Barua ya Vaefeso 4 - MMA SHIYYA

¹ Kyasia niń nkee mfinge kiimba kya Nndumi namwikimba ini muware weendo lusumani na ivaangwa li mwavaangwa nalyo.

² Muve vandu va useli na va uwoo na va isisiria na va yelekana na ikunda.

³ Kwa ikyo sheeli Mumuyo andemwaṛua mukava kimwi engeṛień ikulunga na witanu.

⁴ Vvili ni umwi na Mumuyo ni umwi na iverea lya ivaangwa lyanu mwavaangwa nalyo llimwi.

⁵ Nndumi ni umwi na ikusura llimwi na ubatiso llumwi.

⁶ Na Iṛuva ni umwi, yye Nde wa woose, yye na mushilia woose, yye na mulela woose, akee na kwa ule ya foose.

⁷ Kake ti woose tamaavio̱ ililia kwa kiṛengo kya kyelelio kya wavi lwa Kristo.

⁸ Kwa ikyo nkirere: ”Uu anderwa na ule kawara maketi kaniinga vandu wavi“.

⁹ Kyasia kirero kyo: ”anderwa“ misendie yayo nkiki kwakooya kitaare ni inumbua, sheeli ye nae andeoloka mbele kumande taari ta si ya isanga?

¹⁰ Na ulya andeoloka yye muni anderwa kwa ule nnu kita iṛuvewu lyoose, amu aawutie findo foose.

¹¹ Nae yye andeaṛua vengi vave varumi na vengi vave vaauya na vengi vave vakwanisa na vengi vave veesi na valosha.

¹² Kikava kuro, amu asumanise vasongori, amu mashoṛa a iṛundia vengi aawukie na vvili wa Kristo — nto ini — usongosio̱.

¹³ Kumande ise ti woose tifikiaa ikusura limwi na imanya nnu Mwana wa Iṛuva. Kuro llyo iva nndu asongoviswa, kumande tifikiaa unini lwa kyelelio kya usongovisi luukie kwa Kristo.

¹⁴ Amu titakikaa lingi sha vana vannya tikurikwaa ifo na ifo sha mavia a nruva mmiloshie yoose ya vandu ikee yaṛukaṛuka sha mburaato, fulya ikee ya wongo na ya ulembi lwa vandu vafurie itireta na mitambwe yawo.

¹⁵ Kake fikuware na miloshie ya dede na ikundana tiikuaṛukiaa findoń foose ito akee nrwe weru yye Kristo.

¹⁶ Nae yye mulunganisa vvili woose ukee iirishwa mmeeṛo woose atiniingie finya, na yeeṛo lyoose lyavie ishoṛa lyayo. Na kurovvili ukee iṅina ukasongosio̱ ukava nnuru kwa ikunda.

¹⁷ Kyasia na alli nkee irera kirero iki niimwikimbaa nkuvavie na Nndumi sheeli: Manya mutakiende mwisoṛaa mikae ya vayavaṛumu vakee ilatia findo fikee fa ruu.

¹⁸ Fulya makusaṛo awo awarwa ni llema na muu uukie kwa Iṛuva ukava kindo kiini kwawo kiimba kya utondo vakee nalo na kiimba kya uumu lwa ngoo tawo.

¹⁹ Nawo ili vakee sha vafu ngoo tawo vakakwata findoń fa waaisi, amu vatane kindo kyoose kikasha andu emwi na unyuku.

²⁰ Kake ini nkuro mundekuloshia kwa Kristo ndi,

²¹ kwakooya mwamiita kyamwi na ikulosha nakyo, sheeli kilya kikee kya dede kikee kwa Yesu.

²² Kyasia ṛikeń mikae ilya mikasha mundeisoṛa mbele ikuretaa yo meni na milangie ya ulembi.

²³ Muvaue mirima yanu mukuware na mikae miiya yukie kwa Iṛuva

²⁴ iwore usumani na usongovisi lwa dede.

²⁵ Kiimba kya iki tień irera wongo, rereń dede nndu woose na vandu vengi, fulya ise toose tikee meeṛo a vvili umwi.

²⁶ Mukaliwa nngoo manya mutatane mareko. Manya kutaile mutuṛukiani.

²⁷ Manya mutaotoṛie ulya afingiaa vengi uresi mwaanya.

²⁸ Ulya amiiva atakiive lingi ndi, kake asaṅiṛie masaa amwi eeṛundaa na maako amwi, amu akooye kya iniinga vakiva.

²⁹ Kirero kyoose kikasha kitasomuke kaniń kanu, kake kilya kikee kisha kya yelekia ulya mutiṅwa, amu kisenye vaaranya.

³⁰ Ana manya mutanarise Mumuyo ulya Nsongori wa Iṛuva, amu nto mwanniingwa ave kiringisio kya ikiṛwa lyanu.

³¹ Ivavisa lyoose na sua na tuṛuka na kiṛoṛongyo na firumu fisie kwanu andu emwi na ukasha lwa mikae yoose.

³² Lingi veń vandu vakuworie ndewu sheelwa ini mu veni na mu veni na vawore ililia mwikutiaa sheeli na Iṛuva andemutia akee na Kristo.