Barua ya Vaefeso 1 - MMA SHIYYA

¹ Niń Paulo nkee nrumi wa Kristo Yesu kwa mifurie ya Iṛuva. Namwisana ini mukee vasongori valya va ifo Efeso mukusurie Kristo Yesu.

² Uwoo lukaa neeni na unambwe fuukie kwa Iṛuva Nde yeru na kwa Nndumi Yesu Kristo.

³ Aṅiniswa Iṛuva Nde wa Nndumi weru Yesu Kristo andetiavia mboṛa yoose ya kimumuyo yukie iṛuvewu kiimba kya ilungana lyeru na Kristo.

⁴ Fulya Iṛuva atisaua andu emwi nae ilyo kitaare isanga lyantanwa, amu tive vasongori kisanguń kyamwi ateefo malomi.

⁵ Katideeṛia kwa ikunda lyamwi taaṛulwa vana vamwi eerumaa Yesu Kristo sheeli kindensenya.

⁶ Katana kuro, amu uwoo lwamwi lukooye tikisi ilu andetiavia ilyo andeniingia Mwana wamwi nkunde.

⁷ Yye uu andetikumbia muu wamwi, amu tikiṛwa na iniinga itio̱ lya mareko liiṅaṅani na wiingi lwa uwoo lwamwi.

⁸ Kaluteengeṛia eetiaviaa uṛango loose na imanya.

⁹ Kikansenya itirambuya kiṛisi kya makusaṛo amwi.

¹⁰ Amu eenkudeeṛiaa isandia findo foose fa iṛuvewu na fa isangeń kwa si ya nrwe umwi kyeeri kikamfika. Na nrwe uu nto Kristo.

¹¹ Kwamwi ye mfo tindelolia wavi lweru ise tindesaulwa yye kuuka mbooko sheeli eetikusaṛiee, fulya yye aawutia foose kwa mifurie yamwi.

¹² Kikava kuro, amu tive vandu va ivikia unini lwamwi windi ise tindebooka irwaa iverea lyeru kwa Kristo.

¹³ Neeni mwammaa iita kirero kya dede kirie mboni ta nrumi shisha ya ikiṛwa lyanu. Lingi mwammaa inkusura ye na irwaywa kiringisio mMumuyo Nsongori ulya amurekio̱.

¹⁴ Yye akee nrendekye wa diṅu yeru, amu tikiṛwa na iva tive vamwi, amu witoṛo lwamwi lukooye nduma.

¹⁵ Kiimba kya ikyo ili nndeita sheeli mukusurani na Nndumi Yesu, lingi sheeli mukundani na vakristo woose,

¹⁶ nta naaraa yaana Iṛuva kiimba kyanu ndi niimukumbuaa kiterewoń kyakwa.

¹⁷ Nkee imuterevia, Iṛuva wa Nndumi weru Yesu Kristo akee Nde muni wa finya amuniinge Mumuyo wa uṛango na wa immanya ye sheeli akai.

¹⁸ Na ngooń tanu amurwaye-fo miso maantu, amu mumanye kilya mukee iverea mukee vavaange yye na imanya unini lwa diṅu iyo aifisie vasongori vamwi.

¹⁹ Mumanye unini lwa imakii lyamwi lukee ikworusa kweru ise tinkusurie, sheeli lukai kwa kiṛengo kya mashoṛa a finya tamwi.

²⁰ Nto aṛunda nato lia aṛuta Kristo kwa vafu na inkaarisa rembo uko usha lwamwi kulya iṛuvewu.

²¹ Kanniinga unini lukilie unini na umangi na imakii na ngyunini toose na ikilia marina woose akee isendwa kyeeri iki na akwaa mfeeri foose lishaa.

²² Karwaa findo foose kwa si ya marende amwi kamwaṛua nrwe wa siṛi ashilie foose.

²³ Nayo yyo vvili wamwi. Na kari kayo mfo ye aawutikiaa akee muni mwawutia foose kundo koose.