Yohane 1 - MMA SHIYYA

¹ Ilyo mbooko Ilyo Kirero kiifoo. Na Kirero kiikee na Iṛuva. Na Kirero kiikee Iṛuva.

² Nakyo kiikee na Iṛuva ilyo mbooko.

³ Findo foose fiifo findetanwa nKirero kyo. Na kitaare kiifo nta kindo kimwi kindetanwa kya ifo fikee fitane ndi.

⁴ Kari kayo mfo muu wikaii. Na muu to ukava langa ya ivaiya vandu.

⁵ Na langa yo ikee ivaa ifo llemiń, na llema nta iiwaria.

⁶ Eeifoo nndu anderumwa ni Iṛuva, na irina lyamwi ni Yohane.

⁷ Ito ashe ave nrambua wa irambua langa yo, amu vandu woose vakooye ikusura veekuwaraa nae.

⁸ Ito eekee langa ilya ye muni ndi, kake ashe amu arambue langa yo.

⁹ Langa ya dede ilya imulikiaa nndu woose yo iikee isha kunu isangeń.

¹⁰ Iikee isangeń na isanga lindetanwa yye na isanga lyo nta immanya.

¹¹ Ashe kwamwi na iwo va kwamwi vandewwaria ndi.

¹² Kake valya woose vandewwaria kavaniinga imakii lya iva vana va Iṛuva, wwo valya vakusurani na irina lyamwi

¹³ Nawo wwo vandeiriwa iteefo milangie ya usao ana iteefo mire ya vvili ana iteefo mifurie ya nndu nndumi, kake vairiwa kwa mikundie ya Iṛuva.

¹⁴ Na Kirero kikaaṛuka vvili wa nndu kakaa kweru. Neese tikalolia unini lwamwi, nalo ni unini sha lwa Mwana wa ngitani aukie kwa Ndee, eeshule uwoo na udede.

¹⁵ Yohane andenrambua na ununga unini eenumbuaa: Uu yye niinnumbuaa: Yye ashaa numa yakwa, amu mmumbele wakwa.

¹⁶ Neeli awore mboṛa, ise ti woose tikava vandu va yavio̱ fa mboṛa yamwi, nafo mfa uwoo na uwoo.

¹⁷ Amu mavavaso andeniinga mMose, kake uwoo lwa Iṛuva na udede lwamwi fikanndwa ni Yesu Kristo.

¹⁸ Eefo nta nndu allolia Iṛuva ndi. Mwana to wa Iṛuva ngitani ito akee ṅundeń ya Ndee yye andetoongoya kyoose.

¹⁹ Na mirambuye ya Yohane yyo ii lia Vayuda va Yerusalemu vanrumia vakohani na va kwa Levi, amu vamwuṛe: Iwe ni iwe i?

²⁰ Kavaaṛua kisumani iteefo wongo, karera baa: Niń nkee Kristo ndi.

²¹ Vakamwuṛa: Ni iwe iń? Ni iwe Elia? Kanumbua: Nniń ye ndi. Vakamwuṛa: Kukee mwauya fisuku ulya? Kanumbua: Wode.

²² Vakamwia: Kyasia ni iwe iń, amu tindeongoya valya vatiruma kwafo. A iwe ku muni kukuvaangaań are?

²³ Kanumbua: Niń nkee ununga lwa nndu akee ivaanga bateń: Tobiṛień shia ya Nndumi, sheeli mwauya fisuku ulya Yesaya arera.

²⁴ Na vandu valya varumwa vVafarisayo vakaengeṛia imwuṛa vakamwia:

²⁵ Nki ili kukee ibatisań vandu, kwakooya kutakee Kristo ana Elia ana mwauya fisuku ulya?

²⁶ Yohane kavaaṛua kavaia: Kyakwa niń ni ibatisa na mura. Kake kari kanu aselele ulya kitaaṛe ini mumwishi.

²⁷ Ito yye ashaa numa yakwa, nań nkaṛiaa nta inserikia mmwute faaru famwi ndi.

²⁸ Na kundo mboni ti tavia nkulya Betania kwa kulya ya Yoridane, kulya Yohane eebatisiaa vandu.

