Yosuwa 9 - Bibliya Yera 1951 1967 (Burundi)

Ingen’ ab’i Gibeyoni bāhenze Abisirayeli

¹ Maz’ abami bose bo hakuno ya Yorodani, bo mu mugamba waho, n’abo mu misozi iciye bugufi, n’abo ku kiyaga kinini, aharābana n’i Lebanoni, Abaheti n’ Abamori n’Abanyakanani n’Abaferizi n’Abahiwi n’Abayebusi bavyumvise,

² barifatanya bahūza umutima, ngo baje kurwanya Yosuwa n’Abisirayeli.

³ Maz’ ababa i Gibeyoni bumvise ivyo Yosuwa yagiriye Yeriko na Hayi,

⁴ bagira inama y’ubgenge, baragenda batēkera impamba mu magunira y’imishire, baziremēka indogoba zabo, bo n’imikuza y’insāto ya vino y’imishire, yatabutse, isanikiriye;

⁵ bambara inkweto z’imishire mu birenge ziteye ibiremo, bambara n’impuzu z’imishire nyene; bakora imitsima y’impamba yabaye impehe iguye ifira.

⁶ Nuko baragenda, bashikīra Yosuwa n’Abisirayeli aho bashagaje i Gilugali, barababarira, bati Tuvuye mu ntāra ya kure: non’ enda ni muduhe isezerano ryo gufatanya natwe.

⁷ Maz’ Abisirayeli bishura abo Bahiwi, bati Kumbure mur’ abo tubana: none twohava tugasezerana namwe dute?

⁸ Babarira Yosuwa, bati Tur’ abasavyi bawe. Yosuwa arababaza, ati Mur’ abaki? kandi muturuka hehe?

⁹ Baramwishura, bati Twebge abasavyi bawe tuvuye mu gihugu ca kure iyo bigwa, kand’ ikituzanye ino ni kubg’ izina ry’ Uhoraho Imana yawe, kuko twumvise inkuru zayo, n’ivyo yakoze vyose muri Egiputa,

¹⁰ n’ivyo yagiriye abami babiri b’Abamori bo hakurya ya Yorodani, Sihoni umwami w’i Heshiboni na Ogi umwami w’i Bashani yaba ahitwa Ashitaroti.

¹¹ Nukw abakuru bacu n’abo mu gihugu cacu bose baratubarira, bati Ni mukore impamba, mugende kubasanganira, mubabarire, muti N’abasavyi banyu; ngo None ni mubahe isezerano ryo gufatanya na bo.

¹² Kand’ ehe rāba iyi mitsima yacu twayitēkeye kw impamba igishushe, umusi nyene tukiva i muhira i wacu, dufashe inzira yo kuza iyo muri: none yarabaye impehe, yaguye ifira;

¹³ kandi n’iyi mikuza twayitēkeyemwo vino ikiri misha, non’ ehe rāba iratabaguritse; ehe n’iyi myambaro n’inkweto vyadushiriyeko kubg’ urugendo rurerure.

¹⁴ Maz’ Abisirayeli bemezwa n’ izo mpamba, batarinze kugīsha inama Uhoraho.

¹⁵ Yosuwa abasezeranira kuzobana amahoro na bo, no kubareka ngo bībēreho; n’abakuru b’ishengero na bo barabarahira.

¹⁶ Ariko haciye imisi itatu bamaze gusezerana na bo, bumva kw ar’ ababangikanye na bo, kandi kw ar’ ababa ngaho nyene muri bo.

¹⁷ Nukw Abisirayeli barahaguruka, bashika ku bisagara vyabo ku musi ugira gatatu. Ivyo bisagara vyari Gibeyoni na Kefira na Beroti na Kireyati‐yeyarimu.

¹⁸ Arikw Abisirayeli bareka kubica, kukw abakuru b’ishengero bāri babarahiye Uhoraho Imana y’Abisirayeli; maz’ ishengero ryose ryidodombera abo bakuru.

¹⁹ Arikw abo bakuru babarira ishengero ryose, bati Twabarahiye Uhoraho Imana y’Abisirayeli, none ntitwoshobora kubakakaza.

²⁰ Enda tubagire durtya: tubareke bībēreho, twoye kwihamagarira uburake kubga ya ndahiro twabarahiye:

²¹ dupfe kubareka, ariko tubagire abashenyi n’abavomyi b’ ikoraniro ryose, nk’uko twababgiye. Uko ni kw abo bakuru bāvuze.

²² Maze Yosuwa arabahamagaza, arababaza, ati N’iki catumye muduhenda, mukavuga yuko mur’ aba kure, kandi mur’ abo ngaha nyene muri twebge?

²³ Nuko rero muravumwe, ntimuzobura kwama mur’ abaja, mube abashenyi n’abavomyi b’inzu y’Imana yanje.

²⁴ Bishura Yosuwa, bat’ Erega twebge abasavyi bawe bātubariye inkuru y’imvaho yuk’ Uhoraho Imana yawe yabariye Mose umusavyi wayo kw azobaha iki gihugu cose, no kuzorandura bene co; ni co catumye dutinyirira amagara yacu kubganyu, tugakora durtyo.

²⁵ None rāba, turi mu maboko yawe: utugire uk’ ugomba, nk’uko wumva bikubangukiye.

²⁶ Nuko Yosuwa abagirira nk’uko yavuze, arabakiza, abakūra mu maboko y’Abisirayeli, ntibābica.

²⁷ Kur’ uyo musi abagira abashenyi n’abavomyi b’iryo shengero n’ ab’ igicaniro c’Uhoraho, ahantu Uhoraho azotoranya ko kihaba. Kandi ni ko bagikora na bugingo n’ubu.