Rusi 2 - Bibliya Yera 1951 1967 (Burundi)

Rusi ahūmba mu bibuba vya Bowazi, na we amugirira neza

¹ Kandi Nawomi yar’ afise mwene wabo w’umugabo wiwe, umuntu akomeye w’umutunzi, wo mu muryango wa Elimeleki, yitwa Bowazi.

² Rusi wa Munyamowabukazi abarira Nawomi, ati Ndekura ngende mu bibuba mpūmbe uduhūmbga, nkurikire uwongirira ubuntu. Aramwishura, ati Genda, mukobga wanje.

³ Aragenda, ahūmba mu kibuba akurikiye abagenyi: kand’ umurima yarengutseko war’ uwo mw itongo rya Bowazi, wo mu muryango wa Elimeleki.

⁴ Bowazi araza, avuye i Betelehemu, abgira abagenyi, at’ Uhoraho abane namwe. Na bo baramwishura, bat’ Uhoraho aguhe umugisha.

⁵ Maze Bowazi abaza umuntu wiwe agenyesha, at’ Uyu mukobga n’uwa nde?

⁶ Ūgenyesha aramwishura, ati Ni wa Munyamowabukazi yagarukanye na Nawomi avuye mu gihugu c’i Mowabu:

⁷ kandi yansavye, ati Ndakwinginze nyemerera guhūmba nkurikire abagenyi hagati y’ imikama: nukw araza, kandi yahereye mu gatondo gushitsa n’ubu, atar’ akanya gatoya yaruhutse.

⁸ Maze Bowazi abgira Rusi, at’ Urumva, mukobga wanje? Ntuz’ ugire uwundi murima uzohūmbamwo, kandi ntuve hano, arik’ ugume hano hafi y’abigeme b’i wanje.

⁹ Shira amaso ku murima bagenya, ubakurikire: mbeg’ abahungu simbihanikirije ko batazogukoma? Kand’ iy’ ugize inyota wame ugenda ku mibindi unywe ku yo abahungu bavomye.

¹⁰ Yicisha bugufi, arūnama ashika hasi, aramubaza, ati N’iki gitumye ungirira ubuntu, ukambabara, kandi nd’ umunyamahanga?

¹¹ Bowazi aramwishura, ati Bānyigāniye neza ivyo wakoreye nyokobukwe vyose, uhereye ah’ umugabo wawe yapfiriye: kandi ko wasize so na nyoko n’igihugu wavukiyemwo, ukaza mw ihanga utār’ uzi.

¹² Uhoraho akwishure ivyo wakoze, uhabge impēra ishitse n’ Uhoraho, Imana y’Abisirayeli, wahungiye musi y’amababa yayo.

¹³ Aramwishura, ati Ni ngirirwe akagongwe imbere yawe, mugenzi, kuk’ ummaze umubabaro, ukabarira incoreke yawe neza, naho ntahwanye n’umwe wo mu ncoreke zawe.

¹⁴ Igihe co kurya kigeze, Bowazi aramubgira, ati Ngwino urye agatsima, ukoze intore yawe mu nkarisha ya vino. Yicarana n’abagenyi bamuhēreza impeke zikaranze, arazirya, arahāga, arasigaza.

¹⁵ Avuye hasi guhūmba, Bowazi abarira imikangara yiwe, ati N’ ahūmbe no hagati y’imikama, ntimumukabukire.

¹⁶ Kandi mumusokōrere zimwe mu mikama, muzisige, azihūmbe, ntimumuhambarire.

¹⁷ Nukw ahūmba mur’ ico kibuba ashitsa ni kera; akubita izo yahūmvye, izo sayiri zishika ingero yitwa efa.

¹⁸ Arazīkorera, aja mu gisagara: inabukwe abona izo yahūmvye, Rusi amugobororera utwo yashigaje amaze guhāga, aratumuha.

¹⁹ Inabukwe aramubaza, ati Wahūmvye kwa nde uyu musi? Wakoze hehe? Uwakubabaye aragahezagirwa! Asobanurira inabukwe nyen’ umurima yakozemwo uw’ ari we, aramubgira, ati Nyen’ umurima nakozemw’ uyu musi yitwa Bowazi.

²⁰ Nawomi abgira umukazana wiwe, at’ Uhoraho atāsizeho kugirira neza abakiriho n’abāpfuye, arakamuhezagira! Nawomi arongera aramubgira, at’ Uwo mugabo n’uwo mu muryango wacu wo hafi, n’umwe wo mu bacunguzi bacu.

²¹ Rusi wa Munyamowabukazi aramubarira, ati Mbere yambgiye, ati Wame ugumana n’abahungu b’i wanje, gushitsa aho bazohereza kugenya i wanje hose.

²² Nawomi abarira Rusi umukazana wiwe, ati Mukobga wanje, ni vyiza k’ujana n’abigeme bamukorera, boye kugusanga mu murima w’uwundi.

²³ Nukw aguma hafi y’abigeme bakorera Bowazi, agahūmba akageza aho bahereje kugenya sayiri bo n’ingano; abana na inabukwe.