Yeremiya 6 - Bibliya Yera 1951 1967 (Burundi)

Abansi b’i Siyoni bitegura kuhatera

¹ Muhunge mwikize, mwebge Babenyamini, muve hagati muri Yerusalemu; muvugirize inzamba i Tekowa, kand’ i Beti‐hakeremu muhashire inderetsi yo gutabaza; kukw ivyago bisēsetse i burārūko, n’ukugeseza gukomeye.

² Umukobga w’i Siyoni mwiza yāmikaye, nzomurandura.

³ Abungere bazomūzira, bari n’imikuku yabo; bazoshinga amahema yabo, bamushagaje irya n’ino; bazomurisha, umuntu wese ah’ aherereye:

⁴ bati Mutonde urugamba tumurwanye; ni mukūre hasi tudūge ku murango w’amaminangohe. Bat’ Ewe turagowe, kuk’ umusi ukuze, kand’ ibitūtu vy’ubgīra bikaba bimaze ibihugu!

⁵ Bati Ni mukūre hasi, tudūge mw ijoro, dusangangure ingoro ziwe.

⁶ Kuk’ ukw ari k’Uhoraho Nyen’ ingabo agize, ati Ni mwicire ibiti, murundire Yerusalemu ikigunguzi co kwūririrako: ico gisagara gikwiye kūzirwa; nta kindi kiri muri co atar’ agahahazo.

⁷ Nk’ukw iriba ridudubiza amazi yaryo, uko ni ko kidudubiza ibibi vyaco: humvikana umuryano n’ubunyazi muri co; ububabare n’inguma vyama imbere yanje na ntaryo.

⁸ Kunda wigishwe, Yerusalemu, umutima wanje woye guhubanwa nawe; noye kuzohava nguhindura amatongo, igihugu kitakirimw’ umuntu.

⁹ Uku ni k’Uhoraho Nyen’ ingabo agize, ati Bazohūmba bamaririkanye amasigarira y’Abisirayeli, nk’uko bahūmba umuzabibu: subira uje uratuma ukuboko nk’uwamurira inzabibu mu bisamba.

¹⁰ Nobarira nde ngw ambere icabona, kugira ngo bumve? Ereg’ amatwi yabo arazivye, ntibashobora kwumva: ijambo ry’Uhoraho ryahindutse agatukisha kuri bo; ntibakirinezererwa.

¹¹ Ni co gituma nuzuye ubushangashirwe bg’Uhoraho: bingoye kubuzina; burekurire ku bana bari mu nzira, no ku misore ah’iganamye: kuk’ umugabo azonyaganwa n’umugore wiwe, n’umutāma azonyaganwa n’ūgeze mu zabukuru.

¹² Ingo zabo zizogabirwa abandi, bo n’amatongo yabo n’abagore babo: kuko nzobangurira ukuboko kwanje ku baba mu gihugu, ni jewe Uhoraho mbivuze.

¹³ Kuk’ uhereye kuri nyarucari muri bo ugashitsa no k’ūhambaye, umuntu wese yifuza inyungu mbi; kand’ uhereye kuri ba kamenyi ugashitsa no ku baherezi, umuntu wese aragunga.

¹⁴ Bāvūye igikomere c’abantu banje imirenzako, bavuga, bati N’amahoro, n’amahoro; kand’ ata mahoro ariho.

¹⁵ Mbega har’ isoni bāgize, bamaze gukora ibizira? Eka nta dusoni na mba, nta n’ukumāramāra. Ni co gituma bazotembana n’abari ku mutembo; igihe nzobāzira bazogwaho, ni jewe Uhoraho mbivuze.

Imana yinginga abantu ngo bihane

¹⁶ Uku ni k’Uhoraho agize, ati Muhagarare mu mayira, mwitegereze, mubaze inzira za kera, inzira nziza iy’ ari yo, abe ari yo mujana, maze muzoronka uburuhukiro bg’imitima yanyu: ariko bo baravuga, bat’ Eka ntituyijana.

¹⁷ Nabashiriyeh’ abashibamyi, nti Ni mwumvirize ijwi ry’inzamba; ariko bo baravuga, bat’ Eka ntituryumviriza.

¹⁸ None rero mwa mahanga, ni mwumve ibigira bibabeko; ubimenye, wa koraniro ry’amoko;

¹⁹ ni wumve, wa si we, ehe ngira nzane ivyago kur’ ubu bgoko, vyandurutse mu vyiyumviro vyabo, kuko batumviye amajambo yanje, kand’ ivyagezwe vyanje bakaba bārabikēngereye.

²⁰ Bimaze iki kunkūrira ibintu bimoga i Sheba, na kanehe imota neza ivuye mu gihugu ca kure? Ibimazi vyanyu vyoswa simbishima, kand’ ivyo mukerera ntibimpimbara.

²¹ None rero ni mwumve ivyo mvuze jewe Uhoraho: Ehe ngira nshire ibitsitaza imbere y’ubu bgoko: abavyeyi n’abana babo bazobitsitarirakw icarimwe; ababanyi na bagenzi babo bazoranduka.

²² Uku ni k’Uhoraho agize, at’ Eh’ ubgoko buraje buvuye mu gihugu c’i burārūko; ihanga rikomeye rizovyutswa rive ku mpera y’isi.

²³ Bābiriye imiheto n’amacumu; ni ba ruburakigongwe, nta mbabazi bagira; ijwi ryabo ribomborana nk’ikiyaga, kandi bagendera ku mafarasi; bāzira mu rugamba icarimwe, nk’umuntu umwe, kugira ngo bagutere, ewe mukobga w’i Siyoni.

²⁴ Twumvise inkuru zavyo, amaboko yacu arareganuka: uburibge buradufashe, nk’ibise vy’umugore aramutswe.

²⁵ Ntimuruhe musohoka mu mirima, canke ngo mufate inzira: kuko hariy’ inkota y’umwansi, n’ibiteye ubgoba irya n’ino.

²⁶ Ewe Yerusalemu, wa mukobga ari bo bantu banje, kenyera amagunira, wikumbagaze mu minyota: vuza induru nk’ūyivugiriza umwana wiwe w’ikinege, uborogane akabonge kenshi; kuk’ umugeseza agira adushikeko giturumbuka.

²⁷ Nguhinduye nk’uruganda n’umucuzi hagati mu bantu banje; kugira ng’ umenye ingeso zabo uzigerageze.

²⁸ Bose n’abagarariji bitovugwa, bagenda barementanya; bameze nk’imiringa n’ivyuma; bose bakora ivy’ ubugunge.

²⁹ Imivuba ivugutana inkomezi, umuriro ugakūrah’ inkamba: bashishikarira ubusa kuvuguta, kukw abanyakibi batākūwemwo.

³⁰ Abantu bazobīta ifeza z’ibihonwa, kuk’ Uhoraho abashibuye.