Mariko 7 - MMA SHIYYA

¹ Llyo Vafarisayo na vaana va mitisine kiindi vakakusandia io akai vauka kulya Yerusalemu.

² Vakalolia kiindi kya vanalosho vamwi veelyaa shoonga na maako a kiṛinda atakee masangye.

³ Amu Vafarisayo na Vayuda woose veelyaa shoonga kitaare vasangya maako ndi. Fulya veekuworee na milimu ya vakuuku vawo.

⁴ Neeli veeukaa singiṛeń veelyaa shoonga kitaare vakusangya ndi. Fiifo na findo fingi fiingi vandewaria na ifiringa, sha isangya mbata na ndima na nungu.

⁵ Kyasia Vafarisayo valya na vaana va mitisiṛie vakamwuṛa: Naamu ki ili vanalosho vafo kitaare vakee isoṛa milimu ya vakuuku naań? Na ilya vakalya shoonga na maako a kiṛinda.

⁶ Nae kavaia: Yesaya aauya kisha kisumani neeni ini vamakavili, sheeli kyatisiṛwa: ”Vandu va vakee ishiitikisa na fiṛomu da, kake mirima yawo ikee kwaasha nań.

⁷ Wo vakee ishaarafuma kya ruu veeloshaa miloshie ya mavavaso a kivandu“.

⁸ Ini mukee itia ivavaso lya Iṛuva mukawara milimu ya kivandu.

⁹ Kavaia: Nkuro kikai: Ivavaso lya Iṛuva llyo mwali fuluta, amu mumakii iringa milimu yanu.

¹⁰ Amu Mose anumbua: India ndeo na maa, na ulya ammaa ndee na mae afwe.

¹¹ Neeni mukanumbua: Nndu kammaa iia ndee ana mae kurubani (nkimwi sheeli kyaio̱: Ifo mwiwariaa kwakwa fa imweleka, nammaa ifirwaa five nsimbika wa Iṛuva)

¹² mukimwotoṛaa atanie ndee ana mae kindo ndi.

¹³ Mukaaṛua kirero kya Iṛuva sha kindo kya dua kiimba kya mifundie ilya yanu munderewa wakuuku mukaifitia vandu. Lingi mukatana findo fiingi fivakani nafo.

¹⁴ Kavaanga lingi isyamu lia lindekusandia io akai kavaia: Shaaranyiń mu woose na imanya!

¹⁵ Kiifo kindo kikee kiwooṛo ya nndu kikaaka neefo karikari kimakii imwaṛua nkasha ndi. Kake kilya kyukaa kari kamwi nkyo kimwaṛuaa nkasha.

¹⁶ Ulya awore marwi a yaranya aaranye!

¹⁷ Neeli andeaka numba, karea-wo isyamu lia. Na vanalosho vamwi vakamwuṛa mboni ta sumu ilya.

¹⁸ Kavaia: Amu neeni muwore nta uṛango se? Mwishi se sheeli kindo kyoose kikee kiwooṛo ya nndu kikamwaka, kimakii inniinga ukasha ndi.

¹⁹ Amu kimwakaa nrimiń ndi, kake ndewuń da. Kikauka-fo kikaenda iriniń. Neeli arera kuro, aaṛua shoonga toose tikava shinuru.

²⁰ Kanumbua: Kilya kikee yuka nnduń nkyo kikee iniinga nndu ukasha.

²¹ Amu ifo mirimiń ya vandu mfo aukaa makusaṛo makasha na waaisi

²² na unini na iwaa na yaaika na ilanga ikasha na nkuru na ntambwe na ureti na iiria iriso na firumu na ikuṅinisa na utondo.

²³ Ifi foose fikee fikasha fuukie kari, nafo mfo fikee iniinga nndu ukasha.

²⁴ Kakwimboo ifo kaenda kafika miyanuń ya Tiro na Sidon. Kaaka numba kafura kitamanyike ni nndu. Kake andemakii ikufisa ndi.

²⁵ Amu lia eni nndu nka, eeworee mwana wamwi wa kika aworwa mmumuyo nkasha, kaita mboni tamwi kasha nafo kawwoya marendeń amwi.

²⁶ Na nka ulya eekee Ngiriki aukye Foinike ya kulya Siria. Kantereva amu aumbute mumuyo ulya nkasha uuke mwana ulya wamwi.

²⁷ Nae kamwia: Tia vana vawuure mbele! Amu nkisha isoka vana shoonga na yeeṛia makite ndi.

²⁸ Nae kaaṛua kamwia: Ee Nndumi, na akwaa mmakite akee kwa si ya kiraa kya iliya alyee fibeṛeshu filya fisaa fa vana.

²⁹ Llyo amwia: Kiimba kya kirero kyo kwendie! Mwana wafo ammaa yukwa mmumuyo nkasha.

³⁰ Kaenda kyeń kwamwi kakooya mwana ulya aaṛie kiraań na mumuyo ulya nkasha wammaa imwuka.

³¹ Yesu kauka kulya miyanuń ya Tiro eeiraa urukeń lwa Sidon. Kafika nruveń ilya ya Galilaya alya muungoń wa miri ikumi.

³² Mfo vandu vamwendee nndu afiye marwi na uṛoo lwamwi nalo lwifiyee kutu. Vakantereva amwekeṛie uko lwamwi.

³³ Nae kallakanisa na vandu wo kanrwaa kyaanya kyamwi. Llyo anrwaya inini marwiń amwi kamisha mare kabaana ulumi lwa nndu ulya.

³⁴ Kalla na ule iṛuvewu kadia eemwiaa: Efata! Nkimwi na: Taṛambuka!

³⁵ Lia eni marwi a nndu ulya akaruuka na ulumi lwamwi lukatambashuka, kabooka irera kisumani.

³⁶ Na Yesu kavaima veeongoyaa vandu vengi. Kake ye aengeṛia ivaima, nawo vakaengeṛia ikwanisa.

³⁷ Vakariika koṛoń veenumbuaa: Anshiisa foose deń. Valya vafu marwi avaaṛua vaite na vafu uṛoo avaaṛua varere.