1 أيث-كورينث 15 - ثريفيث 2020

لْقِيَامَا ن لْمَسِيح

¹ فَا آي أَيثْمَا اَكنِّيو سْفكَّرغ خ لْإِنْجِيل إِي زِي كنِّيو بشَّرغ، يعْنِي نتَّا ثْقبْڒم-ث أُو مْتبْثِين خَاس.

² أَقَا ثْنجّْمم زَّايس وَامِي ذَايس تطّْفم مْلِيح ذݣ وَاوَاڒ ن تّبْشِير نِّي ونِّي إِي زِي كنِّيو بشَّرغ. مڒَا لَّا، زَعْمَا لْإِيمَان نْوم ثسْبطّْڒم-ث.

³ شُوْف، سِيْوْضغ-اَوم-د مَانَاينِّي يدْجَان مُهِم تُوْغَا قبْڒغ-ث نش س يِيخف ينُو، يعْنِي لْمَسِيح يمُّوْث عْلَاحْسَاب ڒْمُعْصِيَاث نّغ مَامّش يقَّار لْكِتَاب.

⁴ ثُمَّا يتْوَانْضڒ، ثُمَّا يتْوَاسْنكَّار-د ذݣ وَاسّ وِيس ثڒْتِيَّام مَامّش يقَّار لْكِتَاب.

⁵ ثُمَّا يمظْهَار-اَس-د إِ بُطْرُس، سّنِّي يمظْهَار-اَسن-د إِ ثنْعَاش نِّي ن اَرُّسُل.

⁶ منْبَعْد يمظْهَار-اَسن-د إِ كْتَار زِي خمْسْمِيَّا ن وَاوْمَاثن ذِي ثْوَاڒَا ذ يشْتن. نِثْنِي عَاذ دَّرن عْڒَاين مَارَّا إِذْسن، ڒبْعَاض زَّايْسن اَقَا طّْصن يعْنِي مُّوْثن.

⁷ ثُمَّا يمظْهَار-اَس-د إِ يَعْقُوْب، منْبَعْد إِ مَارَّا اَرُّسُل.

⁸ غَار ونݣَّارُو قَاع يمظْهَار-اَيِي-د إِ نش، اَخْمِي نش عظْڒغ وَار د خْڒِيقغ شَا ذِي زْمَان ينُو نِيشَان.

⁹ أَقَا نش ذ اَمزْيَان قَاع ذِي اَرُّسُل. وَار سْذِيهِيدْجغ شَا اَذَايِي ڒَاغَان اَرَّسُوْل ڒَاحقَّاش تُوْغَا نش تْعدَّابغ جْمَاعث ن ڒْمُوْمِنِين.

¹⁰ وَلَكِن نش س اَرْضَا ن أَربِّـي ذوْڒغ مَامّش دْجِيغ ڒخُّو. ثُمَّا اَرْضَا نّس وَار يدْجِي بُو خَافِي س بْڒَا نّْفَع؛ لَّا، نش شَّاثغ تَمَارَا كْتَار زَّايْسن مَارَّا. مَاشِي ذ نش زَعْمَا؛ لَّا، ذ اَرْضَا ن أَربِّـي إِي كِذِي.

¹¹ فَلِهَاذَا وَاخَّا ذ نش نِغ ذ نِثْنِي، ذ وَانِيتَا ذ تّبْشِير إِي زِي نتْبشَّار سّنِّي كنِّيو ثُوْمْنم زَّايس.

لْقِيَامَا ن يمتِّينن

¹² فَا لْمَسِيح نتْبشَّار خَاس يتْوَاسكَّر-د زِي ڒْموْث. مَامّش قَّارن ڒبْعَاض زَّايْوم وَار ثدْجِي بُو لْقِيَامَا ن يمتِّينن؟

¹³ مڒَا وَالُو لْقِيَامَا ن يمتِّينن، ؤُڒَا ذ لْمَسِيح وَار د يتْوَاسكَّر شَا.

