Mitanie ya varumi 2 - MMA SHIYYA

¹ Kyasia ili nkonu ulya wa Pentekoste undefika, vanalosho woose va Yesu veekusandiee andu emwi na ngoo imwi.

² Kwibari kikasha kiṛuṛumu kyuka iṛuvewu kikee sha mburaato nini ya finya kikaishua numba ilya veekaii koose.

³ Tikavashea ngyulumi tikee sha ta muro tikakwava tikakaa kwa nndu umwi umwi wa vanalosho valya.

⁴ Nawo vakaishua Mumuyo Nsongori vakabooka irera na mirerie ingi, sheeli Mumuyo andevalosha irera.

⁵ Na kulya Yerusalemu veeifoo Vayuda veekaa-fo veeṛee Iṛuva va ngyufari toose ta vandu ta masangeń.

⁶ Ili ununga lua kindeitiwa, syamu ya vandu ikakusandia vakariika, fulya nndu woose avaita veereraa na mirerie yamwi meni.

⁷ Vakatiṅwa nnu vakanumbua: Iva woose vakee irera wa kulya Galilaya se?

⁸ Kyava are ili ise tikee iita mirerie yeru meni tiwonikie nayo?

⁹ Ise Vaparti na Vamedi na Vaelamiti na va kulya Mesopotamia na Yudaya na Kapadokia na Ponto na Asia

¹⁰ na Firigia na Pamfilia na va kulya Misiri na va ngyuruka ta Libia kufui na Kirene.

¹¹ Neese veeni tiukie Rome tikee Vayuda na vaaroe va Vayuda na Vakireta na Vaarabu, ise tikee ivaita veerambuaa mitanie minini ya Iṛuva na mirerie yeru meni.

¹² Vakataṛaaka vakanunua nrwe vakanumbua: Iki kivaa are?

¹³ Vengi vakaseka vakanumbua: Vanangyo̱ wwari wa kyaanga.

¹⁴ Kyasia Petiro kasalala-wo andu emwi na valya ikumi na umwi karosa ununga lwamwi kavaia: Muṛe vandu va Vayuda neeni mu woose mukee Yerusalemu, mboni ii kyawara imwaṛukie. Aranyiń firero fakwa!

¹⁵ Womi va vanangyo̱ sheeli mukusaṛie ndi, amu alli nsaa isaru ta nsanyiń.

¹⁶ Kake mboni ii ni ilya yarerwa na kana ka mwauya kisuku ulya Yoeli:

¹⁷ ”Ni Iṛuva arera: Kivaa mikonu ya ifurumia niiritiaa vandu woose Mumuyo wakwa. Na vana vanu va womi na va kika vaauyaa fisuku. Na vakoo vanu valoliaa myorusie. Na vasuṛi vanu vaoriaa maoria.

¹⁸ Na maketi akwa a womi na a kika wairitiaa Mumuyo wakwa, nawo vareraa na iringisia.

¹⁹ Noorusaa maṛiikiso ifo iṛuvewu ule na myorusie kunu isangeń: Usao na muro na ituuṛu lya musu.

²⁰ Saa yaṛukaa llema na mwiri uvaa usao kitaare nkonu wa Nndumi wansha ukee nkonu nnini na baa.

²¹ Na ulya woose asendaa irina lya Nndumi akiaa.“

²² Muṛe womi va Isiraeli, aranyiń firero fi: Yesu uu wa Nasareti ni nndu anderumwa ni Iṛuva ilyo andesha kwanu, kamanyiswa na findo finini na maṛiikiso na myorusie Iṛuva andefitana na uko lwamwi mbele yanu, sheeli mwishi ini mu veni.

²³ Nndu uu ili andeniingio̱ kwa kiteveto kya Iṛuva ikyo eenkikusaṛiaa na kwa miṛengie yamwi kuuka mbele, nndu uu ni ini mundenkabia nsalabeń na maako a vandu vateeshi Iṛuva mukawwaa.

