ڒخذايم 25 - ثريفيث 2020أَرَّسُوْل بُوْلُس يتسْتَانَاف دَّعْوث نّس غَار لْمَلِك قَيْصَر 1 فَسْتُوْس نتَّا يذْوڒ ذ لْوَالِي ذِي لْإِقْلِيم. وَامِي ثعْذُو ثڒْتِيَّام يݣَعّذ زِي ثنْدِينْت نِّي ن قَيْصَارِيَا غَار ثنْدِينْت ن لْقُدْس. 2-3 أَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل قدّْمن-اَس تُّهْمَاث نْسن ضذ إِ بُوْلُس. حشّْمن-ث تَّارن زَّايس اَذَاسن يݣّ ڒْخَاضَر نْسن بَاش اَثِيذ يَاوِي غَار لْقُدْس وَلَكِن نِثْنِي وجّْذن-اَس إِ بُوْلُس بَاش اَث نْغن ذݣ وبْرِيذ نِّي. 4 ينَّا-ٱسن لْوَالِي قَا بُوْلُس اَقَاث ذِي ثنْدِينْت ن قَيْصَارِيَا ذ اَمحْبُوْس، ڒخُّو نش اَذ ذوْڒغ ذِنِّي. 5 أُو لَابُد اَكِذِي رَاحن زَّايْوم ڒبْعَاض ن يمقّْرَانن نْوم. مڒَا يخْضَا ورْيَاز نِّي ذِي شَان ڒْحَاجث، قدّْمم-اَيِي-د تُّهْمَاث إِي غَارْوم ضذ نّس ذِنِّي. 6 ئِقِّيم فَسْتُوْس ذِي لْقُدْس مَا ثْمنييَّام مَا عشْرييَّام، منْبَعْد يهْوَا غَار قَيْصَارِيَا. ثِيوشَّا نّس، يݣَّا لْجلْسَا ذِي لْمَحْكَامَا يُوْمَر اَذَاس د اَوِين بُوْلُس. 7 وَامِي د يحْضَار ذِنِّي، مُوْنن-د خَاس يسْرَائِيلِيْين نِّي إي د يُوْسِين زِي لْقُدْس. تَاهَامن-ث س وَاطَّاس ن ثْمسْڒَايِين إِي وْعَارنْت وَلَكِن وَار غَارْسن بُو دَّلِيل. 8 ئِبْذَا بُوْلُس يتْذَافَاع خ يِيخف نّس ينَّا: "نش وَار خْضِيغ شَا ذِي مَانَاينِّي، نِغ ذِي شَّرِيعَا ن أَيث-إِسْرَائِيل نِغ ذِي ثمْزِيذَا ثَمقّْرَانْت نِغ ذِي لْمَلِك قَيْصَر." 9 وَلَكِن لْوَالِي فَسْتُوْس يرزُّو اَذ يݣّ ڒْخَاضَر إِ أَيث-إِسْرَائِيل أُوْشَا ينَّا-ٱس إِ بُوْلُس: "مَا ثخْسذ اَذ تْݣَعّْذذ غَار ثنْدِينْت ن لْقُدْس اَخَاك حكْمغ ذِنِّي نش خ تُّهْمَاث-أَ؟" 10 ينَّا-ٱس بُوْلُس: "نش اَقَايِي بدّغ ذِي لْمَحْكَامَا-يَا ن لْمَلِك قَيْصَر، ئِتْخصَّا ذَا إِي غَا تْوَاحَاكْمغ. قَا أَيث-إِسْرَائِيل وَار ذَايْسن خْضِيغ شَا، مَامّش ثسّْنذ شك. 11 مڒَا خْضِيغ يعْنِي ݣِّيغ شَان ڒْحَاجث سْذَاهدْجغ خَاس ڒْموْث وَار زمَّرغ اَزَّايس اَروْڒغ. وَلَكِن مڒَا تُّهْمَاث-أَ إِي خَافِي قدّْمن وَار دْجِينْت شَا ذ صَّح، ؤُڒَا ذ يجّن مَا غَارس ڒْحَقّ اَذَايي يسلّم إِ نِثْنِي. نش تسْتَانَافغ دَّعْوث ينُو غَار لْمَلِك قَيْصَر." 12 لْوَالِي فَسْتُوْس يسِّيوڒ اَك يمْشَاوَارن نّس أُوْشَا ينَّا-ٱس إِ بُوْلُس: "مڒَا شك دَّعْوث نّش ثسْتَانْفذ-ت غَار قَيْصَر، قَا غَار قَيْصَر إِي غَار غَا ثْرَاحذ." فَسْتُوْس يسَّاوَاڒ اَك ؤُزدْجِيذ أَغْرِيبَاس خ لْقَضِيَا ن بُوْلُس 13 عْذُوْن ڒبْعَاض ن وُوْسَّان، يُوْسَا-د وزدْجِيذ أَغْرِيبَاس اَكِذس وتْشْمَاس بْرِيْنْكَا غَار ثنْدِينْت ن قَيْصَارِيَا بَاش اَذ سدْجْمن خ لْوَالِي فَسْتُوْس. 14 وَامِي ذِنِّي إِي قِّيمن اَطَّاس ن وُوْسَّان، ئِسِّيوڒ فَسْتُوْس اَك وزدْجِيذ خ لْقَضِيَا ن