Yohane 9 - MMA SHIYYA

¹ Nae ili eeiraa andu, kalolia nndu akee mfu miso kuuka miwo-nikień yamwi.

² Vanalosho vamwi vakamwuṛa veenumbuaa: A le Llosha, ulya andetana kikasha ni i? Ni nndu uu naań ana wasuṛi vamwi kairiwa akee mfu miso?

³ Yesu kaaṛua: Nta ni nndu uu atanie kikasha ana ndee ana mae ndi. Amiiriwa kuro, amu mashoṛa a Iṛuva amanyike kwamwi.

⁴ Ise kyatiwara iṛunda mashoṛa a ito ashirumie ili kukikee nsanyiń. Kio kishaa na nndu atakimakii iṛunda mashoṛa.

⁵ Kyeeri kyo nkee kunu isangeń niń nkee langa ya isanga.

⁶ Ammaa irera ifi kamishia manyiiri si kaafwaringafwaringa akava ibwashi. Na ibwashi lia kaliaamba nndu ulya misoń. Kamwia: Enda kundekusangya iruveń lia lya Siloa — nkimwi na: Ulya arumwa.

⁷ Kyasia kaenda kandekusangya. Kauya ammaa ilolia.

⁸ Kyasia vakyungu vamwi na valya veemwishii mbele eekee nndu mweṛeṛia vandu vakanumbua: Naare? Uu yye ulya se eekaa-fo rembo eeṛeṛiaa vandu?

⁹ Vengi vakanumbua: Yye. Vengi vakanumbua: Yye ndi, niikai awakie da. Nae muni kanumbua: Nniń ye.

¹⁰ Kyasia vakamwia: Naare kindeva ili miso afo anderuuka?

¹¹ Nae kaaṛua kanumbua: Ni nndu ulya avaangwaa Yesu yye andefwaringafwaringa ibwashi kaamba ifo misoń akwa. Kashiia: Enda kulya iruveń lia lya Siloa kundekusangya-fo. Nań naenda nakusangya, llyo nndelolia.

¹² Vakamwia: A nndu to nkwi akai? Kanumbua: Niishi ndi.

¹³ Vakarwaa nndu ulya eekee mfu miso kwa Vafarisayo.

¹⁴ Na nkonu ulya wwa Sabato lia Yesu andefwaringafwaringa ibwashi kanrua miso.

¹⁵ Kyasia Vafarisayo nawo vakamwuṛa lingi sheeli kindeva kalolia. Kavaia: Andeamba ibwashi misoń akwa, numa nakusangya na alli llolie.

¹⁶ Kyasia kiindi kya Vafarisayo valya vakanumbua: Nndu to ni nndu aukie kwa Iṛuva ndi, fulya ataindiaa nkonu wa Sabato. Vengi vakanumbua: Kwakooya ni nndu nrekwa, naare amakii itana findo fa maṛiikiso sha ifo? Llyo vakwava makamba avili.

¹⁷ Kyasia vakauṛa ulya eekee mfu miso lya kavili: A iwe kukee irera are kya mboni tamwi, fulya ankurua miso? Nae kanumbua: Nndu uu mmwauya fisuku.

¹⁸ Kyasia Vayuda nta iirikia sheeli nndu to eekee mfu miso kakooya ilolia. Vakavaanga ndee na mae wa nndu ulya andekooya ilolia.

¹⁹ Vakavaura: Uu yye mwana ulya wanu munumbuaa: Eeriwa akee mfu miso? A alli andelolialolia are?

²⁰ Vasuṛi vamwi vakaaṛua vakanumbua: Ise tiishi sheeli uu mmwana weru, nae eeriwa akee mfu miso.

²¹ Kake sheeli kindeva alli kalolia, tiishi ndi. Ana ulya andenrua miso timwishi ndi. Mwuṛeń muni, ye ni nndu nnini. Areraa kyamwi ye muni.

²² Na kiteveto vasuṛi vamwi vakarera kuri, mfulya veeṛee Vayuda. Amu Vayuda veemmaa irekiana, kwakooya nndu anumbuaa sheeli nKristo, aimwaa eeakaa numba yawo ya iterevia.

²³ Nkyo kikangio vasuṛi vamwi vakanumbua: Ye ni nndu nnini, mwuṛeń ye muni.

²⁴ Kyasia vakavaanga nndu ulya eekee mfu miso lya kavili vakamwia: Itikisa Iṛuva! Ise tiishi sheeli nndu to ni nrekwa.

²⁵ Kyasia nndu ulya kaaṛua kanumbua: Kwakooya ni nrekwa, niishi ndi. Niń niishi kindo kimwi da, niń niikee mfu miso na alli llolie.

²⁶ Vakamwuṛa lingi: Andekutania are? Naare andekurua miso?

²⁷ Kavaaṛua: Neemmaa imuia. Neeni nta iita. Naamu ki ili mufurie iita lya kavili? A neeni mufurie iva vanalosho vamwi?

²⁸ Vakankandara vakanumbua: Ni iwe kukee mwanalosho wamwi, ise tikee vanalosho va Mose.

²⁹ Ise tiishi sheeli Iṛuva anderera na Mose. Kake ito tiishi kundo aukie ndi.

³⁰ Nndu ulya kavaaṛua kavaia: Kirero ki kya inumbua mutamwishi kundo aukie nkya maṛiikiso, nae yye anshirua miso.

³¹ Tiishi tikamanya sheeli Iṛuva aaranyaa vatana fikasha ndi. Kake nndu kaeṛea Iṛuva na itana mifurie ilya afurie, kyasia ito Iṛuva amwaranyaa.

³² Nta kuuka ilyo mbele kyamiitiwa sheeli eefo nndu anrua miso a nndu eeriwa akee mfu miso ndi.

³³ Kifo kitaare uu auka kwa Iṛuva, eemakii itana nta kindo ndi.

³⁴ Vakaaṛua vakamwia: Iwe vvili wafo woose wawonikia marekoń, nawe kufurie itilosha ise? Vakamwumbuta wooṛo.

³⁵ Yesu kaita sheeli vamwumbuta wooṛo. Neeli andekwania nae kamwia: A iwe kukusurie Mwana wa Iṛuva?

³⁶ Nae kaaṛua kanumbua: Ni i, Nndumi, amu nań ninkusure?

³⁷ Yesu kamwia: Kwammaa illolia, na ulya akee irera nawe yye.

³⁸ Nae kanumbua: Ee nkukusurie, Nndumi! Kawwoya marendeń.

³⁹ Na Yesu kanumbua: Niń nansha isangeń ninnde llakanu: Valya vatalolie amu valolie, na valya valolie amu vave vafu miso.

⁴⁰ Na kiindi kya Vafarisayo valya veekee nae ili vandeita kuro vakamwia: A tikee vafu miso neese?

⁴¹ Yesu kavaia: Kifo mwikee vafu miso, mwivaa vatana fikasha ndi. Kake alli mukanumbua: Tilolie. Kyasia mareko anu akaa neeni.