Yobu 20 - Bibliya Yera 1951 1967 (Burundi)

Zofari yerekana umugabane w’umunyavyaha

¹ Maze Zofari w’i Nayama arishura,

² at’ Ivyiyumviro vyanje binteye kwishura, Kuko bindundumiye.

³ Numvise ibikangisho binteye isoni, Kand’ umutima wanje w’ ubgenge uranyishuye.

⁴ Mbega ntuzi yuko kuva kera, Uhereye igihe umuntu yashizwe mw isi,

⁵ Ukwihaya kw’abanyakibi kumara igihe gito, No kunezerwa kw’abatubaha Imana ar’ ukw’ akanya isase?

⁶ Nah’ ubgibone bgiwe bgoshika kw ijuru, Umutwe wiwe ugashika mu bicu,

⁷ Azoshira buheriheri nk’ umwanda umuvuyemwo: Abāhora bamubona bazovuga, bati Mbeg’ ari hehe?

⁸ Azoguruka nk’inzozi, ntabe akiboneka, Mber’ azokamangana nk’ibiravūswe mw ijoro.

⁹ Ijisho ryahora rimurāba ntirizosubira kumubona ukundi, N’ahantu yaba ngo hongere kumubona.

¹⁰ Abana biwe bazoja gusaba aboro, Kandi bazoriha ivyo yagunze.

¹¹ Inkomezi z’ubusore bgiwe zuzuye mu magufa yiwe, Zizoryamana na we mu mukungugu.

¹² Nah’ ivyaha bimuryohera mu kanwa, Akabinyegeza mu nkingi z’ ururimi,

¹³ Akanka kubiheba, Akabigumya mu kanwa kiwe,

¹⁴ Yamar’ ivyo yariye bizomuhinduka bishitse mu nda, Bizohinduka nk’ubumara bg’ imvuvyi muri we.

¹⁵ Yamize ubutunzi miyonzwa, non’ azobudahwa: Imana izobisevya mu nda yiwe.

¹⁶ Azonunuza ubumara bg’ imvuvyi; Ururimi rw’inzoka ruzomwica.

¹⁷ Ntazokwitegereza inzūzi, Ari zo migezi itemba ubūki n’ urubu.

¹⁸ Inyungu yaronse azozisubiza, ntazozitamirako; Ubutunzi yaronse ntibuzomunezereza.

¹⁹ Kuko yahahaje aboro, akabīrengagiza; Yinjiye urugo atubatse.

²⁰ Umutima wiwe ntuzi guhurarara, Kandi ntazokiza ikintu na kimwe mu vyamuhimbara.

²¹ Nta casigaye atāherengeteje, Ni co gituma ubuhirwe bgiwe butazogumaho.

²² Igihe ivyiwe bizoba bimucugaye binengesereye, azofutana; Amagorwa yose azomwizingirako.

²³ Igihe agira ahāze inda yiwe, Imana izomusukak’ uburake bgayo bg’inkazi, Izobumucuncuburirako akirikw ararya.

²⁴ Azogira ngw arahunga ibirwanishwa vy’ivyuma, Arik’ umuheto w’umuringa uzomutobekeranisha umwampi,

²⁵ Useruke mu mugongo wiwe: Mber’ uwo mubugita ukayangana uzoseruka utobekeranije indurwe yiwe; Ubgoba buzoba bumufashe.

²⁶ Umwiza wose ni wo azobīkirwa ku butunzi: Umuriro utākijwe n’umuntu uzomutongora, Uherengeteze ibizoba bisigaye mu rugo rwiwe.

²⁷ Ijuru rizoshira ibigabitanyo vyiwe ahabona, Kand’ isi izomukūrira hasi.

²⁸ Inyungu yo mu nzu yiwe izojanwa, Ibintu vyiwe bizotwarwa bisendanishijwe ku musi w’ uburake bgayo.

²⁹ Ivyo ni vyo mugabane umunyakibi ahabga n’Imana, Ni yo ngero yagerewe na yo.