Matayo 28 - Bibliya Yera 1951 1967 (Burundi)

Kuzuka kwa Yesu

¹ Umusi w’isabato ushize, ku wa mbere w’imisi ndwi, umutwenzi ugomba gutambika, Mariya Magadalene na Mariya wundi baja kurāba imva.

² Habaho kunyiganyiga kw’isi gukomeye, kuk’ umumarayika w’Umwami Imana yar’ amanutse ava mw ijuru, araza akūra ca kibuye agitembagaje, acicarako.

³ Ishusho yiwe yasa n’umuravyo, impuzu ziwe zera nka shelegi.

⁴ Ubgoba yateye abarāririzi bubashira mu gatengo, bamera nk’abapfuye.

⁵ Arik’ umumarayika abgira ba bagore, ati Mweho ntimutinye, kuko nzi ko murondera Yesu, umwe yabambga;

⁶ ntari hano, kuko yazutse, nk’uko yavuze. Ngo murābe ah’ Umwami yar’ aryamye.

⁷ Ni mukwakwanye mubgire abigishwa biwe yuko yazutse mu bapfuye, kand’ azobītangira imbere kuja i Galilaya, iyo ni ho muzomubonera. Nuko n’ivyo, ndabibabgiye.

⁸ Bava ku mva n’ingoga, bari n’ubgoba n’akanyamuneza kenshi, birukanga kubibgira abigishwa biwe.

⁹ Maze Yesu ahwana na bo, ati N’amahoro. Baramwēgēra, bamufata ku birenge, baramusenga.

¹⁰ Maze Yesu arababgira, ati Ntimutinye: ni mugende mubgire bene Data ngo baje i Galilaya, ni ho tuzobonanira.

Bahēra abarāririzi

¹¹ Bakigenda, bamwe muri ba barinzi baja mu gisagara, babgira abaherezi bakuru ivyabaye vyose.

¹² Na bo bakoranira hamwe n’abashingantahe baja inama, bahēra abo basoda amahera menshi,

¹³ bati Muze muvuge, mut’ Abigishwa biwe baje mw ijoro, baramutwibana dusinziriye.

¹⁴ Icēgēra ca Kayisari ni caramuka kivyumvise, tuzomuhwamika, namwe tuzobakiza amagorwa.

¹⁵ Bābīra ya mahera, bagira nk’uko bohejwe; kand’ iryo jambo ryandagara mu Bayuda na bugingo n’ubu.

Yesu atuma abigishwa mu mahanga yose

¹⁶ Maze ba bigishwa cumi n’umwe baja i Galilaya ku musozi Yesu yabarangiye;

¹⁷ bamubonye, baramusenga, ariko bamwe barakekeranya.

¹⁸ Yesu arabēgēra, arababgira, ati Jewe nahawe ububasha bgose mw ijuru no mw isi.

¹⁹ Nuko ni mugende, muhindure amahanga yose abigishwa, mubabatiza mw izina rya Data wa twese n’iry’ Umwana n’irya Mpwemu Yera;

²⁰ mubigishe kwitondera ivyo nabageze vyose. Umve, ndi kumwe namwe imisi yose, gushitsa ku muhero w’isi.