²⁹ Neeli lya ndesi kalolia Yesu eeshaa na kwamwi kanumbua: A li yaanri lya Iṛuva likurikaa mareko a isanga!

³⁰ Uu yye nnderera mboni tamwi sheeli: Nndu ashaa numa yakwa, nae eekee mbele yakwa, amu eekee mumbele wakwa.

³¹ Nań nta niimwishii ndi. Kake ye amu amanyike na baa ifo kwa vandu va Isiraeli, nkyo nndeshea mbatise na mura.

³² Nae Yohane kanrambua eenumbuaa: Nallolia Mumuyo wa Iṛuva eemwolokiaa auka iṛuvewu akee sha mbuku kankaya.

³³ Nań nta niimwishii ndi. Kake ito andeshiruma mbatise na mura yye andeshiia: Ito kwallolia Mumuyo wa Iṛuva eemwolokiaa na inkaya, uu yye abatisaa na Mumuyo Nsongori.

³⁴ Nań nammulolia, lingi nammurambua sheeli uu mMwana wa Iṛuva.

³⁵ Ili lya ndesi Yohane kasalala-wo lingi andu emwi na vanalosho vamwi vavili.

³⁶ Ili andelolia Yesu eeiraa, kanumbua: A li yaanri lya Iṛuva!

³⁷ Na vanalosho valya vavili ili vandeita eereraa kuro, va-kasoṛa Yesu.

³⁸ Yesu kainduka kavalolia veensoṛaa kavaia: Nkiki mukee iṛuya? Vakamwia: Rabi, — misendie yayo nkimwi na llosha — a andu kwaeveṛia uvari nkwi?

³⁹ Kavaia: Oṛeshoń mundella! Vakasha vakalla alya aeveṛia uvari. Vakasinda kwamwi nkonu ulya biti. Kiikee kyeeri kya saa ikumi ta nsanyiń.

⁴⁰ Umwi wa valya vavili vandensoṛa kiimba kya kirero kilya kya Yohane eekee Anderea mwanawo wa Simon Petiro.

⁴¹ Na Anderea kabooka ilolia lya mbele mwanamae wamwi Simon kamwia: Tallolia Mesia — misendie yayo nkimwi na Kristo.

⁴² Kanrwaya Yesu. Yesu kamulla kamwia: Ni iwe Simon mwana wa Yohane, kuvaangwaa irina lyafo Kefa — misendie yayo nkimwi na iwe, na kigiriki Petiro.

⁴³ Neeli lya ndesi Yesu afura ikwimboo aende kulya Galilaya kakwania na Filipo. Yesu kamwia: Shilatia.

⁴⁴ Na Filipo eekee nndu wa kulya Betisaida, nato mmuṛi wa Anderea na Petiro.

⁴⁵ Na Filipo kalolia Natanaeli kamwia: Ulya asendwa mMose mavavasoń na akwaa vvaauya fisuku vakansenda tammaa illolia, yye Yesu wa kulya Nasareti, mmwana wa Yosefu.

⁴⁶ Natanaeli kamwia: Oo kulya Nasareti kimakii yuka-fo kindo kinuru? Filipo kamwia: Oṛeshoń kundella!

⁴⁷ Ili Yesu andelolia Natanaeli eeshaa na kwamwi kamwia: A uu Mwisiraeli wa dede ataare ukavili kari kamwi.

⁴⁸ Natanaeli kamwia: A ba nkwi kwashimanya? Yesu kamwaṛua kamwia: Lia kukee alya sindeń ya nri ulya wa nkuu kitaare Filipo ankuvaanga, neemmaa ikulolia.

⁴⁹ Natanaeli kamwaṛua: Llosha iwe ni iwe Mwana wa Iṛuva, ni iwe kukee mangi ya Isiraeli.

⁵⁰ Yesu kamwaṛua kamwia: Kukee ishikusura, fulya nakuia neenkuloliaa kukee sindeń ya nri ulya wa nkuu. Kuloliaa finini kita ifi.

⁵¹ Kanumbua: Namuia kya dede: Kuuka alli muloliaa iṛuvewu liruukie na vamalaika va Iṛuva veesaamaa na yolokia Mwana wa nndu.