Barua ya Yakobo 2 - MMA SHIYYA

¹ Vanavama, manya mutakusaṛe sheeli ikusura Nndumi weru Yesu Kristo muni wa unini liitani na ikundia vandu.

² Amu kwakooya ifo ikwanioń lyanu aakaafo nndu awore nrashi ta saabu miniń, aṛee na miseto minuru, lingi kaaka-fo nkiva aṛee miseto misalutu —

³ neeni mukalla ulya aṛee miseto minuru na imwia: Iwe kaa rembo ia anuru, na iia ulya nkiva: Iwe salala ifo ana kaa rembo ia marendeń akwa,

⁴ a le mwantana se ilomi mirimiń yanu mukava vafukya vawore makusaṛo makasha? Vanavama vakunde, aranyiń: A Iṛuva asaua se valya vakee vakiva va kunu isangeń vave masimba a ikusura na vayadiṅu ya umangi eendeeṛiaa valya vankundie?

⁶ Kake ini mwamiila nkiva ulya. A masimba wwo se vakee imulamia na imurwaa mbele ya fifumbi fa uumisio?

⁷ Iwo wwo se varuma irina lia isha lindemusendio̱ (ubatisoń)?

⁸ Ee da kwakooya mwaawutia ivavaso lia lya kimangi sheeli kikee kitisiṛe: ”Kunda nndu ungi sheeli kukukundi ku muni“, mwantana kisha.

⁹ Kake mukankundia vandu mwantana ireko na yumisio̱ ni ivavaso sha vatana fikasha.

¹⁰ Amu kwakooya nndu aindia mavavaso woose kakasheesa-wo limwi tubu, ammaa ikasheesa woose.

¹¹ Amu ito anumbuye: Manya kutaaike, yye muni anumbuye: Kutawaa vandu. Nawe kwara kutaaika, kake kwavva wwaa, kyasia kwammaa ikasheesa mavavaso.

¹² Rereń na itana taniń kuro sha vandu vairikie mavavaso afingie nrumi shisha ya Iṛuva vakakunda yumisio̱ kisumani na mavavaso wo.

¹³ Amu nndu ateeworee ililia ito aumisio̱o̱ kyumu atakooyaa ililio̱ nta. Kake muya ililia aendaa uumisioń luteefo weṛei.

¹⁴ Kyelekaa ki, vanavamae vakwa, kwakooya nndu anumbua: Nkusurie Iṛuva atawore mitanie? Ikusura lya mikae ii limakii inkiṛa?

¹⁵ Kwakooya nndu mwanamae ana mfwamae atuṛa kya iṛaa kaanguywa nshoonga

¹⁶ na umwi wanu kavaia: Endeń na unambwe, oreń muro, wuureń, kavaima kilya wili wawo ufurie, iki kivaelekaa ki?

¹⁷ Mfo kuro ikusura fitawore mitanie ni ifu, fulya fikee lyo yeni.

¹⁸ Eeba eefo nndu anumbuaa: Iwe kuwore ikusura, nań noore mitanie. Shiorusa ikusura lyafo litaare mitanie, nań nkworuse ikusura lyakwa kwa shia ya mitanie yakwa.

¹⁹ Iwe kukusurie sheeli Iṛuva ni umwi, kwankusura kuro nkinuru. Masatana nawo vakusurie iki na irerema.

²⁰ A iwe kukee nndu atakusaṛie kindo kumanyaa se, sheeli ikusura fitawore mitanie nkindo kya ruu?

²¹ A nde yeru Abraamu andesumaniswa se kwa mitanie, ilyo andeniingia mwana wamwi Isaki ave kirasio?

²² Kulolie sheeli ikusura lyamwi lindeṛunda mashoṛa andu emwi na mitanie yayo na sheeli ikusura lyo lindeawukia kwa shia ya mitanie ilya.

²³ Kikaawukia kilya kikee kitisiṛe sheeli: Abraamu akusura Iṛuva kataalio̱ sheeli ni usumani kwamwi. Nae kavaangwa ndoo ya Iṛuva.

²⁴ Mulolie sheeli nndu ataalio̱ usumani kwa mitanie yamwi, nta nkwa ikusura lyo yeni ndi.

²⁵ Mfo kuro na akwaa ni Raabu nka ulya wa shia andetaalika se sheeli awore usumani kwa mitanie, lia andewaria varumi valya kavasama na shia ingi?

²⁶ Amu sheeli wili utawore mumuyo ukee mfu, mfo kuro na ikusura lituṛie mitanie ni ifu.