¹⁴ مَعْلِيك وَار د يتْوَاسكَّر شَا لْمَسِيح، إِڒِي تّبْشِير نّغ ذ ڒْبَاطڒ وَاهَا، إِڒِي كنِّيو لْإِيمَان نْوم ؤُڒَا ذ نتَّا ذ ڒْبَاطڒ.

¹⁵ مَعْلِيك اَمنِّي، إِڒِي نُوْفَا يخف نّغ نْشهّذ ࢲُّوْر خ أَربِّـي. مَايمِّي؟ ڒَاحقَّاش نشْهذ خ أَربِّـي بلِّي يسكَّر-د لْمَسِيح زِي ڒْموْث. وَلَكِن مَعْلِيك وَار تِيڒِي بُو لْقِيَامَا ن يمتِّينن، إِڒِي أَربِّـي زَعْمَا وَار د يسكَّر شَا لْمَسِيح زِي ڒْموْث.

¹⁶ شُوْف، مَعْلِيك يمتِّينن وَار د تْوَاسْنكَّرن شَا، إِڒِي لْمَسِيح زَعْمَا وَار د يتْوَاسكَّر شَا ؤُڒَا ذ نتَّا.

¹⁷ مَعْلِيك وَار د يتْوَاسكَّر شَا لْمَسِيح، إِڒِي كنِّيو زَعْمَا لْإِيمَان نْوم ذ ڒْبَاطڒ وَاهَا، إِڒِي عَاذ اَقَا كنِّيو ذِي ڒْمُعْصِيَاث نْوم.

¹⁸ مَعْلِيك اَمنِّي، إِڒِي يِنِّي يطّْصن يعْنِي يِنِّي يمُّوْثن ذِي لْمَسِيح زَعْمَا صَافِي قَا فْنَان.

¹⁹ مَعْلِيك نݣَّا لْأَمَال نّغ ذِي لْمَسِيح عْلَاحْسَاب ثُوْذَارْث-أَ ثَانِيتَا وَاهَا، إِڒِي س مَانَايَا نتْزِيدْجِيز إِ يِوْذَان زَعْمَا كْتَار زݣ يِوْذَان مَارَّا.

²⁰ فَا اَقَا ڒخُّو لْمَسِيح يتْوَاسكَّر-د زِي ڒْموْث، يعْنِي نتَّا ذ ثَفدْجَاحْث ثَمزْوَارُوْت إِي د يكَّرن زݣ يِنِّي يمُّوْثن.

²¹ شُوْف، س يِجّن ن بْنَاذم آدَم ثُوْسَا-د زَّايس ڒْموْث. س يِجّن ن بْنَاذم عَاوذ ثُوْسَا-د زَّايس لْقِيَامَا ن يمتِّينن.

²² ڒَاحقَّاش اَم مَامّش إِي غَا نمّث مَارَّا س بْنَاذم نِّي آدَم، أَمُّو عَاوذ اَغَارْنغ ثِيڒِي ثُوْذَارْث إِ مَارَّا نشِّين س لْمَسِيح.

²³ وَلَكِن كُڒ يجّن نُّوْبث نّس: لْمَسِيح نتَّا ذ ثَفدْجَاحْث ثَمزْوَارُوْت. خْمِي د غَا يعْقب نتَّا، أَذ د تَاس نُّوْبث ن يِنِّي يدْجَان زَّايس نتَّا.

²⁴ ثُمَّا اَذ يِيڒِي ڒفْنَا ن دُّنشْت-أَ. لْمَسِيح اَذ يقْضَا خ مَارَّا ڒحْكَام ذ ڒْمخْزن ذ جّْهذ إِݣ يدْجَان، ثُمَّا اَذ يجّ ڒحْكَام نِّي نّس إِ أَربِّـي بَابَاس.

²⁵ أَقَا يتْخصَّا اَذ يحْكم لْمَسِيح اَڒ غَا يݣّ أَربِّـي مَارَّا ڒْعَذْيَان نّس سْوَادَّاي ن سُّلْطَا ن يضَارن نّس.

