1 أيث-كورينث 13 - ثريفيث 2020

ئِزْڒِي خ وبْرِيذ إِي يُوْعْڒَان قَاع خ مَارَّا

¹ مَعْلِيك سَّاوَاڒغ س يِيڒسَاون ن يثَرَّاسن س لُّغَا، مَعْلِيك سَّاوَاڒغ س لُّغَا ن لْمَلَائِكَاث يعْنِي رُوْحِيَا، مَاشَا ڒمْحِبّث وَار ذَايِـي تِيڒِي شَا، إِڒِي تْسدَّاعغ اَم يِج ن دَرْبُوْݣَا، تمْقرْقَابغ اَم ڒقْرَاقب وَاهَا.

² نش مَعْلِيك غَارِي لْقُدْرَا اَذ سِّيوْڒغ اَم لْأَنْبِيَا، مَعْلِيك فهْمغ مَارَّا مِين ينُوْفَّرن ذ مَارَّا ثُوْسْنَا، مَعْلِيك سْخدَّامغ لْإِيمَان اَذ سْمُوْتِّيغ يذُوْرَار-أَ، إِڒِي ذ وَالُو إِي دْجِيغ نش مڒَا وَار تْحِبِّيغ شَا.

³ نش مَعْلِيك صدّْقغ مَارَّا مِين غَارِي ذ اَݣْڒَا، مَعْلِيك سلّْمغ يخف ينُو اَذ سْحرْقن دَّات-أَ، إِڒِي نش وَار ربْحغ وَالُو مڒَا وَار تْحِبِّيغ شَا.

⁴ ڒمْحِبّث ذَايس تِّسَاع ن ڒْخَاضَر، ذَايس يج ن لْحَنَانَا. نتَّاث وَار تفْتَخَر وَار ثْحسّذ شَا. وَار ذَايس تَّكبُّر،

⁵ أَقَا نتَّاث تْسذْحَا. وَار ثْرزُّو شَا خ مِين ثنْوَا نتَّاث وَاهَا. وَار يسْهِيڒ اَذ تْعصّب، مڒَا عْصَان-ت تتُّو ذغْيَا.

⁶ وَار ثْفَرّح شَا زِي شَّرّْ، ثْفَرّح زِي لْحَقِيقَا.

⁷ وَار ثْفطَّاح عمَّارْص. تَامن شْحَاڒ مَا ثكَّا. ثْصبَّر خ مِين مَا يدْجَان. س لْأَمَال ڒبْدَا تْمنَّا.

⁸ ڒمْحِبّث-أَ نتَّاث عمَّارْص اَذ تقْضَا، مَاشَا اَذ نْتَاهَان وَاوَاڒن ن لْأَنْبِيَا، ئِڒسَاون ن يثَرَّاسن وَار تْغِيمِن شَا ذ لُّغَا، لْمَعْرِيفَا اَذ تْوَاكمّڒ يعْنِي ثُوْسْنَا.

⁹ أَقَا مِين نسّن مَاشِي يكْمَاڒ مَانَايَا، مِين نسَّاوَاڒ نشِّين لْأَنْبِيَا ذ اَنقْصِي إِݣ يدْجَا.

¹⁰ مِين يدْجَان قَاع يكْمَاڒ اَذ د يبَان ذَانِيتَا، سّنِّي مِين يدْجَان ذ اَنقْصِي اَذ يودَّر نتَّا.

¹¹ وَامِي نش تُوْغَايِي ذ اَسيْمِي وَاهَا، أَمشْنَاو اَسيْمِي سِّيوْڒغ اَم نتَّا، أَمشْنَاو اَسيْمِي تْفكَّرغ اَم وَانِيتَا، أَمشْنَاو اَسيْمِي وَار تْميِّيزغ س لْفِكْرَا. نش وَامِي ذوْڒغ ذ اَرْيَاز بَعْدَا، سمْحغ ذݣ يبْرِيذن ن وسيْمِي-يَا.

¹² أَقَا ڒخُّو نْخزَّر ذݣ يِجّن ن ثِيسِيث وَار ثصْفِي شَا، مَاشَا منْبَعْد أَ نمْࢲر مْلِيح قَارَا ذِي قَارَا. ڒخُّو مِين سّْنغ ذ اَنقْصِي إِݣ يدْجَا، منْبَعْد اَذ سّْنغ نش ثِمسْڒَايِين مَارَّا، كِيف-كِيف مَامّش تْوَاسّْنغ نش ذَانِيتَا.

¹³ أَقَاثن ڒخُّو قِّيمن ثْڒَاثَا-يَا: لْإِيمَان ذ لْأَمَال ذ ڒمْحِبّث يِيْنَا. مَاشَا زِي يِيْنَا ڒمْحِبّث ثُوْعْڒَا.