Mariko 5 - MMA SHIYYA

¹ Vakafika kwa kulya ya nruva kumande urukefi lwa Vageraseni.

² Neeli andemaa yoloka ngalaveń, lia eni nndu kakwania nae aworwa mmumuyo nkasha auka na mbangeń ta vafu.

³ Na ifo mbangeń ta vafu mfo aaṛuye kyeń kwamwi. Nta nndu eekee imakii imfinga na akwaa nta na nse.

⁴ Amu eemfingwaa keengi na makengeto na mise. Kafukya mise yo kafukyafukya na makengeto alya. Ana nta nndu eeworee finya ya iwinga.

⁵ Na mikonu yoose eekee ifo mbangeń ta vafu na ngyuroń. Kaishiṛia-fo kio na nsanyiń na ikuminyaminya na mawe.

⁶ Ili andelolia Yesu akee kwaasha, kanrishia kawwoya marendeń.

⁷ Kaṛoṛongya na ununga unini eenumbuaa: Nkiki noore nawe, Yesu Mwana wa Iṛuva akee kwa ule ya foose? Shiliya ikite na Iṛuva, akwaa kutashivavisaa.

⁸ Amu Yesu arie imwia: Uka nndu uu, iwe mumuyo nkasha!

⁹ Nae kamwuṛa: Irina lyafo ni iwe i? Nae kamwaṛua: Irina lyakwa ni itoroto, amu tikee veengi.

¹⁰ Kantereva nnu atavaumbute urukeń lua.

¹¹ Na io uroń iiyoo shoo nini ya nguve ikee iiswa-wo.

¹² Mimuyo yoose ikantereva iinumbuaa: Tirumi tindeaka nguveń tilya.

¹³ Kavaniinga muumu. Mimuyo ilya ikamwuka ikandewara nguve tilya. Nayo shoo ilya yoose ikarukana ikaoloka waangeń kumande nruveń. Tikee sha fiku fivili tikandefiya-fo.

¹⁴ Na veesi valya veekee itiisa vakarisha vakandekwanisa mboni tilya muṛiń na manremiń. Vandu vakaenda vandella kindo kilya kyatanika vamanyi kasa kyava.

¹⁵ Vakafika alya Yesu akai. Vakalolia nndu ulya eeworwaa mmumuyo nkasha akee rembo, aṛee nseto, awore na uṛango. Nae yye ulya eeworwaa mmatoroto alya. Nawo vakaeṛea.

¹⁶ Na valya valolia nndu ulya wa mimuyo mikasha kasa atanyo̱ na kilya kya nguve vakavaongoya mboni tilya.

¹⁷ Vakabooka intereva auke miyanuń yawo.

¹⁸ Neeli eeaṛukiaa ngalaveń, nndu ulya eeworwaa mmimuyo mikasha kantereva akaa nae.

¹⁹ Nae Yesu nta imwirikia kamwia: Enda kyeń kwafo kwa vandu vafo kundevaongoya kyoose, Nndumi akutania kinini na ikulilia.

²⁰ Nae kaenda kabooka yongoya ifo vanduń va uruka lua lwa miṛi ilya ikumi eevaiaa kilya kyoose Yesu andentania. Vandu vakaṛiika woose.

²¹ Kyasia Yesu kauya kaṛuka lingi na kwa kulya akee ngalaveń ilya. Isyamu iingi likakusandia-wo, nae eekee mbaai ya nruva ilya.

²² Kasha na-wo nndu umwi wa valla ifo numbeń ya iterevya, irina lyamwi ni Yairo. Ili andellolia kawa na si marendeń amwi.

²³ Kantereva nnu eenumbuaa: Mwanakwa wa sambuṛa munnya akee kufui na ifwa. Nakutereva kufike kushemwekeṛia maako afo, amu ave nsha na ikaa na muu.

²⁴ Kaenda andu emwi nae. Na isyamu iingi likallatia vakansisiṛa.

²⁵ Na nka umwi eeifoo aworwa nsaka ya kika andu a myaka ikumi na ivili.

²⁶ Nae eelliswaa ukiva nnu waanga veengi eemmayaa-wo findo foose awore. Nae nta iva nsha kaengeṛia iroywa da.

²⁷ Ili andeita mboni ta Yesu, kasha numa yamwi kaira isyamuń lia. Kabaana nkyendu wa nseto wamwi.

²⁸ Fulya andeku-saṛa: Kwakooya nabaana nkyendu wa nseto wamwi tubu, vvaa nsha buṛu.

²⁹ Lia eni saka yamwi ikafikya. Kaita vviliń wamwi sheeli ankia.

³⁰ Lia eni Yesu kamanya nrimiń wamwi, sheeli ammuukwa mfinya. Kaindukia isyamu lia lya vandu kanumbua: Ni i abaana miseto yakwa?

³¹ Vanalosho vamwi vakamwia: Kulolie kasa isyamu likusisiṛie se? Nawe kwanumbua: Ni i ashibaana?

³² Kaiṅuṛuṅuṛu koose, amu alolie ito ambaana.

³³ Na nka ulya kawarwa wweṛei na irerema, fulya eeishii kilya kyawia. Kasha kawwoya kamwongoya foose na udede.

³⁴ Nae kamwia: Mwanakwa, ikusura lyafo lyanku-kiṛa. Enda na unambwe, va nsha kutakyuywa lingi nkivawwo kyo!

³⁵ Neeli eekireraa, vakasha vandu vauka kwa nnini ulya wa numba ya iterevya vakanumbua: Mwana wafo ammaa ifwa. Nkiki kukee ituṛuyań llosha uu?

³⁶ Yesu kaita kirero kilya kiirerwaa kaia nnini wa numba ya iterevya: Manya kutaeṛee! Kusure tubu!

³⁷ Ana nta andeotoṛia nndu aendaa nae ndi kita Petiro na Yakobo na Yohane mwanamae wa Yakobo.

³⁸ Vakafika kyeń kwa nnini ulya. Kakooya-fo kiṛoṛongyo na kiiyo na iishiṛa nnu.

³⁹ Kavaia: Nkiki ili mukee iṛoṛongya na iiya? Mwana uu amfwa ndi, niikai alele ruo.

⁴⁰ Nawo vakanseka. Nae ili andemaa ivasomuta wooṛo woose, kakurika ndee wa mwana ulya na mae na valya ariani nawo. Kaira na kulya mwana ulya akai.

⁴¹ Kawara mwana ulya uko kamwia: Talita kumi! Misendie yayo nkimwi na: Mwana nakuia kwimboo!

⁴² Na lia eni mwana ulya kakwimboo kaṛuaṛua. Nae amaye myaka ikumi na ivili. Lia eni vakaṛiika iṛiika inini.

⁴³ Nae kavavavasa nnu, manya nndu amanyaa mboni ii. Kanumbua mwana aniingwa shoonga.