Yobu 3 - Bibliya Yera 1951 1967 (Burundi)

Amajojwa ya Yobu

¹ Hanyuma y’ivyo Yobu yanzika kuvuga, avuma umusi wo kuvuka kwiwe.

² Nuko Yobu aravuga,

³ at’ Umusi navukiyeko urakazimangana, Bo na rya joro ryavuzwemwo, ng’ Umwana w’umuhungu atwawe inda!

⁴ Uwo musi uragacura umwiza; Imana yoye kuwitegereza ir’ iyo hejuru, Kandi n’umuco woye kuwākira.

⁵ Umwiza n’igitūtu c’urupfu biwugire uwavyo, Igicu kiwubarareko: Ivyīrīsha ubgīrakabiri vyose biwutere ubgoba.

⁶ Iryo joro, umwiza w’umuzitanya uricakire: Ntirikanezeranwe n’imisi y’ umwaka; Ntirigaharūrwe mu gitigiri c’amezi.

⁷ Mber’ iryo joro rirakaba ingumba; Ntirikabonekemwo ijwi ry’ umunezero.

⁸ Abazi kuvuma imisi ni barivume, Ni bo bar’ uburyo bgo kuvyutsa Lewiyatani.

⁹ Inyenyeri zo mu gahuru karyo ziragacura umwiza: Ryitege umuco, riwubure, Kandi ntirikabone ugutambika kw’umutwenzi:

¹⁰ Kuko ritūgaye inda ya mama, Ngo rihishe amaso yanje umubabaro.

¹¹ N’iki catumye ntāpfuye nkiri mu nda? N’iki catumye impwemu zanje zitāheze nkiyivamwo?

¹² N’iki catumye ibibero binkikira, Canke ngahabga amabere, nkayonka?

¹³ Iyaba ari ko vyagenze, ubu mba ndyamye nkaba amahoro, Mba nsinziriye; ni ho mba nduhutse.

¹⁴ Mba ndi kumwe n’abami n’ abajanama bo mw isi, Biyubakiye ahār’ imisaka;

¹⁵ Canke mba ndi kumwe n’ abaganwa bāri bafise izahabu, Bakuzuza amazu yabo ifeza;

¹⁶ Iyo mba narabaye nk’inda ikorotse igahishwa, simba narabayeho; Canke nk’inzoya zitigeze zibona umuco.

¹⁷ Iyo ni ho abanyakibi barekera kugorana; Iyo ni ho abārushe baruhukira.

¹⁸ Iyo ni ho imbohe zībēra amahoro zose hamwe; Ntiziba zicumva ijwi ry’ūbakoresha abahindagiza.

¹⁹ Uworoshe n’ūhambaye ni ho bari; Umushumba ahafitiye umwidegemvyo kuri shebuja.

²⁰ N’iki gituma umunyamubabaro ahabga kubona umuco, N’ūfise akabonge mu mutima agahabga ubugingo?

²¹ Bifuza urupfu, ntiruze: Barwimba kurusha abimba izahabu zānyegejwe;

²² Iyo barushe bakabona imva Birabahimbara cane, bakanezerwa.

²³ Mbeg’ umuntu ayobewe inzira, Imana ikamutangatanga, N’iki gituma ahabga kubona umuco?

²⁴ Kuko kuniha kwanje kumbereye ivyo kurya, Kand’ amaborogo yanje asukwa nk’amazi.

²⁵ Kukw ico natinya ari co canshitseko, Kand’ icantera ubgoba ari co canjeko.

²⁶ Simmerewe neza, simfise amahoro, simfise uburuhukiro; Ariko haza ivyago gusa.