Matayo 9 - MMA SHIYYA

¹ Yesu kaaṛukya ngalaveń kaṛuka kwa kulya ya nruva kafika muṛiń wamwi.

² Lia eni vakamwendye nndu atoṛokombye meengo eeriwaa na kiraa. Neeli Yesu alolya sheeli vakusurani nae, kaia nndu ulya atoṛokombye: Uyo mmuu, mwanakwa, kwammaa itio mareko afo!

³ Na kiindi kya vaaṛia va mitisine vakakurera ifo ngooń tawo veenumbuaa: Uu anruma Iṛuva.

⁴ Yesu kamanya ma-kusaṛo awo kavaia: Naamu ki ili mukee ikusaṛa fikasha kuro?

⁵ Nkingaki kikee kyaangu, ni inumbua: Kwantio mareko afo, ana ni inumbua: Kwimboo kuṛue?

⁶ Na alli mumanyaań sheeli Mwana wa nndu awore finya ya itia vandu mareko kunu isangeń. Lia eni kaia nndu ulya atoṛokombye: Salala, imboo kiraa kyafo kukwendye kyeń!

⁷ Na nndu ulya kakwimboo kaenda kyeń.

⁸ Ili vandu vandelolya kive kuro, vakariika koṛoń vakaitikisa Iniva, ili anniinga vandu finya ya mikae ii.

⁹ Ili Yesu andeuka Kaperinaumu, kalolya nndu eekee rembo numba ya kyaalo, avaangwaa irina lyamwi Matayo. Kamwia: Shisoṛa! Nae kakwimboo kansoṛa.

¹⁰ Ili Yesu eekee numba ya nndu ulya eelyaa-fo shoonga, vakasha vasańiṛya kyaalo veengi na vandu varekwa va-kalya shoonga andu emwi na Yesu na vaseṛo vamwi.

¹¹ Ili Vafarisayo vandelolya, vakauṛa vanalosha vamwi: Nki ili llosha wanu akee ilya shoonga andu emwi na vasańiṛya kyaalo wo na vandu varekwa?

¹² Yesu kaita firero fawo kanumbua: Vandu vesha vafurie iraya mwaanga ndi kita valya valole.

¹³ Endeń mundekulosha imanya kirero kilya: ”Kilya kishisenye niń ni ililya vandu, nta ni iraswa ndi“. Fulya niń nansha ivaanga valya vakee vasumani ndi kita valya vakee varekwa.

¹⁴ Kyeeri kilya vanalosho va Yohane vakanshea vakamwia: Naamu ki ise na Vafarisayo tisindaa kuro, kake vanalosho vafo vatasindaa kuro?

¹⁵ Yesu kavaia: Valya vakee vavaange waliń naare vaiyaa kyeeri kyo nndumi wa wali akee andu emwi nawo? Kake mikonu ishaa vasokwa muni wali, llyoń vasindaa kuro.

¹⁶ Nta eefo nndu avevyaa kirami kiiya nsetoń nkuu ndi. Amu kilya kyavevyo kiiṛuaa kirami kya nseto ulya, na alya arandukye akwengeṛyaa mmwasi.

¹⁷ Nta vafisaa mfinyo mwiya ifo mbolokoń ta masaṛa makuu ndi. Kwakooya vatanaa kuro, mboloko to tirandukaa. Na mfinyo wirikyaa si. Kake mfinyo mwiya ufiswaa mbolokoń shiya, naamu fikie foose fili fivili.

¹⁸ Ili Yesu eereraa kuri na vandu, kashewa ni nshili umwi. Kawwoya ńundeń kamwia: wui Mbee, noore mwana wakwa wa sambuṛa afwa alli kuri. Anna Mbee, nakutereva kunndefo kundemwekeṛya uko lwafo, nae aṛukaa.

¹⁹ Llyo Yesu akwimboo andu emwi na vaseṛo vamwi vakaenda na nshili ulya.

²⁰ Ili vakirekye shień kitaare vamfika kwa nshili ulya, kashewa ni nndu nka eelolee saka ya kika andu a myaka ikumi na ivili. Kasha numa ya Yesu kabaana nkyendu wa nseto wamwi.

²¹ Fulya nka to eenkureraa ngooń yamwi eenumbuaa: Kwakooya mbaanaa nkyendu wa nseto wamwi, vvaa nsha buṛu.

²² Llyo Yesu aaṛuka kallolya kamwia: Uyo mmuu, mwana wakwa! Fulya kwashikusura, nkyo kyankukiṛa. Na nka ulya kava nsha kyeeri kyo kyeni.

²³ Neeli Yesu andefika kulya kwa nshili ulya, kakooya-fo iṛoṛonda lya vandu, kiindi veejvilyaa mbembe na kiindi veekabaa kiṛoṛongyo kya kiiyo.

²⁴ Na Yesu kavaia: Iwukeń, amu mwana uu amfwa ndi, niikai arekye raoń da. Nawo vakanseka.

²⁵ Ili vandu valya vandemaa isomutwa, Yesu kaaka numba ilya mwana akai kawwara uko na mwana kakwimboo.

²⁶ Na mboni tilya tikakwana urukeń lua loose.

²⁷ Ili Yesu eeiraa auka ifo, vandu vavili veekee midoń vakallatya vakarosa ununga veenumbuaa: Wui Mwana wa Davidi, tililye!

²⁸ Neeli andemaa ifika numba, valya veekee midoń vakanshea. Yesu kavaia: Mukusurye sheeli mmakii itana kuro? Vakamwia: Ee Nndumi.

²⁹ Llyo avabaana miso awo kanumbua: Kimuvie sheeli mwankusura.

³⁰ Miso awo akaruuka. Yesu kavakandara kavaia: Lleń nnu manya nndu amanyaa iki nammutanya.

³¹ Nawo vakaenda vakakwanisa mboni ii urukeń lua loose.

³² Neeli iwo vaendaa, lia eni vakamwendye nndu ateeshi irera aworwa mmumuyo nkasha.

³³ Ili mumuyo ulya nkasha undeumbutwa, nndu ulya ateeshi irera karera. Isyamu lia likaṛiika likanumbua: Kunu Isiraeli koose kuuka mbele kyallolika kindo sha iki ndi.

³⁴ Kake Vafarisayo vakanumbua: Mfinya ya nnini wa mimuyo mikasha yyo akee yumbuta nayo mimuyo mikasha.

³⁵ Yesu asengetya miṛiń minini na minnya yoose eeloshaa-fo vandu ifo numba tawo ta iterevya eeongoyaa vandu mboni shinuru ya umangi na ikiṛa vandu saka ta mikae yoose na ngyutanyaṛi ta mikae yoose.

³⁶ Neeli andelolya isyamu iingi, kalivavyo mmuu, fulya veekee vaṛaaṛaa sha mburu titawore mwisi.

³⁷ Llyo aia vaseṛo vamwi: Iilula ni iingi, kake vaṛundi waangu.

³⁸ Kyasia tereveń muyanrema arume vaṛundi ifo iilulyoń lyamwi.