Mitanie ya varumi 9 - MMA SHIYYA

¹ Kyasia Saulo eekee ikandara na ikabiṛia vandu va Yesu vawalwa. Kaenda kwa nkohani ninini

² kantereva barua ya yenda siṛiń ta Vayuda kulya muṛiń wa Damasiko. Kalolia-fo vandu va Yesu womi na vaka avafinge na ivarwaa Yerusalemu.

³ Kyasia ifi eekee shień kufui afike Damasiko, kwibari langa ikammulikia yuka iṛuvewu.

⁴ Kawa si kaita ununga lwimwiaa: Saulo uu, Saulo uu nki ifi kukee ishuumbuta?

⁵ Kamwuṛa: Ni iwe i Nndumi? Kamwia: Niń nkee Yesu uu kukee imwumbuta.

⁶ Kwimboo enda muṛiń ulya, nafo kuio̱o̱ kilya kyawara kutane.

⁷ Na vandu valya variani nae kyaaṛoń vakasalala-wo veeṛiikaa, fulya vandeita ununga nta ilolia nndu.

⁸ Na Saulo kakwimboo. Ifi andetaṛambua miso akimakii ilolia kindo ndi. Vakawwara uko vakamfita Damasiko.

⁹ Nae eekee ndoń andu a mikonu iraru nta ilya shoonga ana nta inwa.

¹⁰ Kyasia kulya muṛiń wa Damasiko eeifoo nndu wa Yesu irina lyamwi eevaangwaa Anania. Nndumi kawaanga yorień: Anania uu! Nae kairika kanumbua: Ee Nndumi.

¹¹ Nndumi kamwia: Kwimboo enda alya shień ya muṛi ilya ivaangwaa shia shisaari kuṛuye-fo nndu irina lyamwi nSaulo wa kulya Tariso akee kulya numba kwa Yuda, fulya akee itereva Iṛuva.

¹² Nae kalolia nndu yorień irina lyamwi ni Anania eeakaa kwamwi na imwekeṛia uko akooye lingi ilolia.

¹³ Anania kamwaṛua kamwia: Wode Nndumi, namoongoywa vvandu veengi mboni ta nndu ulya, sheeli andelisa vandu vafo ukiva kulya Yerusalemu.

¹⁴ Na kunu ni wikie muumu vvakohani vanini afinge valya woose vakukusurie.

¹⁵ Nndumi kamwia: Kwendie da, amu nansaua nndu uu ave ndundi wakwa aende ikurika irina lyakwa kwa vandu va isangeń vatashiishi na kwa mamangi na kwa vana va Isiraeli.

¹⁶ Nań mmworusaa matuṛulwa woose alya atuṛulwaa kiimba kya irina lyakwa.

¹⁷ Na Anania kaenda kaaka numba ilya kaekeṛia Saulo maako kamwia: Mwanama Saulo, ni Nndumi Yesu anshiruma ulya andekukworusa kulya shień, amu kukooye lingi ilolia na iishuṛwa Mumuyo Nsongori.

¹⁸ Lia eni miso amwi akataṛambuka kalolia lingi kakwimboo kabatiswa.

¹⁹ Neeli andemaa ilya shoonga kauiywa mmuu. Kakaa ifo mikonu myaangu andu emwi na vanalosho wo veekee Damasiko.

²⁰ Na ilyo yeni kakwanisa ifo numba ta iterevia kya Yesu sheeli ye mMwana wa Iṛuva.

²¹ Na woose vandeita vakariika nnu vakanumbua: Uu ni ulya se eekee ifinga valya vakee isenda irina li kulya Yerusalemu? Na kunu ansha kiimba kya ikyo amu avafinge avarwaa kwa vakohani vanini.

²² Kake Saulo kaengeṛia iva ntomari kataṛaakisa Vayuda valya veekee Damasiko eekaarisaa sheeli uu yye Kristo.

²³ Ili mikonu miingi indeira Vayuda vakarera kyama, amu vawwaa.

²⁴ Kake Saulo kamanya ntambwe wawo. Vakallaya mbengeń ta muṛi kio na nsanyiń, amu vawwaa.

²⁵ Vanalosho vakamwimboo kio vakanrwaa nkusheń vakamwolota na usuṛumateń lwa muṛi.

²⁶ Neeli Saulo andefika Yerusalemu kaelelia ikulunga na vanalosho. Nawo woose veemweṛee nta ikusura sheeli ye mmwanalosho.

²⁷ Llyo Barinaba awwaria kanrwaya varumi kavaongoya kasa alolia Nndumi kulya shień. Na sheeli yye arera nae na kasa akwanisa irina lyamwi na baa kulya Damasiko.

²⁸ Nae kakaa andu emwi nawo kulya Yerusalemu eeakaa na isomuka.

²⁹ Kakwanisa irina lya Nndumi na baa. Karera na Vayuda valya veeukiee Ugiriki na ivingana nawo. Nawo vakalliya kyama kya iwwaa.

³⁰ Kake ili vaaroe vandemanya mboni ti vakankurika kumande Kaisaria vakanrika aende Tariso.

³¹ Kyasia siṛi ikakaa na unambwe kulya Yudaya koose na Galilaya na Samaria. Ikakulunga ikakwengeṛia na ifumbuka na yeṛea Nndumi na yelekio̱ mMumuyo Nsongori.

³² Nae Petiro kalengetia taari toose kainama kafikia vakristo veekee kulya Lida.

³³ Ifo kalolia-fo nndu umwi irina lyamwi ni Ainea. Nndu to eellalaa kiraań andu a myaka nyaanyi, amu eetoṛokombiee.

³⁴ Petiro kamwia: Iwe Ainea, Yesu Kristo akukiṛa. Kwimboo kukwalie kiraa kyafo ku muni. Lia eni kakwimboo.

³⁵ Na vandu woose veekee kulya Lida na Saron ili vandellolia vakaaṛukia Nndumi.

³⁶ Na kulya Yope eeifoo mwanalosho umwi wa kika irina lyamwi nTabita — misendie yayo nsarra. Nka uu eeishulee mitanie minuru eeutaa na misimbika ya yelekia vakiva.

³⁷ Na mikonu ilya kalwaa kafwa. Ili vandemaa insangya vakamwaṛa kai.

³⁸ Na muṛi wa Lida ukee kufui na Yope. Ili vanalosho vandeita sheeli Petiro akee ifo Lida vakaruma vandu vavili kwamwi vantereve atasinde isha kwawo.

³⁹ Petiro kakwimboo kaenda nawo. Neeli andefika vakaaṛukia nae kai. Misikeeti vakanserikia woose veeiyaa na imworusa miseto ilya Tabita andeoka lia akee andu emwi nawo.

⁴⁰ Petiro kavasomuta wooṛo woose kafwiṛia nri katereva Iṛuva. Numa kaindukia nnyiṅa ulya kanumbua: Tabita kwimboo! Nae kataṛambua miso amwi. Neeli andelolia Petiro kakwimboo kakaa rembo.

⁴¹ Kawwara uko kansalalisa. Kavaanga vakristo valya na misikeeti kanseṛeesa mbele yawo akee na muu.

⁴² Kikamanyika muṛiń woose wa Yope. Na vandu veengi vakakusura Nndumi.

⁴³ Kyasia Petiro kakaa mikonu milive ifo Yope numba kwa nndu umwi irina lyamwi nSimon akee nsisa shoni.