Barua ya Yakobo 1 - MMA SHIYYA

¹ Niń Yakobo nkee iketi lya Iṛuva na lya Nndumi Yesu Kristo. Neesana ngyufwari tilya ikumi na ivili tikee shinyanyate kari ka vayavaṛumu.

² Vanavama, kwakooya mwawoywa mmireyo ya mikae miingi, fureń nnu

³ mwimanyaa sheeli yelelio̱ lya ikusura lyanu linnde ikuumisa.

⁴ Kake ikuumisa kyawara limarisie mashoṛa ayo, amu mwawutie ishia na isumanika mutarewa numa kya ifi na ifi.

⁵ Kake kwakooya umwi wanu atuṛa uṛango, atereve Iṛuva aniinga woose na uwoo atakiuṛaa nndu numa, nae aniingwaa.

⁶ Kake antereve na inkusura atanunue nrwe. Fulya ulya akee inunua nrwe avakani na ivia lya nruveń likee ivivitwa mmburaato na yeeṛwaeeṛwa ifo na ifo.

⁷ Nndu ulya atakusaṛe sheeli aniingwaa kindo ni Nndumi.

⁸ Amu ulya awore mirwe ivili aseṛeesaa shia tamwi ndi.

⁹ Kake mwanamae akee ntele akuṅinisie unini lwamwi.

¹⁰ Na muyamasaa akuṅinisie utele lwamwi, amu asiaa sha kivaṛo kya maṛe.

¹¹ Amu saa ikankwimboo na ivaa na uvave yumisaa maṛe na fivaṛo fayo finaa na unuru lwayo lwa isenya miso lumamiaa. Mfo kuro da na muyamasaa asiaa shień tamwi.

¹² Wwa ngoma nndu asisiriaa mireyoń. Amu kammaa ivinga aniingwa muu utakisiaa uve uvingo lwamwi lua Iṛuva anrekia valya vankundaa.

¹³ Nndu katevetwa kantana kikasha manya atanumbue: Ni Iṛuva anshiteveta. Amu Iṛuva amakii itevetwa nngyukasha ndi ana ye atevetaa nndu ndi.

¹⁴ Kake nndu woose atevetwa na yomulwa ni ilanga lyamwi ye muni.

¹⁵ Numa ilanga likaṅṅina likee iira mareko. Na mareko akawiṛa akee iira ufu.

¹⁶ Mutakulembe, vanavamae vakwa vakunde!

¹⁷ Kindo kyoose kikee kinuru na kindo kyoose kikee kisongori tubu nkyo kyukaa ule kwa Nde wa langa atawore miilashie ya langa na ya llema.

¹⁸ Kwa mifurie yamwi antiira lya kavili na kirero kyamwi kya dede tive vasaue kari ka findo filya fantanwa yye.

¹⁹ Iki mukiishi, vanavama vakunde. Kyasia nndu woose ave mwaangu wa iita na mwemeri wa irera na mwemeri wa ituṛuka.

²⁰ Amu ituṛuka lya nndu litanaa fisenye Iṛuva ndi.

²¹ Kwa ikyo kuuteń ukwe loose na ukasha lua lukimuwore. Na kirero kyo kyanroongwa kwanu kiwarień na uwoo kimakii ikiṛa mirima yanu.

²² Veń vaṛundi va kirero, manya mutave vaaranya da, amu kuro mukee ikulemba mu veni.

²³ Amu nndu akee mwita wa kirero atakee na muṛunda nndu wa mikae ii avakani na nndu akulla kisangu kyamwi na kilola.

²⁴ Kammaa ikulla kaenda karekio̱ ree sheeli eekaii.

²⁵ Kake ulya amaa imanya mavavaso a Iṛuva afingie nrumi shisha na ikaa nawo na nrima wamwi woose atakee murekio̱ wa filya amiita, kake kava muṛunda mashoṛa, uu avaa wa ngoma uṛundiń lwamwi.

²⁶ Kwakooya nndu akumanya ye muni sheeli ni ndundia Iṛuva, nae atamakii ivinga ulumi lwamwi, kake akee ilemba nrima wamwi muni, ito uṛundi lwamwi llwa ruu.

²⁷ Uṛundi lusenye lutawore ilomi kisanguń kya Iṛuva Nde llo ilu: Ni isengera vana va ngwera vandefiywa wasuṛi vawo na isengera vaka misiketi ngyukiveń tawo na ikuringa findo fa isanga fikee iṛindisa nrima.