²⁶ ڒَعْذُو اَنݣَّارُو إِي غَا يبطَّڒ نتَّاث ذ ڒْموْث.

²⁷ أَقَا أَربِّـي يݣَّا مَارَّا ثِمسْڒَايِين سْوَادَّاي إِ سُّلْطَا ن يضَارن ن لْمَسِيح. وَلَكِن خْمِي يقَّار قَا مَارَّا ثِمسْڒَايِين تْوَاݣّنْت سْوَادَّاي نّس، نسّن بلِّي أَربِّـي وَار يدْجِي بُو جَار ن ثْمسْڒَايِين نِّي ڒَاحقَّاش أَربِّـي س يِيخف نّس نتَّا إِݣ يݣِّين مَارَّا ثِمسْڒَايِين نِّي سْوَادَّاي ن سُّلْطَا ن لْمَسِيح.

²⁸ خْمِي غَا يڒِينْت مَارَّا ثِمسْڒَايِين-أَ سْوَادَّاي ن سُّلْطَا ن لْمَسِيح، ثُمَّا مِّيس يعْنِي لْمَسِيح س يِيخف نّس اَذ يذْوڒ ؤُڒَا ذ نتَّا سْوَادَّاي ن سُّلْطَا ن أَربِّـي إِݣ يݣِّين مَارَّا ثِمسْڒَايِين-أَ سْوَادَّاي ن سُّلْطَا ن لْمَسِيح. أَمُّو اَذ يِيڒِي أَربِّـي ذ مَارَّا ذِي مِين ذِي مَا.

²⁹ شُوْف، يِنِّي يتْوَاطهَّارن س وَامَان عْلَاحْسَاب إِ يِنِّي يمُّوْثن، مَان نّْفَع إِي رزُّوْن نِثْنِي؟ مڒَا ذ صَّح زَعْمَا بلِّي يِنِّي يمُّوْثن وَار د تْوَاسْنكَّارن شَا، مَايمِّي يوْذَان-أَ تتْوَاطهَّارن س وَامَان عْلَاحْسَاب إِ يِنِّي يمُّوْثن؟

³⁰ ئِي نش، مَايمِّي دْجِيغ ذِي لْخَطَر كُڒ ثْسَعَّات؟

³¹ آي أَيثْمَا، تْوَاجَاهغ ڒْموْث كُڒ نْهَار! قَّارغ-اَوم مَانَايَا س لْإِفْتِخَار-أَ إِي غَارِي ذَايْوم عْلَاحْسَاب ثُوْذَارْث-أَ نّغ إِي غَارْنغ ذ يْشْتن اَك سِيذِيثْنغ عِيْسَى لْمَسِيح.

³² نش مڒَا عْلَاحْسَاب ثِمسْڒَايِين ن دُّنشْت-أَ وَاهَا، مَايمِّي منْغغ اَك ڒُوْحُوْش ذِي ثنْدِينْت ن ؤُفَسُوْس؟ مِين غَا ربْحغ؟ ئِمتِّينن، مڒَا وَار د تْنكَّارن شَا زِي ڒْموْث، ئِي مَايمِّي؟ "يَالَّاه أَ نشّث أَ نسْوث، قَا ثِيوشَّا أَ نمّث."

³³ وَار خدّْعث شَا يخف نْوم: "ثَمْعَاشَارث ثَعفَّانْت، تْضيَّاع تَّرْبِيَا ثَصبْحَانْت."

³⁴ أَرّم-د ڒْبَاڒ نْوم، وَار عصَّاث شَا. قَّارغ-اَوم مَانَايَا بَاش اَذ تْسذْحَام مِينْزِي ڒبْعَاض زَّايْوم ذَايْسن ڒقْفَاڒث خ أَربِّـي.

