Matayo 7 - Bibliya Yera 1951 1967 (Burundi)

Nturābe abandi utīrāvye

¹ Ntimugahinyurire mu mitima yanyu, namwe mukazohinyurwa.

² Kuko, uko muhinyura abandi, ari ko muzohinyurwa namwe; kand’ ingero mugeramwo muzoyigererwa namwe.

³ Urābira iki akabango kari mu jisho rya mugenzawe, kand’ inkingi iri mu jisho ryawe ntuyitegereze?

⁴ Wobgira ute mugenzawe, uti Zana ngutosore akabango kari mu jisho ryawe, nawe ufise inkingi mu jisho ryawe?

⁵ Wa ndyarya we, banza witosore inkingi iri mu jisho ryawe, uheze ubone neza gutosora akabango kari mu jisho rya mugenzawe.

⁶ Ivyera vy’Imana ntimukabihe imbga, kand’ imaragarita zanyu ntimuziterere ingurube, kugira ngo ntizizihonyange n’inzāra zazo, maze zikabahindukirira, zikabatabagura.

Gusaba

⁷ Musabe, muzohabga; murondere, muzoronka; muramutse, muzokwugururirwa.

⁸ Kuk’ ūsaba wese ahabga; ūrondera aronka; ūramutsa yugururirwa.

⁹ Har’ umuntu muri mwebge, umwana wiwe yomusaba umutsima, akamuha ibuye?

¹⁰ Canke yomusaba ifi, akamuha inzoka?

¹¹ None mwebge, ko muzi guha abana banyu ingabire nziza muri babi, mbega So wo mw ijuru ntazorushiriza rwose guha ivyiza abamusavye?

¹² Nukw ivyo mugomba kw abantu babagirira vyose mube ari ko mubagirira namwe; kukw ivyo ar’ ivyagezwe n’ivy’ abavugishijwe n’Imana.

Irembo ripfunganye

¹³ Muce mw irembo ripfunganye; kukw irembo ryagutse, n’inzira y’igihamo, ari vyo bijana abantu mu mahonero, kand’ abahaca ni benshi.

¹⁴ Arikw irembo ripfunganye, n’inzira ntoya, ni vyo bija mu bugingo, kand’ abahabona ni bake.

Uburyarya si kwo gutungana

¹⁵ Mwirinde abīgira abavugishwa n’Imana; baza kuri mwebge bambaye nk’intama; arikw imbere ar’ amabingira y’inkazi.

¹⁶ Muzobamenyera ku vyo bama. Mbega har’ uwokwamura inzabibu ku munyinya, cank’ insukoni ku bitovu?

¹⁷ Nukw igiti ciza cose cama ivyiza, arikw igiti kibi cama ibibi.

¹⁸ Igiti ciza ntigishobora kwama ibibi, kand’ igiti kibi ntigishobora kwama ivyiza.

¹⁹ Igiti cose kitama ivyiza kiracibga, kigatererwa mu muriro.

²⁰ Nuko muzobamenyera ku vyo bama.

²¹ Umuntu wese amvumereza, ati Mwami, Mwami; si we azokwinjira mu bgami bgo mw ijuru, atar’ ūkora ivyo Data wo mw ijuru agomba.

²² Benshi bazombgira kuri wa musi, ngo Mwami, Mwami, ntitwavugishwa n’Imana mw izina ryawe, ntitwasenda abadayimoni mw izina ryawe, ntitwakora ibitangaza vyinshi mw izina ryawe?

²³ Ni ho nzobajinjiburira, nti Nta ho nigeze mbamenya; mviraho, mwa bakora ibizira mwe.

Kwumva no gukora

²⁴ Uwumva ayo majambo yanje wese, akayakora, asa n’umuntu w’ubgenge yubatse inzu yiwe ku rutare.

²⁵ Isegenya iragwa, inkukūra iratwaza, igihuhuta kirahuhuta, bisūrira kuri nya nzu, ntiyagwa, kuko yar’ imase ku rutare.

²⁶ Arik’ uwumva ayo majambo yanje wese, ntayakore, asa n’umuntu w’imburabgenge, yubatse inzu yiwe ku musenyi.

²⁷ Isegenya iragwa, inkukūra iratwaza, igihuhuta kirahuhuta, bisūrira kuri nya nzu, irasenyuka, kand’ isenyerana ryayo riba irikomeye.

²⁸ Yesu arangije ayo majambo yose, ishengero ritangazwa n’inyigisho ziwe,

²⁹ kuko yabigisha nk’ūfise ububasha, ntase n’abanyabgenge b’ivyanditswe babo.