Mariko 14 - MMA SHIYYA

¹ Ili ikiseere mikonu ivili kisuku kya Pasaka kive na kyeeri kya mikate itadookie, vakohani vanini na vaaṛia va mitisiṛie vakaraya shia ya iwwara na ntambwe, amu vawwaa.

² Fulya vanumbua: Manya kitave kyeeri ki kya kisuku, kaaṛa litave irabuule vanduń.

³ Nae ili eekee Betania ifo numba kwa Simon ulya eelolee ivave, akee rembo shoongeń. Llyo asha na-wo nka arie kawembe kawore mafura a kisaamu a uuru unini. Kafunua kiwembe kilya kalletia nrweń wamwi.

⁴ Na io veeyoo vandu vandesua mirimiń yawo vakanumbua: Naamu ki ili vakee ifwalafwala mafura va a kisaamu kuri?

⁵ Amu mafura va eemakii ikumbwa na shilingi mayana araru na kilanya, tiniingwa vakiva. Vakaṅuṅuria nka ulya.

⁶ Yesu kanumbua: Ntień! Nkiki ili mukee imwatarisa? Anshiṛundia ishoṛa isha.

⁷ Amu vandu vakiva mukee nawo mikonu yoose, na kyeeri kyoose mufurie mumakii ivatania fisha. Kake niń mukee nań mikonu yoose ndi.

⁸ Antana sheeli amakii. Atembeṛie yamba vvili wakwa mafura kiimba kya iṛikwa lyakwa.

⁹ Nkue namuia: Kundo koose kukwanisyo̱o̱ nrumi ii shisha ya Iṛuva, na kindo ki akitana kisendwaa, nae akumbulwaa.

¹⁰ Na Yuda Isikariote akee umwi wa valya ikumi na vavili kaenda kwa vakohani vanini, amu andiinge kwawo.

¹¹ Nawo ili vandeita vakafura vakanrekia inniinga fesa. Nae kaṛuya mwaanya uu uvaa anrambikie.

¹² Kyasia nkonu wa mbele wa ilya mikate itadookie ili vasikya yaanri lya Pasaka, llyo vanalosho vamwi vamwia: Nkwi kufurie teende tindesongosia andu kuliyaa Pasaka?

¹³ Karuma vanalosho vamwi vavili kavaia: Endeń kulya muṛiń! Mfo mukwaniaa na nseṛo arie mura na nungu. Nsoṛeń numa.

¹⁴ Na io aakiaa na-wo, ień muni numba: Llosha akuia vai: Nkwi numba ya veeni ikai, lliye-wo yaanri lya Pasaka andu emwi na vanalosho vakwa?

¹⁵ Nae amoorasaa kiṛi kinini kya ringewu kikee kisongosie. Ifo mfo mutisongosiaa.

¹⁶ Vanalosho valya vakakwimboo vakaenda muṛiń vakalolia sha lia avaia. Vakasongosia-wo Pasaka.

¹⁷ Kyasia ili kundeva ukwawuń, kasha na-wo andu emwi na valya ikumi na vavili.

¹⁸ Neeli vakee rembo veelyaa shoonga, Yesu kanumbua: Nkue namuia: Umwi wanu ashiṛiingaa, nae akee ilya shoonga andu emwi nań.

¹⁹ Vakabooka inaria na imwuṛa umwi umwi: Kulla nniń naań?

²⁰ Nae kavaia: Ni umwi wanu ini ikumi na vavili, ni ito akee iliana nań kyashoń kimwi.

²¹ Mwana wa nndu aendaa shia yamwi sheeli eentisiṛyo̱o̱. Kake ushi nndu to Mwana wa nndu asheṛiingwaa yye. Kiikee ṅwana kikooye kitaare nndu to awonika.

²² Neeli veelyaa kaimboo nkate kaana Iṛuva kaufukyafukya. Kavaavia kanumbua: Ngyeń! Uu ni vvili wakwa.

