْوم؟

¹⁶ ثَمْغَارْث-أَ مسْكِينَا يدْجَان زِي دُّوْرِّيث ن بْرَاهِيم يحبّس-يت شِّيطَان ثْمنْطَاش يسݣّْوُسَا، مَا وَار ذَاس نْرزّم شَا زِي ڒحْبس-أَ ذِي نْهَار ن لْعِبَادَا مَا لَّا؟"

¹⁷ وَامِي ينَّا اَوَاڒ-أَ، مَارَّا يِنِّي اَكِذس يتْمنْغَان سذْحَان. ئِوْذَان نّغْنِي مَارَّا فَرْحن زِي ڒخْذَايم ثِمقّْرَانِين إِݣ يتݣّ.

سِيذِيثْنغ عِيْسَى يسَّاوَاڒ خ ڒْمُلْك ن أَربِّـي

¹⁸ ينَّا-ٱسن عِيْسَى: "مِينْذِي يتْشَابَّاه ڒْمُلْك ن أَربِّـي؟ نِغ س مِينْزِي غَا ث مثّْلغ؟

¹⁹ ڒْمُلْك ن أَربِّـي يݣَّا اَم يِجّن ن زَّرِّيعث ن يجّن ن نُّوْع ن اَرْبِيع قَّارن-اَس بُوْݣَرْذَاڒ. ئِيْسِي-ت يجّن ورْيَاز يُوْوِي-ت يࢲُّو-ت ذِي ڒْعَرْسث نّس. ثمْغَار ثْذوّڒ اَم ثْشجَّارْث، ئِجْضَاض تَاسن-د تݣّن ذَايس ڒَعْوَاش نْسن."

²⁰ ينَّا-ٱسن عَاوذ: "س مِينْزِي غَا مثّْلغ ڒْمُلْك ن أَربِّـي؟

²¹ نتَّا اَم ونْتُوْن ثيْسِي-ث يجّن ن ثمْغَارْث ثُوْݣّْوَا زَّايس ڒْمُوْدّ ن وَارن، اَنْتُوْن نِّي يسْݣَعّذ-يث-يد مَارَّا."

ثَوَّارْث ن ثُوْذَارْث

²² ئِكَّا عِيْسَى خ يبِيلَاجن ذ ڒدْشُوْرَاث، ئِسڒْمَاذ يݣُّوْر غَار ثنْدِينْت ن لْقُدْس.

²³ ئِسّقْسَا-ث يجّن ن ورْيَاز ينَّا-ٱس: "آ سِيذِي، مَا ذْرُوْس إِي غَا يرَاحن غَار ثُوْذَارْث ن ڒبْدَا؟" ينَّا-ٱس عِيْسَى:

²⁴ "ݣّث مَامْش غَا ثَاذْفم زِي ثوَّارْث يحْصَارن. أَذَاوم ينِيغ: أَطَّاس ن يِوْذَان اَتَاف اَذ رْزُوْن اَذ اَذْفن وَلَكِن وَار زمَّرن.

²⁵ بَاب ن ثدَّارْث اَذ يكَّر اَذ يبلّع ثَوَّارْث صَافِي. كنِّيو مڒَا ثقِّيمم غَار بَارَّا ثسْقرْقُوْبم ذِي ثوَّارْث ثقَّارم: آ سِيذِي، اَرْزم-اَنغ! أَذَاوم يِينِي: نش وَار سِّينغ شَا زِي مَانِيس د تُوْسِيم!

²⁶ سّنِّي اَذ تبْذَام اَذ تِينِيم: نشِّين نشَّا نسْوَا اَكِذش، تُوْغَا ثْسڒْمَاذذ-اَنغ ذݣ يبْرِيذن نّغ!

²⁷ أَذَاوم يِينِي: نش وَار سِّينغ شَا زِي مَانِيس د تُوْسِيم. بعّْذم خَافِي آ يِنِّي يتݣّن شَّرّْ!

²⁸ ذِنِّي إِي غَا يِيڒِين يمطَّاون ذ وغࢲَّاࢲ ن ثغْمَاس خْمِي غَا ثࢲرم بْرَاهِيم ذ إِسْحَاق ذ يَعْقُوْب ذ مَارَّا لأَنْبِيَا غَار ذَاخڒ ذِي ڒْمُلْك ن أَربِّـي، كنِّيو تْمنْضَارم غَار بَارَّا!

²⁹ أَذ د اَسن يِوْذَان زِي شَّرْق ذ ڒْغَرْب ذ شَّمَال ذ لْجَنُوْب، أَذ قِّيمن غَار مِيسَّا ذِي ڒْمُلْك ن أَريِّي.

³⁰ يِنِّي يدْجَان ذ ينݣُّوْرَا اَذ ذوْڒن ذ يمزْوُوْرَا؛ يِنِّي إِي يدْجَان ذ يمزْوُوْرَا اَذ ذوْڒن ذ ينݣُّوْرَا."

سِيذِيثْنغ عِيْسَى يخيّق خ ثنْدِينْت ن لْقُدْس

³¹ نْهَار نِّي قَارّْبن ڒبْعَاض زِي ڒْحِزب ن يفَرِّيسِيْين غَار عِيْسَى نَّان-اَس: "فّغ سَّانِيتَا اَقَا اَزدْجِيذ هِيرُوْدُس يرزُّو اَش ينغ!"

³² ينَّا-ٱسن عِيْسَى: "رُوْحث إِنِيم-اَس إِ وُوْشّن نِّي: قَا نش سُوْفُوْغغ جْنُوْن، سْݣنْفَايغ يوْذَان نْهَارَا ذ ثِيوشَّا. ذِي نْهَار وِيس ثڒْتِيَّام اَذ كمّْڒغ.

³³ وَلَكِن لَابُد اَذ ؤُيُوْرغ نْهَارَا ذ ثِيوشَّا ذ نْهَار إِي ثِيذ غَا يذْفَارن مِينْزِي وَار يزمَّر اَذ يمّث شَان نَّبِي إِلَّا ذِي ثنْدِينْت ن لْقُدْس.

³⁴ يَا لْقُدْس، يَا لْقُدْس! ذ شم إِݣ ينقّن لْأَنْبِيَا، ذ شم إِݣ يرجّْمن يِنِّي غَارم د يسّكّ أَربِّـي! نش مشْحَاڒ ن ثْوَاڒَاثِين خْسغ اَذ سْمُوْنغ ثَارْوَا نّمْ اَم شَان ثْيَازِيط يتحْبُوْبُوْضن خ يفِيدْجُوْسن نّس وَلَكِن كنِّيو ثُوْݣِيم.

³⁵ أَقَا ثَدَّارْث نْوم اَذ تخْڒَا! أَذَاوم ينِيغ بلِّي وَار ذَايِي ثْࢲرّم شَا عَاوذ حتَّا ٱر نْهَار نِّي إِي غَا ثِينِيم: سَّعْذ يَا ونِّي إِي د يُوسِين عْلَاحْسَاب يسم ن سِيذِي أَربِّـي."