ثبرات زي يهوذا 1 - ثريفيث 2020لْمُقَدِّيمَا 1 نش ذ يَهُوْذَا ذ اَخدَّام ن عِيْسَى لْمَسِيح، نش ذ ؤُمَاس ن يَعْقُوْب. تَارِيغ ثَبْرَات-أَ إِ يِنِّي إِي د يتْوَارَاغَان، ئِتْحِبَّا-ثن أَربِّـي بَابَاثْنغ، ئِحطَّا-ثن عِيْسَى لْمَسِيح. 2 أَذَايْوم ثْمَارْنِي اَرَّاحْمث ذ ڒهْنَا ذ ڒمْحِبّث س وَاطَّاس. لْعِقَاب خ يِنِّي يتَارَّان يخف نْسن ذ يمْسڒْمَاذن 3 آي يمْعِيزّن ينُو، تُوْغَا رْزُوْغ اَذَاوم اَرِيغ خ ؤُبْرِيذ نِّي إِي زِي نْنجّم نشِّين إِي ذِي نْشَرّش مَارَّا، وَلَكِن ؤُفِيغ أُو لَابُد اَذَاوم اَرِيغ طَّالَب-أَ حمَا اَذ تْمنْغم خ لْإِيمَان-أَ إِي زِي تْوَاكلّْفن صَّالِحِين ذݣ يِجّن ن ثْوَاڒَا إِ ڒبْدَا. 4 أَقَا شَا يثَرَّاسن ؤُذْفن-د جَارَاوم وَار ذَاسن د ثَارِّيم بُو ڒخْبَار، قَا لْعِقَاب نْسن يُوْرَا خَاس مشْحَاڒ زݣ وَامِي. يِيْنَا عصَّان أَربِّـي، سْعوَّاجن اَرْضَا نّس بَاش اَغَارْسن يِيڒِي اَم شَان ن تّسْرِيح ن شّهْوث. نكَّرن عِيْسَى لْمَسِيح إِي يدْجَان ذ مَوْلَانَا نّغ قَا نتَّا ذ سِيذِيثْنغ وَاحْذس. 5 وَاخَّا سّْنغ بلِّي ثسّْنم مَانَايَا، خْسغ اَكنِّيو سْفكَّرغ مْلِيح بلِّي سِيذِيثْنغ يفكّ شَّعْب نّس زِي مِصْرَا، وَلَكِن منْبَعْد يِنِّي وَار يُوْمِيْنن شَا يمْحَا-ثن قَاع. 6 أَمُّو عَاوذ يوقْعن إِ لْمَالَائِكَاث نِّي إِي يُوْݣِين اَذ قِّيمنْت ذِي لْمَرْطَابَا نْسنْت ن سُّلْطَا سمْحنْت عَاوذ ذِي ثْزدِّيغْث نْسنْت. مِين ذَاسنْت يݣَّا؟ ئِقّن-يثنْت س سْنَاسڒ نِّي وَار يفنِّين شَا عمَّارْص، ئِبلّع خَاسنْت ذݣ يِجّن ن ثَادْجسْت ذ ثَبرْشَانْت اَڒ لْعِقَاب ن نْهَار نِّي اَمقّْرَان. 7 أَمُّو عَاوذ إِي ݣِّين يمزْذَاغ ذِي ثنْدِينْت نِّي ن سَادُوْم ذ ثنْدِينْت نِّي ن عَمْمُوْرَا ذ يبِيلَاجن نِّي إِي ذَاسنْت-يد ينّضن. سلّْمن يخف نْسن إِ لْفَسَاد ذ شّهْوث نِّي مَاشِي طَّبِيعِي. يعْنِي نِثْنِي يݣِّي-ثن أَربِّي ذ لْعِبْرَا، تْوَاعَاقْبن س يِجّن ن لْعِقَاب ن ثْمسِّي وَار يفنِّين شَا عمَّارْص. 8 أَمُّو