Yohana 10 - Bibliya Yera 1951 1967 (Burundi)

Umwungere mwiza

¹ N’ukuri, n’ukuri ndababgire: Ūdaca mw irembo ry’urugo rw’intama, arikw akūririra ahandi, uwo aba ar’ igisuma n’umwambuzi.

² Arik’ ūca mw irembo ni we mwungere w’intama.

³ Umuteramyi w’irembo aramwugururira, kand’ intama zumva ijwi ryiwe; ahamagara iziwe ntama mu mazina yazo, akaziturutsa.

⁴ Kand’ iy’ amaze guturutsa iziwe zose, azija imbere, zikamukurikira kuko zizi ijwi ryiwe.

⁵ Arik’ uwo zitazi ntizomukurikira na mba, zomuhunga, kuko zitazi amajwi y’abandi.

⁶ Yesu abacira uwo mugani, ariko bo ntibatahura ivyo ababgira ivy’ ari vyo.

⁷ Nuko Yesu yongera kubabgira, ati N’ukuri, n’ukuri ndababgire: Ni jewe rembo ry’intama.

⁸ Abanyītangiye imbere bose bār’ ibisuma n’abambuzi, arikw intama ntizabumviye.

⁹ Ni jewe rembo, kand’ ūshika mu rugo wese aciye muri jewe arakizwa; agataha, agaturuka, akaronka icanya.

¹⁰ Igisuma ntikizanwa n’ikindi, atar’ ukwiba, n’ukwica, n’ugutikiza; nanje jeho nazanywe no kugira ngo zironke ubugingo, kandi ngo ziburonke busāgutse.

¹¹ Ni jewe mwungere mwiza; umwungere mwiza yigura intama ziwe.

¹² Arik’ umucangero, atar’ umwungere bgite, kand’ intama atar’ iziwe, iy’ abonye ibingira rije, ata intama, agahunga: ibingira rikazisahura, rikazishwiragiza.

¹³ Arahunga, kukw ar’ umucangero, atababaye intama.

¹⁴ Ni jewe mwungere mwiza, ndazi izanje, n’izanje ziranzi,

¹⁵ nk’uko Data anzi, nanje nkamumenya; kandi ndigura intama zanje.

¹⁶ Kandi mfise n’izindi ntama zitar’ izo mur’ uru rugo, na zo nyene birankwiye kuzija imbere, zizokwumva ijwi ryanje, hazoba umukuku umwe n’umwungere umwe.

¹⁷ Igituma Data ankunda, n’uko ndekura ubugingo bganje, ngo mpeze nsubire kubgābīra.

¹⁸ Nta n’umwe abunyaka, kuko mburekura kubganje: mfise ububasha bgo kuburekura, mfise n’ububasha bgo gusubira kubgābīra. Ico ni co cagezwe nahawe na Data.

¹⁹ Abayuda bongera kumupfa kubg’ ayo majambo;

²⁰ benshi muri bo bat’ Arimwo dayimoni, kandi yāsaze: mumwumviririza iki?

²¹ Abandi bat’ Ereg’ ayo majambo si nk’ay’ ūhagazweko na dayimoni: mbega dayimoni arashobora guhumūra amaso y’impumyi?

Yesu na Se n’umwe

²² Maze haza imisi mikuru yo kwibuka uguhumanurwa kw’ urusengero i Yerusalemu: hāri mu rushana.

²³ Yesu agendagenda mu rusengero mw ibaraza rya Salomo.

²⁴ Abayuda baramukikiza, baramubaza, bat’ Uzogeza ryari gutera imitima yacu kujuragira? Asangw’ uri Kristo bidufoborere.

²⁵ Yesu arabishura, ati Narababgiye, ariko ntimwizera: ibikorwa nkora mw izina rya Data, ni vyo binshingira intahe.

²⁶ Ariko ntimwizera, kuko mutar’ abo mu ntama zanje.

²⁷ Abābaye intama zanje bumva ijwi ryanje, nanje ndabazi, na bo barankurikira,

²⁸ kandi nanje mbaha ubugingo budashira, nta ho bazokwigera bapfa rubi gushitsa ibihe bidashira, kandi nta wushobora kubanshikura mu kuboko kwanje.

²⁹ Data yabampaye ni we aruta bose; nta wushobora kubashikura mu kuboko kwa Data.

³⁰ Jewe na Data tur’ umwe.

³¹ Bun’ Abayuda bongera gutora amabuye, ngo bayamutere.

³² Yesu arababgira, ati Naberetse ibikorwa vyiza vyinshi bivuye kuri Data, ikibanteresha amabuye mur’ ivyo bikorwa n’ikihe?

³³ Abayuda baramwishura, bati Ntituguterera amabuye kubg’ igikorwa ciza, ariko n’uko warogose; kuko wewe ur’ umuntu ukīgira Imana.

³⁴ Yesu arabishura, ati Mbega ntihanditswe mu vyagezwe vyanyu, ngo Navuze nti Mur’ imana?

³⁵ None ko yabise imana, bamwe ijambo ry’Imana ryashitseko (kand’ ivyanditswe ntibishobora guhinduka),

³⁶ mwebge mubgira mute uwo Data yejeje, akamutuma mw isi, ng’ Urarogose, kuko navuze nti Nd’ Umwana w’Imana?

³⁷ Asangwa ntakora ibikorwa vya Data, ntimunyemere;

³⁸ ariko ni nabikora, naho jewe mutanyemera, mupfe kwemera ibikorwa, kugira ngo mumenye, mutahure, yuko Data ari muri jewe, nanje nkaba muri Data.

³⁹ Nuko bongera kurondera ingene bomufata, abava mu maboko.

⁴⁰ Avayo, yongera kuja hakurya ya Yorodani, ha hantu Yohana yabatiriza ubga mbere, agumayo.

⁴¹ Benshi baza kuri we; baravuga, bati Yohana nta kimenyetso yakoze, arikw ivyo Yohana yavuze vyose kur’ uyu vyar’ ivy’ ukuri.

⁴² Kandi benshi bamwizererayo.