Barua ya Vaefeso 5 - MMA SHIYYA

¹ Kyasia veń vandu vasoṛaa Iṛuva sha vana vakunde.

² Muware ikundana, sheeli na Kristo andetikunda kakuniingia kiimba kyeru ave nsimbika wa kirasio kya kwa Iṛuva kiwore nningo uwore kisaamu kinuru.

³ Kake findo fa waaisi ana fa ukwe ana fa unyuku fitasendwa kwanu kutu ndi, amu iki kisumani kwa vandu vasongori ndi,

⁴ nta firero fa usutu ana fa usaṛe lwa beṛebeṛe ana kitavanu kikasha, kake kinuru yyaana Iṛuva.

⁵ Amu iki mumanyaa, sheeli nndu mwaaisi ana nndu awore ukwe ana nndu nnyuku akee sha nndu akee iṛundia iṛuva lya wongo arwaa diṅu ifo umangiń lwa Iṛuva na lwa Kristo ndi.

⁶ Nta mutalembwa ni nndu na firero fa iiṅana, amu kiimba kya findo fa mikae ii ituṛuka lya Iṛuva lyolokiaa valya vambiṛie.

⁷ Kyasia manya mutaliani nawo.

⁸ Fulya mbele mwikee va llema, kake alli mukee va langa, fulya mukuwore na Nndumi. Rueń sha vana va langa.

⁹ Kilya Mumuyo wa Iṛuva avikaa ni usha na usumani na findo fa dede.

¹⁰ Elelień kilya kisenyaa Nndumi.

¹¹ Manya mutave vaaroe va valya vatanaa mitanie ya llema itasenyie, kake varerień.

¹² Amu filya fikee itanika kwawo kiṛisiń foore sonu na akwaa ni ifirera.

¹³ Kake foose filya fikee irerio̱ firambulwaa llanga, amu kilya kikee kirambue kikee langeń.

¹⁴ Kwa ikyo kikee kirere: ”Kwimboo iwe kulele, salala kuuke kwa vafu, na Kristo akumulikiaa“.

¹⁵ Kwa ikyo lleń nnu weendo lwanu kasa mwendaa, kaaṛa mutave vatondo, kake muve vaṛango.

¹⁶ Manya mutatuṛe mwaanya wa iṛunda kisha, fulya feeri ifi fa alli fikee fikasha.

¹⁷ Kiimba kya ikyo manya mutave variṅani, kake veń vandu vatanaa kilya Nndumi akundie.

¹⁸ Ana manya mutanangwa wwari, amu uretaa weendo usha, kake veń vandu veeshue Mumuyo wa Iṛuva.

¹⁹ Veń vandu vatele vaimbaa ngyufina ta Iṛuva ta imwaana na ta imwitikisa tikee ta mikae ya Mumuyo mwiimbiaa Nndumi na langa lya nrima.

²⁰ Na iva muve vandu vaana Iṛuva Nde kyeeri kyoose kiimba kya foose mwantanio̱ mukuwore na Yesu Kristo Nndumi weru.

²¹ Kunyiisianiń findoń foose mu veni na mu veni mwieṛeaa Kristo.

²² Vaka vaindie womi wawo sheeli veendiaa Nndumi.

²³ Amu mmi ni nrwe wa nka wamwi, sheeli na Kristo akee nrwe wa siṛi, nae muni ni nkiṛa wa vvili wamwi.

²⁴ Sheeli siṛi iindiaa Kristo, mfo kuro na vaka nawo veendie womi vawo findoń foose.

²⁵ Neeni womi, kundeń vaka vanu sheeli na Kristo andekunda siṛi kakuniingia kiimba kyayo,

²⁶ amu aiilisie Iṛuva eeisangyaa na mura wa ubatiso ukulunganisie na kirero kya Iṛuva,

²⁷ amu akooye siṛi yoore unuru itawore ukavili ana ikwotuaotua ana nta kimwi kari ka ifo, kake ive shisongori itawore malomi.

²⁸ Mfo kuro da kyawara womi nawo vakunde vaka vawo sha mivili yawo veni. Ulya akundie nka wamwi akukundie muni.

²⁹ Amu nta eefo nndu asuaa vvili wamwi muni ndi, kake auwuurusaa na iulla, sheeli na Kristo nae ataniaa siṛi yamwi.

³⁰ Fulya ise tikee meeṛo a vvili wamwi.

³¹ ”Kiimba kya ikyo nndu nseṛo atiaa ndee na mae alungane na nka wamwi, nawo vali vavili vavaa vvili umwi.“

³² Kiṛisi ikyo nkinini, kake niń nasenda nakyo mboni ta Kristo na siṛi.

³³ Kake nndu woose wanu akunde nka wamwi sheeli akukundie ye muni. Ana manya nka atarekio̱ iindia mmi wamwi.