عَاوذ يثَرَّاسن-أَ. عْلَاحْسَاب ثِيْرْجَا نْسن سخْنَازن دَّات نْسن، نكَّرن سُّلْطَا، قَّارن اَوَاڒن وَار يحْڒِين خ لْمخْلُوْقَاث ن ؤُجنَّا. 9 وَلَكِن مِين يݣَّا لْمَلَاك اَمقّْرَان مِيْكَائِيل وَامِي يمْنغ اَك إِبْڒِيس يمْنَاقَر اَكِذس خ دَّات يمُّوْثن ن مُوْسَى؟ وَاخَّا ذ مِيْكَائِيل-أَ وَار يزْعِيم شَا اَذ يِينِي شَا ن وَاوَاڒ وَار يحْڒِين خ إِبْڒِيس، ينَّا-ٱس شك اَش ينْهَا سِيذِي أَربِّـي! 10 وَلَكِن يثَرَّاسن-أَ يِيْنَا سَّاوَاڒن س وَاوَاڒ وَار يحْڒِين خ مَارَّا مِين وَار فهّْمن شَا. ثِمسْڒَايِين-أَ ؤُمِي فهّْمن إِيوَا فهّْمن-ثنْت س طَّبِيعَا نْسن وَاهَا، نِثْنِي ݣِّين اَم ڒُوْحُوْش يقفْڒن. ثِمسْڒَايِين-أَ ذ نِثنْتِي إِي ثن غَا يمْحَان! 11 يَا ڒفْضِيحث نْسن! تبْعن اَبْرِيذ نِّي ن قَبِيل. سمْحن ذݣ يِيخف نْسن ضمْعن ذِي تْمنْيَاث ݣُّوْرن ذِي لْغَالط ن بَلْعَام. فْنَان ذِي لْحِرَاك نِّي ن قُرَاح وَامِي يعَارّض إِ مُوْسَى. 12 يثَرَّاسن-أَ يِيْنَا تْوسَّاخن يمنْسِيون نْوم ن ثمْعَاشَرْث. تتّن اَكِذْوم بْڒَا مَا ٱذ سذْحَان، نِثْنِي ݣِّين اَم شَا ن يمكْسَاون إِي عتّْقن يخف نْسن وَاهَا. نِثْنِي ذ يسيْنُوْثن بْڒَا يَانْࢲَار غِير يتَاوِي-ثن اَرِّيح يتَارَّا-ثن. نِثْنِي ݣِّين اَم ثْشجُّوْرَا ذِي ڒخْڒِيف وَار يتَارْون شَا، تْنقْڒَاعنْت-يد زݣ يࢲوْرَان نْسنْت؛ يعْنِي يبْرِيذن نْسنْت مُّوْثن س ثْنَاين. 13 نِثْنِي ݣِّين اَم ڒمْوَاج ن ڒبْحَر شَّاثنْت س ڒفْضِيحث ن ؤُكُوْفُّو نْسنْت. نِثْنِي ݣِّين اَم شَان يثْرَان يفّْغن زݣ ؤُمْشَان نْسن ݣُّوْرن غَار يِجّن ن ثَادْجسْت ذ ثَبرْشَانْت إِݣ يتْوَاسْوجْذن إِ ڒبْدَا ن ڒبْدَاث. 14 فَا أَخْنُوْخ ونِّي إِݣ يدْجَان ذ اَيَّاو ن آدَم زِي جدِّيثْوم وِيس سبْعَا نتَّا يعْڒم يجّن ن وَاوَاڒ زِي أَربِّـي ينَّا-ث خ يثَرَّاسن-أَ: "خْزَرث، أَقَا يُوْسَا-د سِيذِيثْنغ س وَاڒَاف ن ؤُڒُوْفَاث ن يمْقدّْسن نّس 15 أَذ يحَاسب مَارَّا يوْذَان. مَارَّا يِنِّي يعصَّان اَذَاسن د يسْمظْهَار