Yobu 14 - Bibliya Yera 1951 1967 (Burundi)

¹ Umuntu yavyawe n’umugore Amara imisi mike kand’ adundubiwe n’amagorwa.

² Ashurika bga shurwe, maz’ agacibga; Ahita nk’igitūtu, ntiyamaho.

³ Mbega nawe, ūmeze artyo womukanurira ijisho, K’unshize mu rukinja?

⁴ Ni nde yoshobora gukūra ikintu gitunganye mu canduye? Erega nta wuriho n’umwe.

⁵ Imisi yiwe ko yashinzwe, igitigiri c’amezi yiwe kikaba gifiswe nawe, Ukaba waramushingiye akarimbi adashobora kurēngāna;

⁶ Umukūrekw ijisho, abone kuruhuka, Anezererwe umusi wiwe nk’ umucangero agodotse.

⁷ Kuko harih’ ivyizigiro vy’ igiti, iyo giciwe, yuko kizokwongera kunaga, Kand’ ibitontomya vyaco ko bitazobura.

⁸ Nah’ umuzi waco usāzira mw ivu, N’igishitsi caco kigahera mu kuzimu,

⁹ Arikw iyo cumvise amazi gica kinaga, Kigashamika nk’igiti kikiri gito.

¹⁰ Arik’ umuntu we, arapfa, akīgīra maheriheri, Mber’ impwemu z’umuntu zirahera, non’ aba akiri hehe?

¹¹ Nk’ukw amazi yo mu kiyaga akeha, N’umugezi ukagabanuka, ugakamuka;

¹² Ni k’umuntu aryama, ntasubire kuvyuka: Gushitsa ah’ ijuru rizoba ritakiriho, ntibazokwigera bikangura, Canke ngo bavyutswe bave mw itiro ryabo.

¹³ Icompa ukampisha i kuzimu, Ukandindira ahihishije, gushitsa ah’ uburake bgawe buzoshirira; Ukanshingira igihe, kand’ ukazonyibuka.

¹⁴ Umuntu ni yapfa, mbeg’ azosubira kubaho? Nokwihanganiye imisi y’intambara yanje yose, Nkarorēra igihe canje co kurekurwa.

¹⁵ Wompamagaye nkakwitaba; Wobaye wifuza igikorwa c’ amaboko yawe.

¹⁶ Yamara non’ uharūra intambuko zanje: Mbega ntushinze ijisho icaha canje?

¹⁷ Igicumuro canje gitekewe mw isaho irumanijwe n’ishashara, N’ibigabitanyo vyanje ubiboheye hamwe.

¹⁸ Yamara n’ukuri umusozi uracika, ugaherengetera, N’igitandara kigakūrwa aho cari kiri;

¹⁹ Amazi agenda akorogoshora amabuye; Isūri itembana umukungugu wo kw isi: Ni ko nawe ukūrah’ ivyizigiro vy’umuntu.

²⁰ Umutsinda buheriheri, akagenda mazimayongo; Uhindura mu maso hiwe ukundi, ukamurungika.

²¹ Abana biwe bahabga icubahiro, ntabimenye; Bacishwa bugufi, ntabice n’ ikanda.

²² Arik’ uburibge bg’umubiri wiwe ubgiwe ni bgo yumva gusa, Umutima wiwe uniha uwo gupfa.