دَّات نِّي إِي غَارْنغ غَا يِيڒِين ذِي لْقِيَامَا

³⁵ وَلَكِن يجّن اَذ يِينِي: ئِمتِّينن، مَامّش غَا ݣّن اَذ د كَّرن؟ مَان صِّفث إِي زِي د غَا ذوْڒن؟

³⁶ آ ونِّي وَار يفْهِيمن، ثَحبُّوْيْث نِّي إِي ثْزرّْعذ اَذ تمّث زَعْمَا سْوَادَّاي ن وشَاڒ، منْبَعْد اَذ تغْمِي.

³⁷ أُو ثنِّي ثْزرّْعذ شك نتَّاث وَار ثدْجِي بُو ذ صِّفث نِّي إِي د غَا يغْمِين. لَّا، ثْزرّْعذ غِير يجّن ن ثْحبُّوْيْث وَاهَا ن زَّرِّيعث ن يِرْذَان نِغ ذ شَا ن زَّرِّيعث نّغْنِي.

³⁸ ثُمَّا يتِيشّ-اَس أَربِّـي يجّن ن صِّفث إِي غَا يخْضَر نتَّا. كُڒ نُّوْع ن زَّرِّيعث يتِيشّ-اَس صِّفث نّس وَاحْذس.

³⁹ أَيْسُوْم عَاوذ وَار يدْجِي بُو مَارَّا كِيف-كِيف. يرْيَازن غَارْسن يجّن ن نُّوْع ن ويْسُوْم وَاحذْسن، لْحَيَوَانَاث وَاحذْسن، ئِجْضَاض يجّن ن نُّوْع وَاحذْسن، ئِسڒْمَان عَاوذ وَاحذْسن.

⁴⁰ عَاوذ ذِنِّي صِّفَاث ن ثْمسْڒَايِين إِي يدْجَان ذݣ وجنَّا. عَاوذ ذِنِّي صِّفَاث ن ثْمسْڒَايِين إِي يدْجَان ذِي ثْمُوْرْث. أَشعْشع ن مِين يدْجَان ذݣ وجنَّا نتَّا ذ يجّن ن نُّوْع. أَشعْشع ن مِين يدْجَان ذِي ثْمُوْرْث نتَّا ذ يجّن ن نُّوْع.

⁴¹ ثْفُوْشْت غَارس نُّوْع ن وشعْشع نّس وَاحْذس. ثَزِيرِي غَارس نُّوْع ن وشعْشع نّس وَاحْذس. ئِثْرَان نُّوْع ن وشعْشع نْسن وَاحذْسن. كُڒ يثْرِي عَاوذ ذ اَشعْشع نّس وَاحْذس.

⁴² أَمُّو إِي تِيڒِي لْقِيَامَا ن يمتِّينن، مِين يتْوَازرّْعن اَذ يفْنَا. مِين د يتْوَاسْنكَّرن اَذ يذُوْم.

⁴³ دَّات تْوَازرّع ذِي ڒفْضِيحث، تْوَاسْنكَّر-د ذِي شّنْعث. تْوَازرّع ذِي ضُّعف، تْوَاسْنكَّر-د ذِي جّْهذ.

⁴⁴ تْوَازرّع ذ يجّن ن دَّات ن بْنَاذم، تْوَاسْنكَّار-د ذ يجّن ن دَّات رُوْحِيَا. مڒَا ثدْجَا دَّات ن بْنَاذم، ثدْجَا عَاوذ دَّات رُوْحِيَا.

⁴⁵ أَمُّو يقَّار لْكِتَاب: "بْنَاذم اَمزْوَارُو يعْنِي آدَم يذْوڒ ذ بُوْحْبڒ يدَّرن." آدَم اَنݣَّارُو نتَّا ذ بُوْحْبڒ يسدَّرن.

⁴⁶ مِين يدْجَان رُوْحِيَا وَار د يتِيس شَا ذ اَمزْوَارُو؛ لَّا، ئِتَاس-د مِين يدْجَان ن بْنَاذم. مِين يدْجَان رُوْحِيَا يتَاس-د منْبَعْد.