مَارَّا ڒفْعَايڒ نْسن ثِعفَّانِين إِي ݣِّين ذݣ ؤُبْرِيذ نْسن اَعفَّان، أَذ سّْنن عَاوذ مَارَّا اَوَاڒن نِّي وَار يحْڒِين إِي خَاس نَّان يِنِّي يعصَّان وَار ذفَّارن شَا أَربِّـي." 16 شُوْف، يثَرَّاسن-أَ تْشثْشَان وَاهَا، تنْتَاقَاذن خ مِدّن، نِثْنِي ذفَّارن شّهَاوَاث نْسن ثِعفَّانِين؛ سمْغَارن يخف نْسن س ؤُقمُّوْم نْسن، تسْڒهَّان يوْذَان بَاش اَذ نفّْعن يخف نْسن. 17 فَا كنِّيو آي يمْعِيزّن ينُو، فكَّرث مِين تُوْغَا قَّارن زِي قْبڒ اَرُّسُل ن سِيذِيثْنغ عِيْسَى لْمَسِيح. 18 نَّان-اَوم: "ذِي ڒِيَّام نِّي ينݣُّوْرَا اَذ يڒِين مُجُوْدِين يِنِّي يذحّْشن خ يِوْذَان، ذفَّارن شّهَاوَاث نْسن ثِعفَّانِين وَاهَا." 19 إِيوَا نِثْنِي ذ يِيْنَا إِي كنِّيو يفَرّْقن، ذَايْسن اَرُّوْح ن دُّوشْت-أَ وَاهَا وَار ذَايْسن شَا أَرُّوْح يقدّْسن. 20 كنِّيو آي يمْعِيزّن ينُو، بْنَاث يخف نْوم ذِي دْسَاس ن لْإِيمَان يُوْعْڒَان إِي يدْجَان ذَايْوم، ࢲَادْجم س أَرُّوْح يقدّْسن. 21 ئِتْخصَّا اَذ تقِّيمم ذِي ڒمْحِبّث ن أَربِّـي اَذ تْرَاجَام اَرَّاحْمث نِّي ن سِيذِيثْنغ عِيْسَى لْمَسِيح ثنِّي إِي كنِّيو يتَاوِين غَار ثُوْذَارْث نِّي وَار يفنِّين شَا عمَّارْص. 22 سْخذْمث لْحَنَانَا اَك يِنِّي يتْشكَّان. 23 فكّث ينّغْنِي، جبْذم-ثن-د زِي ثْمسِّي. ئِنّغْنِي سْبِيّْنم-اَسن-د اَرَّاحْمث ثمْخلّط اَك ثِيْݣّْوْذِي يعْنِي اَذ تْعِيفّم ؤُڒَا ذ اَرُّوْض نْسن إِݣ يخنْزن س طَّبِيعَا نْسن ثَعفَّانْت. لْخِتَام ن ثبْرَات-أَ 24 فَا ونِّي يزمَّرن اَكنِّيو يحْضَا بَاش وَار تنْذْڒِيفم شَا، ئِزمَّر عَاوذ اَكنِّيو يقدّم غَار زَّاث نّس لْعَظِيم اَذ تِيڒِيم بْڒَا ڒْعِيب اَغَارْوم ثِيڒِي يجّن ن ڒفْرَاحث ذ ثَمقّْرَانْت، 25 يعْنِي أَربِّـي ونِّي يدْجَان وَاحْذس يسنْجَام-اَنغ. أَغَارس ثِيڒِي لْعَظَمَا ذ ثُوْعْڒَات ذ لْقُوَّا ذ سُّلْطَا س عِيْسَى لْمَسِيح سِيذِثْنغ يعْنِي قْبڒ إِ مَارَّا زْمَانَاث إِي يعْذُوْن أُو ذ ڒخُّو أُو ذ ڒبْدَا ن ڒبْدَاث. آمِين. |