Barua ya Varome 3 - MMA SHIYYA

¹ Kwakooya nkuro naare Vayuda vakilie vengi? Na irinwa lyeeleka ki?

² Kyelekaa nnu kwa shia yoose. Lya mbele vanrambikio̱ firekio fa Iṛuva.

³ Alli nkiki kwakooya kiindi kyawo vatankusurie? A le ilea ikusura lyawo limakii ikasheesa usongori lwa Iṛuva?

⁴ Nkuro ndi! Iṛuva alolikie sheeli wwa dede na nndu woose ni llembi, sheeli kyatisiṛwa: ”Amu kulolike sheeli kuwore udede ifo fireroń fafo, kuvinge ili kwiakaa uumisioń“.

⁵ A le Iṛuva arekio̱ atiendee uvaave? (Narera kwa mikae ya kinndu.)

⁶ Nkuro ndi. Kifo kiivaa kuri, naare Iṛuva eemakii yumisia isanga lyoose?

⁷ Kake kwakooya udede lwa Iṛuva lwameengeṛia unini lwamwi kiimba kya wongo yakwa, naamu ki ili niń nkee ikyumisio̱ sheeli nkee nrekwa?

⁸ Naamu ki ili titareraa, sheeli tindefingio̱ na vengi vakakaarisia irera sheeli ise tarera kuro: Ndefo titane fikasha, amu finuru fishe? Vandu va mikae ii vatuṛaa uumisio lwawo lwa yumisio̱ ni Iṛuva lusumani nawo ndi.

⁹ Alli naare? Ise Vayuda tikilie? Wode, nta kinya ndi. Amu ise tammaa irambuya Vayuda na Vagiriki sheeli vakee kwa si ya mareko woose.

¹⁰ Kasa kyatisiṛwa: ”Eefo nsumani nta umwi ndi.

¹¹ Eefo ndango ndi, eefo aṛuyaa Iṛuva ndi.

¹² Woose vanrekwa, woose deń waboru, eefo mutana finuru ndi nta umwi“.

¹³ ”Ikoṛokoṛo lyawo lyawa mbanga iverie nnyiṅa, ngyulumi tawo tireraa fa ntambwe.“ ”Saiye ya shoka ikee kaniń kawo.“

¹⁴ ”Kana kawo keeshule kiiraro na kivawwo.“

¹⁵ ”Marende awo akee isaṛikia iirita usao.

¹⁶ Ikasheesa na manunua fikee shień tawo.

¹⁷ Nta shia ya unambwe vandeimanya ndi.“

¹⁸ ”Yeṛea Iṛuva liifo kwawo ndi.“

¹⁹ Kyasia ise tiishi sheeli findo foose firerwaa mmavavaso akee irera na iwo vakee kwa si ya mavavaso, amu kana kaase karaywa na isanga lyoose likaa kwa si ya uumisio lwa Iṛuva.

²⁰ Amu eefo nta nndu ataalio̱o̱ usumani kiimba kya mavavaso kisanguń kya Iṛuva ndi. Amu kindo mavavaso aendee nndu ni imanya mareko tubu.

²¹ Kake alli usumani lwa Iṛuva lwammanyiswa ateefo mavavaso. Kake lwanrambulwa mmavavaso iva na waauya valya.

²² Nalo ni usumani lwa Iṛuva lukooywaa vvalya woose vakuwaraa na ikusura Yesu Kristo veenkusuraa deń. Amu wifo mwavanu ndi.

²³ Amu woose warekwa na yanguywa ntikisi ya Iṛuva.

²⁴ Vakee itaalio̱ usumani kya ruu kwa ililia lyamwi, fulya vakee vataue ni Yesu Kristo.

²⁵ Amu yye Iṛuva andenrwaa ufuń ave mwitanisa wa iitanisa na usao lwamwi valya woose na Iṛuva vankusurie. Katana kuro, amu amanyise usumani lwamwi weni eesisiriaa nta ifukya mwaandu wa mareko alya woose entanwaa kuuka mbele.

²⁶ Nakyo kikava, amu aoruse usumani lwamwi kyeeri ki kya alli, ave muya usumani ye muni na itaalia na ulya woose akusuraa Yesu usumani.

²⁷ Nkwi ukuṅinisi lwafo lukai? Lwanraywa wooṛo. Nkwa ivavaso lya mikae ki? Nkwa ivavaso lya mitanie? Wode! Kake nkwa ivavaso lya ikusura.

²⁸ Kyasia takuutia-wo inumbua sheeli nndu wa vandu akee itaalio̱ usumani kiimba kya ikusura lyo yeni kitaare iifo mitanie ya mavavaso.

²⁹ Ana naare? Iṛuva ni Iṛuva wa Vayuda da? Yye na Iṛuva wa vayavaṛumu se? Ee ni Iṛuva wa vayavaṛumu nawo.

³⁰ Kwakooya kya dede Iṛuva ni umwi ito ataaliaa iwo varini usumani kiimba kya ikusura, na iwo kitaare vvarine avataaliaa usumani na kiimba kya ikusura lyo yeni.

³¹ Kyasia naare? Tamfukya mavavaso kiimba kya ikusura? Wode! Andu a ikyo tikee ikaarisa mavavaso.