Yobu 30 - Bibliya Yera 1951 1967 (Burundi)

¹ Ariko none, abo nduta ubukuru ni bo bampinduye agatwengo, Abo nakēngērera ba se, ntonabēgereje n’imbga ziteramira umukuku w’intama zanje.

² Non’ inkomezi z’amaboko yabo zommarira iki? Kw ar’ utugoyigoyi tutazoshika mu bigero.

³ Bazingamitswe n’ugukena n’ inzara, Baguguna imisozi igadutse y’ ubgeranyange.

⁴ Basoroma utuboga tumera mu bisaka, Imizi y’igiti c’umurotemu ni yo bagira utwo kurya.

⁵ Bāciwe mu bantu; Bahabga induru nk’ibisuma.

⁶ Bituma baba mu bikukumushi vyo mu myonga, Mu masenga yo mu misozi no mu bitandara.

⁷ Basigaye bābirira mu bisaka nk’inka; Bīryamira hamwe musi y’ ibisuru.

⁸ N’abana b’ibipfapfa, mbere n’abana ba ba nyarucari; Bābaye ibicibga mu gihugu.

⁹ Maze noneho mpindutse akavyino kabo, Mbere mbaye iciro ry’imigani yabo.

¹⁰ Baranzinutswe, baranyītāngūye, Ntibashishwa no kuncira amate mu maso.

¹¹ Kukw Imana yabanguruye urutsi rw’umuheto wanje, incisha bugufi; Ni co gituma batigarura imbere yanje.

¹² I buryo bganje hahaguruka imihimbiri, Basunika ibirenge vyanje, Bitegura inzira zo kuntera ngo bandandure.

¹³ Inzira yanje barayonona, Basunikiriza ivyago vyanje, Kandi nta wubabuza.

¹⁴ Banziye nk’abaciye mu kirengero kinini: Bānsūmiye bagigimba hakiriko harahomvoka.

¹⁵ Ibiteye ubgoba birampanze, Bakubeba icubahiro canje nk’ umuyaga; Amahirwe yanje akamanganye nk’igicu.

¹⁶ Maze non’ ubugingo bganje bunshongeyemwo; Imisi y’umubabaro irancakiye.

¹⁷ Mw ijoro amagufa yanje yantobekeranirijwemwo, Uburibge buranguguna ntibumpumekera.

¹⁸ Kubg’ inkomezi nyinshi z’ indwara yanje umwambaro wanje urononekaye, Unyumiyeko nk’uk’ umutamana wanje unduma mu rwano.

¹⁹ Yanshiburiye mu kivurugu c’ ivyondo, Mpindutse nk’umukungugu n’umunyota.

²⁰ Ndagutakambira, ntunyishura; Nahagarara, ukandāba utw’ ininga.

²¹ Wampindukiye inkarwe: Ukuboko kwawe kw’inkomezi kurandendereza.

²² Unteruza umuyaga, ugatuma njanwa na wo; Unnyukangiye mu kirura.

²³ Kuko nzi yuk’ uzonshitsa mu rupfu, Ukanshitsa no mu nzu y’ ihūriro ry’abakiriho bose.

²⁴ Yamar’ umuntu iyo arikw aratemba ntiyābābiza amaboko? No mu vyago vyiwe ntiyotabaza?

²⁵ Mbega sinaririra ūjigirijwe? Umutima wanje ntiwababazwa n’umukene?

²⁶ Naziga amahirwe, hakaza ivyago; Naziga umuco, hakaza umwiza.

²⁷ Amara yanje aradobangana, nta ho aruhuka; Imisi y’amagorwa inshitseko.

²⁸ Ngenda ngandaye ntabona izuba: Mpagarara mw ikoraniro, ngatabaza.

²⁹ Ndi mwene wabo w’imbgebge, Ndi mugenzi w’igisīga citwa imbuni.

³⁰ Urukoba rwanje rurirabuye, rumvuyeko, N’amagufa yanje ahiye uburimbi.

³¹ Ni co gitumye inanga yanje isigaye ar’ agacurantimba, N’umwironge wanje ugahinduka ijwi ry’abarira.