²⁴ Nae Iṛuva kanduta eeboṛomuaa kivawwo kya ufu, fulya kiteevaa luwware.

²⁵ Amu Davidi ansenda eereraa kyamwi: ”Nalolia Nndumi mbele yakwa mikonu yoose, fulya akee taari ya uko usha lwakwa ntasenike.

²⁶ Kwa ikyo nrima wakwa ukasenywa na ulumi lwakwa lukafura. Lingi wili wakwa nato wiraa ba.

²⁷ Fulya kutatiaa nrima wakwa ufuń ana kutatiaa Nsongori wafo abwaa.

²⁸ Kwanshilosha shia innde muu. Kushiishuṛaa ifura nkee kisanguń kyafo“.

²⁹ Muṛe womi na vamwanama, shililień nrere mbele yanu na baa mboni ta nde yeru nnini Davidi ntawore weṛei: sheeli afwe kafikwa, na mbanga yamwi iifo kweru kumande nnu.

³⁰ Kyasia fulya ye akee mwauya fisuku, kamanya sheeli Iṛuva ammuliya ikite, sheeli kari ka kishuku kyamwi akarisaa umwi kifumbiń kyamwi kya unini.

³¹ Ye muni atembeṛie ilolia ifi kasenda mboni ta iṛuka lya Kristo, sheeli arewa ufuń ndi ana wili wamwi walolia ibwaa ndi.

³² Yesu to Iṛuva anduta, neese ti woose tikee varambua vamwi.

³³ Kyasia ye ili amaa iroswa kumande uko usha lwa Iṛuva na iwaria kirekio kilya kya Mumuyo Nsongori kwa Ndee, amiirita kindo ki mukilolie alli na ikiita.

³⁴ Amu Davidi arwe iṛuvewu ndi. Kake ye muni arera: Nndumi aia Nndumi wakwa: Kaa rembo ukoń usha lwakwa

³⁵ kumande nrwaa fituva fafo kwa si ya marende afo.

³⁶ Kyasia iva woose va numba ya Isiraeli vamanyi ninsha, sheeli Iṛuva amaaṛua Yesu to mundenkabia nsalabeń ave Nndumi na Kristo.

³⁷ Ili vandeita ifi, mirima yawo ikakyangika. Vakaia Petiro na varumi valya vengi: Titanaań are, muṛe vamwanamae veru?

³⁸ Petiro kavaia: Kurreń, na nndu woose abatisio̱ irina lyo lya Yesu Kristo mukooye itio̱ lya mareko anu. Neeni mukooyaa wavi lwa Mumuyo Nsongori.

³⁹ Amu kirekio ki nkyanu ini na kya vana vanu na kya iwo woose vakee kwaasha valya woose vavaangwaa ni Nndumi Iṛuva weru.

⁴⁰ Kavarambuya kwa firero fingi fiingi nnu na ivaikimba eereraa: Kulakaniseń na ufwari ilu ureti.

⁴¹ Na iwo vandewaria kirero kyamwi na ifura vakabatiswa. Na nkonu ulya vakaengeṛio̱ sha vandu fiku firaru.

⁴² Vakakaa na iwara miloshie ya varumi. Vakasongosia siṛi na ikufukiya nkate na ikuterevia kwa Iṛuva.

⁴³ Woose vakawarwa wweṛei mirimiń yawo kiimba kya maṛiikiso na myorusie ilya indetanwa warumi ikee miingi.

⁴⁴ Na woose vandekusura Nndumi vakava kimwi na findo foose fikava fa siṛi.

⁴⁵ Vakakumba masaa awo na foose vakee nafo vakafaavia woose, nndu woose akooye sheeli auṛi.

⁴⁶ Na mikonu yoose vakakaa numba ya Iṛuva kwa nrima umwi veekufukiyaa nkate numba kwa numba na iwaria shoonga yawo na ifura na nrima mweelwa.

⁴⁷ Vakaitikisa Iṛuva na isenya vandu woose. Na Nndumi kafumbuta siṛi mikonu yoose na valya woose veekee ikiṛwa.