²³ Kaimboo umbata kaana Iṛuva kavaniingia vakalunwa woose.

²⁴ Kavaia: Ilu ni usao lwakwa luvaa mma shiiya lwiritwaa kiimba kya veengi.

²⁵ Nkue namuia: Nkinwaa neeni minuye ii ya nsabibu ndi kumande nkonu ulya nndenwaa neeni miiya ifo umangiń lwa Iṛuva.

²⁶ Ili vandemaa iimba, vakasomuka vakaenda alya uroń lwa misenifu.

²⁷ Yesu kavaia: Ini mu woose mununuaa kiimba kyakwa. Fulya kikee kitisiṛe: Nkabaa mwisi na maanri anyanyakaa.

²⁸ Kake numa nammaa iṛuka mwiriaa mbele yenda kulya Galilaya.

²⁹ Petiro kamwia: Na kwakooya woose vanunuaa kiimba kyafo, niń nnunuaa ndi.

³⁰ Yesu kamwaṛua: Nkue nakwia: Kio ki kya nnu kitaare nguku ya shawu yamiikoro kavili kukooyaa kwanshikana kararu.

³¹ Nae kaengeṛia nnu irera kanumbua: Na akwaa kyawara mfwe andu emwi nawe, nkukanaa kutu ndi. Na woose vakarera kuro.

³² Numa vakasha kumande nndeń livaangwaa Getisemane. Kaia vanalosho vamwi: Kaań rembo ia kumande mmaa itereva.

³³ Nae kaenda ariani na Petiro na Yakobo na Yohane. Nae kabooka iva-ṛikwa ni irima na isavaa.

³⁴ Kavaia: Nrima wakwa uwore unaari nnu kufui na ifwa. Kaań ia mulale rembo!

³⁵ Kaserika na kwa mbele kinnya. Kawa na si katereva Iṛuva eenumbuaa: Kwakooya kivaa, saa yo iire mbaai.

³⁶ Kanumbua: Abba Nde, ifo kwafo findo foose fimakii iva. Kyasia itań umbata lu kwaasha lushuuke! Kake manya kitave sheeli niń mfurie ndi, nsheeli iwe kufurie.

³⁷ Kasha kakooya valele ruoń. Kaia Petiro: Simon, kulele da? Kumakii ilala rembo nań nta saa imwi ndi?

³⁸ Laleń rembo mwiterevaa, amu mutawe nreyoń. Nrima to ufurie itomaa, kake vvili ni llemwa.

³⁹ Kaenda lingi katereva Iṛuva eereraa firero filya feni.

⁴⁰ Kauya lingi kakooya vallala, amu miso awo eemeemeriswaa nruo. Nawo nta vamanya kya imwaṛua ndi.

⁴¹ Kasha lya kararu kavaia: Laleń kyeeri kingi na iimuya! Kifile kuri. Saa yammaa ifika. Mwana w nndu arawaa maa-koń a vandu varekwa.

⁴² Kwimbooń teende! Lleń te ndiingi ulya ashiṛiingaa ansha kufui.

⁴³ Neeli eereraa kuri, lia eni Yuda kasha akee umwi wa valya ikumi na vavili, ariani na isyamu varie shombo na ndata, varumwa vvakohani vanini na vaaṛia va mitisiṛie na vasuṛi.

⁴⁴ Na ulya andiingie eevvaniingyaa myorusie eenumbuaa: Ulya mmwongaa miimo, yye muwwaraa munkurike kinsha.

⁴⁵ Neeli andefika, kanserikia kanumba: Llosha nini, kia! Kamwonga miimo.

⁴⁶ Nawo vakasaaṛa maako vakawwara.

⁴⁷ Na umwi wawo wa valya veeyoo kasomua shombo yamwi kakaba nayo iketi lya nkohani nnini kamminya kuri.

⁴⁸ Na Yesu kaaṛua kavaia: Mwansha murie shombo na ndata mushiware sheeli nkee kisoki.