⁴⁷ بْنَاذم اَمزْوَارُو يتْوَاصنَّع زݣ وشَاڒ ن ثْمُوْرْث، بْنَاذم وِيس ثْنَاين يُوْسَا-د زݣ وجنَّا.

⁴⁸ مَامّش إِي يدْجَا بْنَاذم نِّي يتْوَاصنّْعن زݣ وشَاڒ، أَمنِّي عَاوذ إِي دْجَان يِوْذَان يتْوَاصنَّاعن زݣ وشَاڒ. وَا مَامّش إِي يدْجَا بْنَاذم نِّي ن وجنَّا، أَمنِّي عَاوذ إِي دْجَان يِوْذَان ن وجنَّا.

⁴⁹ مَامّش نتْشَابَّاه ذِي صِّفث ن ونِّي يتْوَاصنّْعن زݣ وشَاڒ، أَمنِّي عَاوذ إِي غَا نْشَابَّاه ذِي صِّفث ن ونِّي زݣ وجنَّا.

⁵⁰ فَا قَّارغ-اَوم آي أَيثْمَا، قَا اَيْسُوْم ذ يذَامّن وَار زمَّرن اَذ وَارْثن ذِي ڒْمُلْك وجنَّا. مِين يفنَّان وَار يوَارّث شَا مِين وَار يفنِّين.

^51-52 أَقَا قَّارغ-اَوم يجّن ن ثْمسْڒَايْث ڒْمَعْنَا نّس ينُوْفَّرن: قَا وَار نتْمتِّي شَا س مَارَّا إِذْنغ. خْمِي غَا يصُوْض زَّامَّار اَنݣَّارُو اَتَاف أَ نْبدّڒ مَارَّا إِذْنغ ذِي صِّفث نّغْنِي. مَانَايَا اَذ يِيڒِي ذغْيَا ذݣ يِجّن ن وَارْمَاش ن ثِيطّ. أَذ يصُوْض زَّامَّار نِّي ثُمَّا اَذ د تْوَاسْنكَّرن يمتِّينن يعْنِي اَذ دُوْمَان إِ ڒبْدَا أَ نِيڒِي نْبدّڒ ذِي صِّفث نّغْنِي.

⁵³ شُوْف، مِين يفنَّان يتْخصَّا اَذ يغْمس س مِين وَار يفنِّين، ذ مِين يتْمتَّان يتْخصَّا اَذ يغْمس س مِين وَار يتْمتِّين.

⁵⁴ مِين يفنَّان خْمِي غَا يغْمس س مِين وَار يفنِّين، ذ مِين يتْمتَّان خْمِي غَا يغْمس س مِين وَار يتْمتِّين، ڒخْدّنِّي اَذ د يفّغ مِين يُوْرِين ذِي لْكِتَاب: <ڒْموْث يسغْڒي-ت اَرْبَاح.>

⁵⁵ <هِيوَا شم آ ڒْموْث، أَرْبَاح نّمْ مَانِي يدْجَا؟ هِيوَا شم آ ڒْموْث، ثِيقّسْت نّمْ مَانِي ثدْجَا؟>

⁵⁶ أَقَا ڒْموْث ثِيقّسْت نّس تَاس-د زِي ڒْمُعْصِيّث. قَا ڒْمُعْصِيّث ثِزمَّار نّس تَاس-د زِي شَّرِيعَا.

⁵⁷ نشِّين أَ نحْمذ أَربِّـي! نتَّا يتِيشّ-اَنغ-د بَاش أَ نرْبح س سِيذِيثْنغ عِيْسَى لْمَسِيح.

⁵⁸ س مَانَايَا آي أَيثْمَا يمْعِيزّن ينُو، بدّث نِيشَان مَاشِي اَكنِّيو سنْهزّن. ݣّث لْمجْهُوْد نْوم ڒبْدَا ذِي ڒْخذْمث ن سِيذِيثْنغ، قَا ثسّْنم بلِّي ڒْخذْمث نْوم ذِي سِيذِيثْنغ مَاشِي ذ ڒْبَاطڒ.