Yeremiya 38 - Bibliya Yera 1951 1967 (Burundi)

Ebedumeleki akūra Yeremiya mu cobo

¹ Shefatiya mwene Matani, na Gedaliya mwene Pashuri, na Yukali mwene Shelemiya, na Pashuri mwene Malakiya, bumva amajambo Yeremiya abarira abantu bose,

² ng’ Uku ni k’Uhoraho agize, at’ Ūguma mur’ iki gisagara azokwicwa n’inkota n’inzara n’ ikīza: arik’ ūsokoroka muri co, akaja ku Bakaludaya, azobaho, kand’ azoba akijije amagara yiwe, abeho.

³ At’ Uku ni k’Uhoraho agize, at’ Iki gisagara ntikizobura gutangwa mu maboko y’ ingabo z’umwami w’i Babuloni, na we azogitsinda.

⁴ Maz’ abaganwa babgira umwami, bat’ Uyu muntu akwiye gupfa: kukw adendebura amaboko y’abahizi bagisigaye mur’ iki gisagara n’ay’ abantu bose, ababarira amajambo asa artyo: kuk’ uyu mugabo atifuriza amahoro ubu bgoko, atar’ ivyago.

⁵ Nuk’ umwami Zedekiya at’ Eh’ ari mu maboko yanyu: kuko jewe umwami ntoshobora gukora ikintu na kimwe co kubabuza.

⁶ Maze bafata Yeremiya, bamushira mu cobo cimbiwe kubīka amazi ca Malakiya umwana w’ umwami, cari mu rugo rw’ibohero: bamwururukirizayo n’imigozi. Mur’ ico cobo nta mazi yarimwo, atar’ ikivurugu c’ivyondo: kandi Yeremiya adibira muri nya vyondo.

⁷ Maze Ebedumeleki, Umunyetiyopiya w’inkone, yasukūra mu ngoro y’ umwami, yumva ko bashize Yeremiya mur’ ico cobo; ico gihe umwami yar’ avyagiye ku kirimba citwa ica Benyamini.

⁸ Ebedumeleki asohoka mu ngoro i bgami, abarira umwami,

⁹ ati Mwami wanje nyen’ ingoma, abo bantu bakoze nabi muri vyose bagiriye Yeremiya umuvugishwa, uwo batereye mu cobo; kand’ ari mu gupfira aho hantu ari, kubg’ inzara; kukw ata mutsima ugisigaye mu gisagara.

¹⁰ Maz’ umwami abarira Ebedumeleki Umunyetiyopiya, ati Kūra hano abagabo mirongwitatu, ubajane, ukūre uwo muvugishwa Yeremiya mur’ ico cobo, ntagweyo.

¹¹ Nuko Ebedumeleki ajana abo bagabo, yinjira mu ngoro y’umwami, aja musi y’ubushinguro, akūray’ impuzu z’imikūra n’ibishambara, abirungikisha imigozi mu cobo abiha Yeremiya.

¹² Maze Ebedumeleki Umunyetiyopiya abarira Yeremiya, at’ Enda shira izo mpuzu z’imikūra n’ibishambara mu maha imbere y’imigozi. Yeremiya agira kuno.

¹³ Nuko bakwegesha Yeremiya imigozi, bamukūra mur’ ico cobo; Yeremiya aguma mu rugo rw’ibohero.

¹⁴ Maz’ umwami Zedekiya aratuma, bamuzanira Yeremiya umuvugishwa, bamumusanza imbere mw irebe rya gatatu ryo mu ngoro y’ Uhoraho: maz’ umwami abarira Yeremiya, ati Har’ ico nkubaza: ntugire ico umpisha.

¹⁵ Maze Yeremiya abarira Zedekiya, ati Ni nakikubarira, wobura kunyica? Kandi ni nakugīra inama, na ho nyene ntiwonyumva.

¹⁶ Nuk’ umwami Zedekiya arahirira Yeremiya mu mpisho, ati Nk’uk’ Uhoraho ahoraho, ari we yandemeye uyu mutima, sinkwica, kandi singutanga mu maboko y’abo bantu barondera kukwica.

¹⁷ Maze Yeremiya abarira Zedekiya, at’ Uku ni k’Uhoraho agize, ni we Mana Nyen’ ingabo, Imana y’Abisirayeli, ati Ni wagenda ukīsaba abaganwa b’umwami w’i Babuloni, uzokwikiza, kand’ iki gisagara ntikizotongozwa umuriro; nawe uzobona kubaho, n’abo mu nzu yawe.

¹⁸ Ariko n’utemera kwīsaba abaganwa b’umwami w’i Babuloni, iki gisagara kizotangwa mu maboko y’Abakaludaya, kandi bazogitongoza umuriro, nawe ntuzokwikiza ng’ uve mu maboko yabo.

¹⁹ Maz’ umwami Zedekiya yishura Yeremiya, ati Ntinya Abayuda bāmaze kwisaba Abakaludaya, kuko bobampa bakanshinyagurira.

²⁰ Yeremiya aramwishura, ati Ntibazobaguha. Ndakwinginze, wumvire Uhoraho mur’ ivyo nkubariye: ni ho uzomererwa neza, ukikiza.

²¹ Ariko ni wanka kugenda, iri ni ryo jambo Uhoraho yanyeretse:

²² ati Rāba abagore bose basigaye mu rugo rw’umwami w’i Buyuda, bazokūrwayo bahabge abaganwa b’umwami w’i Babuloni, kand’ abo bagore bazovuga, bat’ Abakunzi bawe pfampfe bāraguhenze, uja na rwo: arikw ibirenge vyawe bimaze gushaya mu kivurugu c’ivyondo, barakimirana.

²³ Kandi bazosohora abamikazi bawe bose n’abana bawe babahe Abakaludaya: nawe ntuzokwikiza ng’ uve mu maboko yabo, arik’ uzofatwa n’ukuboko kw’umwami w’i Babuloni: kandi ni wewe uzoba uzaniye iki gisagara gutongozwa umuriro.

²⁴ Maze Zedekiya abarira Yeremiya, ati Ntihakagire umuntu agira ico amenya kur’ ayo majambo; ni ho utopfa.

²⁵ Arikw abaganwa ni baramuka bumvise ko twavuganye, bakaza bakakubarira, bati Twīgānire ivyo wabariye umwami, ntuduhishe, natwe ntitukwica, bati Tubgire n’ivyo umwami yakwishuye:

²⁶ uz’ ubabgire, uti Nari kwinginga umwami ngo yoye kunsubiza mu nzu kwa Yonatani, ngo ngweyo.

²⁷ Maz’ abaganwa bose baza kuri Yeremiya, barabimubaza: na we abishura amajambo yose nk’uk’ umwami yamubariye. Baca baramureka, barīgīra, kukw ayo majambo yabaye akabanga.

²⁸ Nuko Yeremiya aba mu rugo rw’ibohero, gushitsa umusi Yerusalemu hatsinzwe.