⁴⁹ Nań mikonu yoose niikee neeni niiloshaa ifo numba ya Iṛuva, nta ishiwara. Kake kyawa kuro, amu mitisiṛie yawukie.

⁵⁰ Llyo vakantia-wo woose vakarisha.

⁵¹ Na io eeyoo nseṛo nkoo ariani nae aṛee nseto mwelwa vviliń wamwi. Nawo vakafura iwwara.

⁵² Nae kavaotoṛia nseto ulya mwelwa karisha akee kya ruu.

⁵³ Nawo vakakurika Yesu kwa nkohani nnini. Vakakusandia-wo vakohani vanini woose na vasuṛi na vaaṛia va mitisiṛie.

⁵⁴ Nae Petiro kallatia eendeaa kikwaasha, kumande afika wooṛo kwa nkohani nnini. Kakaa rembo andu emwi na maketi eeoraa muro io kwelwa.

⁵⁵ Kyasia vakohani vanini na vanini va kikwena vakaraya kindo kya imfingia, amu vakooye mwaanya wa iwwaa, nta ilolia.

⁵⁶ Amu weengi vamfingia findo fa wongo, kake uṛiingi lwawo lwave lumwi ndi.

⁵⁷ Na vengi vakasalala-wo vakamfingia findo fa wongo veenumbuaa:

⁵⁸ Ise tammwita eenumbaa: Niń mburuaa numba ii ya Iṛuva indetanwa na maako, lingi ntanaa ingi kari ka mikonu iraru kitaare yatanwa na maako.

⁵⁹ Lingi na akwaa nkuro uṛiingi lwawo lwave lumwi ndi.

⁶⁰ Llyo nkohani nnini akwimboo kasalala karikari. Kauṛa Yesu: Nta kureraa kyafo kya yaraa filya vandu iwo vakee ikuṛiinga nafo ndi?

⁶¹ Nae kasia do, nta yaraa kirero. Nkohani nnini kamwuṛa lingi kamwia: Iwe ni iwe Kristo Mwana wa ulya aarafumwa?

⁶² Yesu kanumbua: Nniń ye. Neeni muloliaa Mwana wa nndu akee rembo uko usha lwa muni finya, ashaa ariwa mmaṛumbe a iṛuvewu.

⁶³ Llyo nkohani nnini arandaranda miseto yamwi eereraa: Nkiki tikiṛuyaań lingi vakureki?

⁶⁴ Mwamiita firumu famwi fa irama Iṛuva. Mwaloliań are? Woose vakafukya: Kyawara awalwa.

⁶⁵ Na kiindi vakabooka immishia manyiiri na insikia miso na inkaba na ṅunde na imwia: Ringisia! Na maketi nawo akawwara akankaba na ngyui.

⁶⁶ Na Petiro eekee rembo io wooṛo. Kasha umwi wa masinga a kika wa nkohani nnini.

⁶⁷ Kalolia Petiro eeoraa muro. Kamulla kamwia: Na akwaa ni iwe kwikee andu emwi nae ye Yesu wa Nasareti.

⁶⁸ Kakana kanumbua: Niishi ndi ana niisile filya kukee irera ndi. Kasomuka wooṛo kafika io ngiṛiń. Na nguku ya shawu ikaikoro.

⁶⁹ Na isinga lia lya kika likallolia lingi likabooka iia valya veeyoo: Uu ni umwi wawo.

⁷⁰ Kakana lingi. Kwa numa kinnya valya veeselelee-wo vakaia Petiro. Nkue kukee umwi wawo, amu nawe kukee wa kulya Galilaya da.

⁷¹ Nae kabooka ikudenga na ilya ikite: Niishi nndu uu mukee inumbua ndi.

⁷² Na lia eni nguku ya shawu ikaikoro lya kavili. Petiro kakumbua kirero kilya Yesu eemwiaa: Kitaare nguku ya shawu yamiikoro kavili kushikanaa kararu. Neeli andekumbua kuro, kaiya.