Barua ya Vakorinto ya kavili 8 - MMA SHIYYA

¹ Lingi vanavama, tamwongoya mboni ya ililia lya Iṛuva findelolika siṛiń tilya ta ifo Makedonia.

² Amu lla kasa veeworee matuṛulo meengi na masaa awo mmaangu nnu, veeshule ifura matika woose, nalyo likaveengeṛia utomari lwa iniingia nsimbika wawo wa yelekia vengi.

³ Nkee nrambua wawo, sheeli vandeniingia masaa awo kwa mifurie yawo wo veni kisumani na finya tawo na mmwasi wa finya tawo,

⁴ veetiterevaa nnu tivalunganise na ishoṛa fi lya iṛundia vasongori valya va ifo Yerusalemu.

⁵ Nawo nta vanderunda kuri sheeli ise tiikusuriee ndi, kake lya mbele vandekurambikia Nndumi wo veni na itikurambikia ise kwa ikunda lya Iṛuva.

⁶ Llyo tikavavasa Tito aawutie nsimbika ulya ifo kwanu sha lia ye andemubookia.

⁷ Na sheeli muwore wiingi lwa findo foose kive kya ikusura kive kya mirerie kive kya uṛango kive kya utomari loose kive kya ikunda lyanu kweru ise mfo kuro kooyeń ufumbutu lwa nsimbika uu nato da.

⁸ Nkee irera amu mmuvavase ndi, kake ni utomari lwa valya vengi lukee ishiteveta neelelie udede lwa ikunda lyanu.

⁹ Amu mwammanya ililia lya Nndumi weru Yesu Kristo sheeli andeva nkiva kiimba kyeru, lla kasa eekee isimba, naamu ini mumakii iva masimba kiimba kya ukiva lwamwi.

¹⁰ Na kya ishoṛa lya isaṅiṛia nsimbika ulya nkee imuia kya uṛango lwakwa: Ishoṛa fi fimwelekaa ini, fulya mwambooka wamiira mwaka umwi nta ni iuṛundia da ndi, kake na akwaa ni ifura iiria vengi mbele.

¹¹ Kake alli awutień kilya mundekunda. Na sheeli mweemmaa ikudeeṛia ifura, mfo kuro kudeeṛień na yawutia kwa kiṛengo kyo mukee nakyo.

¹² Amu kwakooya milangie iifo, nndu eerikio̱o̱ ni Iṛuva kisumani na filya afiwore, nta nna filya atawore ndi.

¹³ Amu nta nkee irera ifo, amu vengi vakooye ifura na ini mukooye ngatara ndi, kake findo fiiṅaṅani.

¹⁴ Kyeeri kya alli mboṛa yanu yelekie iwo vaanguywa, amu na mboṛa yawo imwelekie ini ifi mwaanguywa, amu findo foose fiiṅaṅani.

¹⁵ Sheeli kyatisiṛwa: ”Ulya andeitirimu fiingi, nta andekwengeṛia ndi ana ulya andeitiṛimu faangu, nta andeanguywa ndi“.

¹⁶ Kake Iniva aanwa aniinga Tito utomari kuro ngooń yamwi kiimba kyanu.

¹⁷ Amu andewaria dede mivavasie ilya yeru, kake andeengeria uva na utomari kafinga kyaaṛo kya isha kwanu kwa mifurie yamwi muni.

¹⁸ Andu emwi nae tikaruma uroe ungi awore tikisi ya yongoya nrumi shisha ifo siṛiń toose.

¹⁹ Ana nta nkuro da ndi, kake andesaulwa nsiṛi to aende andu emwi neese na itielekia irwaa miniingie ilya ikee isaṅiṛio̱ ni ise, amu Nndumi aṅiniswa, neese timanyike sheeli tinsenye.

²⁰ Kuro tikee ikuringa, amu nndu atatirere kikasha kiimba kya miniingie ii minini tikee iṛunda.

²¹ Amu tikee ikusaṛia filya fikee fisha nta mbele ya Nndumi da ndi, na akwaa mmbele ya vandu.

²² Kake andu emwi nawo vali vavili tanruma na mwanamae uu weru ungi tindellolia keengi kari ka findo fiingi sheeli awore utomari, kya mmwasi kutu awore utomari alli akusurani neeni.

²³ Kyasia kikangio narera kya Tito, mfulya ye mmweleki wakwa na muṛundiana mashoṛa andu emwi nań kiimba kyanu. Na kya vanavamae valya vengi vavili wo vakee varume nsiṛi to variwa ni unini lwa Kristo.

²⁴ Kyasia vaoruseń ikunda lyanu na baa kisanguń kya siṛi lisumani na tikisi ilya tindemwitikisa nayo ifo kwawo.