Barua ya Varome 2 - MMA SHIYYA

¹ Kwa ikyo iwe nndu na kwava i kuwore nta kindo kya ikuuta ndi, ili kukee yumisia ungi. Amu filya kukee yumisia nndu ungi kwankuumisia iwe ku muni. Amu filya kwaumisia kukee ifitana fo feni.

² Neese tiishi sheeli uumisio lwa Iṛuva llwa dede kwa valya vakee itana ifo.

³ Iwe nndu, kukee yumisia valya vakee itana ifo, nawe ku muni kwatana ifo feni, naare iwe kukusaṛie sheeli kukuiwutaa uumisio lwa Iṛuva?

⁴ Ana kukee iila wiingi lwa usha lwamwi na isisiria lyamwi na ulalamboo lwamwi, iwe kutakee imanya sheeli usha lwa Iṛuva lukee ikwomua kukooye ikurra?

⁵ Kake iwe kuwore uumu na ngoo shuumu kwalea iilashika, kukee ikwengeṛia ituṛuka ku muni likushee nkonu ulya wa uumisio na irambuka lya uumisio lwa usumani lwa Iṛuva.

⁶ Llyo ataiyaa nndu woose kilya kisumani na mitanie yamwi.

⁷ Iwo vatakee yaraa itana fisha veeṛuyaa unini na tikisi na ikaa kitaare vakashaa iwo avaniingaa muu utasiaa.

⁸ Kake vayauṛiingi valea iirikia filya fikee fa dede, fulya wo vasenywaa mfa ureti, iwo vakooyaa ituṛuka na uumisio.

⁹ Mavaviso na isisiṛwa fisheaa nrima wa nndu woose ulya akee itana fikasha, wa mbele mMuyuda na Ngiriki da nae.

¹⁰ Kake ulya akee itana fisha aavio̱o̱ unini na tikisi na unambwe, wa mbele mMuyuda na Ngiriki da nae.

¹¹ Amu Iṛuva kwamwi awore wa mungo ana wa kivari ndi.

¹² Amu woose vanderekwa vatawore mavavaso varekaa ateefo mavavaso. Na valya woose vanderekwa vawore mavavaso vaumisio̱o̱ mmavavaso.

¹³ Amu valya vamiita mavavaso vakee vasumani mbele ya Iṛuva ndi, kita valya vaindiaa mavavaso a Iṛuva wwo vataalio̱ sheeli vvasumani.

¹⁴ Amu vandu va vayavaṛumu vatawore mavavaso ili vakee itana kwa mikae yawo filya fikee kari ka mavavaso, kyasia iwo vatawore mavavaso vawa mavavaso kwa mimanyie yawo veni.

¹⁵ Iwo vakee yorusa ishoṛa lya ivavaso likee itisiṛe ngooń tawo, mimanyie yawo ikee ivarambuya na makusaṛo awo meni kwa meni eevauṛaa ana ivakabania.

¹⁶ Ifi Amanyikaa nkonu ulya ili Iṛuva aniingaa Yesu Kristo irambua fiṛisi fifisio̱ wandu. Ii yyo nrumi shisha nndeniingio̱.

¹⁷ Kake iwe eeba kukee ikusenda Muyuda wa dede na mukusura mavavaso na ikwitikisa sheeli kukee wa Iṛuva.

¹⁸ Kwamanya mifurie yamwi na iirikia filya fikee fisha, nawe kukee lloshe mavavaso.

¹⁹ Kwakusura kwafo deń sheeli iwe ku muni kukee ndongori wa midoń, kukee langa ya iwo vakee llemiń.

²⁰ Kukee llosha wa variṅani, kukee llosha wa vana vannya, kukee muni mikae ya waṛia na ya dede fuukie mavavasoń.

²¹ Kyasia iwe mulosha ungi a le kukuloshaa ku muni se? Iwe kukwanisaa sheeli nndu ataive, nawe kwaiva ku muni?

²² Iwe kunumbuaa sheeli nndu ataaike, nawe kwaaikaa ku muni? Iwe kusuaa fifu, nawe kureyaa maranga?

²³ Iwe kukwitikisaa na mavavaso, nawe kufukiyaa Iṛuva tikisi kwikasheesaa mavavaso amwi?

²⁴ Amu “Irina lya Iṛuva likee iteendwa ifo kwa vayavaṛumu kiimba kyanu”, sheeli kikee kitisiṛe.

²⁵ Amu irinwa nkisha, kwakooya kukee mu wara mavavaso. Kake kwakooya kukee mfaringa mavavaso, irinwa lyafo lyawa sheeli kutakee nrine.

²⁶ Kyasia kwakooya ito atakee nrine awaraa filya fikee fivavase mmavavaso, a le ilea irinwa lyamwi litaalwaa se sheeli ni nrini?

²⁷ Na ito aawutiaa mavavaso atakee nrine kwa kimia a le akuumisiaa se iwe kuwore urini kwakasheesa mavavaso?

²⁸ Amu ye mMuyuda ndi akee Muyuda kwa wooṛo da ana urini llo lua lwa wooṛo wiliń ndi.

²⁹ Kake ye mMuyuda wa dede akee Muyuda ifo nrimiń na urini llwa ngooń yamiiliswa mMumuyo liteefo ivavaso. Tikisi ya Muyuda uu yukie kwa vandu ndi kita nkwa Iṛuva muni.