بُوْلُس. ينَّا-ٱس: "ذَانِيتَا يجّن ن ورْيَاز يجِّي-ث فِيلِيكْس ذ اَمحْبُوْس. 15 وَامِي رُوْحغ نش غَار لْقُدْس قدّْمن-اَيِي-د تُّهْمَاث اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل، تَّارن زَّايِي اَخَاس حكْمغ خ لْمُجْرِيم. 16 نِّيغ-اَسن: عْلَاحْسَاب لْعَادَا ن اَرُّوْمَانُوْس وَار تْسلِّيمن حَدّ حتَّا ٱذ يمْقَابَاڒ اَك يِنِّي إِي خَاس يݣِّين تُّهْمَا، أَغَارس ثِيڒِي لْفُرْصَا اَذ يذَافع خ يِيخف نّس. 17 إِذن، ثِيوشَّا نّس مُوْنن-د ذَانِيتَا قَا ݣِّيغ لْجلْسَا نّس ذِي لْمَحْكَامَا. تُوْغَا وَار عطَّاڒغ شَا، ؤُمَرغ بَاش اَثِيذ اَوِين. 18 كَّرن سِّيوْڒن ينِّي خَاس يقدّْمن تُّهْمَاث، ؤُفِيغ تُّهْمَاث نِّي إِي ݣِّين ضذ إِ بُوْلُس وَار دْجِينْت شَا ذ شَان لْجَرِيمَاث إِي تُوْغَا خْسغ اَذ سّْنغ نش. 19 لَّا، منْغن اَكِذس خ شَان ثْمسْڒَايِين ذِي دِّين نْسن ذ يِجّن ن ورْيَاز قَّارن-اَس عِيْسَى، قَا يمُّوْث وَلَكِن بُوْلُس يقَّار لَّا نتَّا يدَّر! 20 وَامِي ودَّرغ نش وَار ؤُفِيغ مَامّش غَا بحْثغ ذِي ثْمسْڒَايِين-أَ، نِّيغ-اَس إِ بُوْلُس: مَا ٱذ تْرَاحذ غَار لْقُدْس اَخَاك حكْمغ ذِنِّي خ تُّهْمَاث-أَ؟ 21 بُوْلُس يُوْݣِي، ئِكَّر يسْتَانف دَّعْوث نّس غَار قَيْصَر. ؤُمَرغ نش اَذ يقِّيم ذ اَمحْبُوْس اَڒ ث غَا سّكّغ إِ لْمَلِك قَيْصَر." 22 ينَّا-ٱس وزدْجِيذ أَغْرِيبَاس إِ فَسْتُوْس: "نش س يِيخف ينُو خْسغ اَذاس صنّْطغ إِ ورْيَاز-أَ." ينَّا-ٱس فَسْتُوْس: "ثِيوشَّا اَذَاس ثْصنّْطذ." أَرَّسُوْل بُوْلُس زَّاث إِ وزدْجِيذ أَغْرِيبَاس 23 ثِيوشَّا نّس، وَامِي د يُوْسَا وزدْجِيذ أَغْرِيبَاس ذ بْرِيْنْكَا س يجّن ن شَّان ذ اَمقّْرَان، ؤُذْفن غَار وخَّام ذ اَمقّْرَان ن ويْرَاو اَكِذس اَرُّوْيَاس ن ڒْعَسْكَار ن اَرُّوْمَانُوْس ذ يمقّْرَانن ن ثنْدِينْت. ڒخْدّنِّي يُوْمَر فَسْتُوْس ؤُوِين-د بُوْلُس. 24 ينَّا فَسْتُوْس: "آ سِي اَزدْجِيذ أَغْرِيبَاس ذ يرْيَازن يحْضَارن اَكِذْنغ مَارَّا! أَقَا تْوَاڒَام اَرْيَاز-أَ زَّاثْوم خَاس إِي ذَايِي قدّْمن تُّهْمَاث مَارَّا لْأُمَّا ن أَيث-إِسْرَائِيل ذِي لْقُدْس ؤُڒَا ذَانِيتَا ذِي قَيْصَارِيَا. سْنكَّرن خَاس ثْغُوْيّث قَّارن لَابُد وَانِيتَا وَار يتْغِيمِي شَا عَاذ اَذ يدَّر! 25 نش وَار خَاس ؤُفِيغ بُو شَان ڒْحَاجث يسْذَاهدْج خَاس ڒْموْث. وَامِي يسْتَانف دَّعْوث نّس غَار لْمَلِك قَيْصَر، خْسغ اَغَارس ث سّكّغ. 26 وَلَكِن نش وَار خَاس ؤُفِيغ بُو شَان ن تُّهْمَا نِيشَان حمَا اَذَاس ت اَرِيغ إِ سِي لْمَلِك قَيْصَر. س مَانَايَا سحْضَارغ-ث-يذ زَّاثْوم، خَاصَّتَن شك آ سِي اَزدْجِيذ أَغْرِيبَاس، بَاش مڒَا ثݣِّيم-اَس لْإِسْتِجْوَاب اَذ سّْنغ مِين خَاس غَا اَرِيغ. 27 نش تْوَاڒِيغ مَاشِي مَعْقُوْل اَذ سّكّغ شَان ومحْبُوْس بْڒَا مَا ٱذ اَرِيغ تُّهْمَاث إِي خَاس قدّْمن." |