Matayo 15 - Bibliya Yera 1951 1967 (Burundi)

Yesu agaya inyigisho z’Abafarisayo

¹ Maz’ Abafarisayo n’abanyabgenge b’ivyanditswe baza kuri Yesu bavuye i Yerusalemu, baramubaza,

² bati N’iki gitumye abigishwa bawe barenga imigenzo twabgirijwe n’aba kera, ntibakarabe iyo bagira barye?

³ Na we arababaza, ati None mweho, n’iki catumye murenga icagezwe c’Imana kubg’ imigenzo yanyu?

⁴ Kukw Imana yavuze, iti Wubahe so na nyoko; kand’ it’ Ūtutse se canke nyina ntaz’ abure kwicwa.

⁵ Ariko mweho, mugira mut’ Umuntu wese abgira se canke nyina, at’ Ico nari kugufashisha ni co nzoshikanira Imana,

⁶ ntiyubahe se canke nyina. None mwatītūye ijambo ry’Imana kubg’ imigenzo yanyu.

⁷ Mwa ndyarya mwe, Yesaya yavuze neza ivyo yavugishwa n’Imana kuri mwebge,

⁸ at’ Aba bantu banyubahisha iminwa yabo, Arikw imitima yabo iri kure yanje.

⁹ Bansengera ubusa, Kukw inyigisho bigisha ar’ ivyagezwe n’abantu.

¹⁰ Ahamagara ishengero araribgira, ati Ni mwumve, mubitahure.

¹¹ Ikija mu kanwa si co gihumanya umuntu; arikw ikiva mu kanwa ni co kimuhumanya.

¹² Bun’ abigishwa baramwēgēra, baramubarira, bat’ Urazi yukw Abafarisayo bumvise iryo jambo bakavunika umutima?

¹³ Arabishura, at’ Igitewe cose, Data wo mw ijuru atāteye, kizorandurwa.

¹⁴ Ni mubareke! N’impumyi zijana izindi. Arikw impumyi yojana iyindi mpumyi zompi zogwa mu cobo.

¹⁵ Petero aramwishura, ati Dusobanurire uwo mugani.

¹⁶ Na we aramubaza, ati Mbega namwe muracar’ imburabgenge?

¹⁷ Ntimutahura yukw ikintu cose kigiye mu kanwa kija mu nda kigaca mu nzira yaco?

¹⁸ Arikw ibiva mu kanwa biba biturutse mu mutima, ni vyo bimuhumanya.

¹⁹ Kuko mu mutima havamw’ ivyiyumviro bibi: ubgicanyi, ubusambanyi, ubushakanyi, ubgivyi, kwagiriza abandi ibinyoma, ibitutsi.

²⁰ Ivyo vyose ni vyo bihumanya umuntu. Ariko kurisha intoke zidakaravye si vyo bimuhumanya.

Yesu akiza umukobga w’Umunyakananikazi

²¹ Yesu arahava, aja ahegereye muri Tiro n’i Sidoni.

²² Umunyakananikazi ava mu ntāra yaho aratakamba, ati Ngirira imbabazi se Mugenzi, Mwana wa Dawidi: umukobga wanje afashwe nabi na dayimoni.

²³ Na we ntiyamwishura ijambo na rimwe. Abigishwa biwe baza kuri we, baramwinginga, bati Murungike, kukw agenda aradusemerera inyuma.

²⁴ Arabishura, ati Sinatumwe ku bandi, atari ku ntama zazimiye z’inzu ya Isirayeli.

²⁵ Amushikiriye aramupfukamira, ati Ntabara se Mugenzi.

²⁶ Aramwishura, ati Si vyiza kwābira umutsima w’abana ukawuterera utubga.

²⁷ Na we ati Nka ko, Mugenzi, kuk’ utubga na two twīrīra utuvunguka dukorokera musi y’ameza ya ba nyene two.

²⁸ Buno Yesu aramwishura, at’ Ukwizera kwawe ni kwinshi nyina wanje: bikubere nk’uk’ ugomba. Umukobga wiwe aca akira uwo mwanya.

Yesu akiza abarwaye benshi

²⁹ Yesu arahava, aja ku kiyaga c’i Galilaya, adūga umusozi, yicaraho.

³⁰ Abantu benshi baza kuri we bazanye abacumbagira n’ibimuga n’impumyi n’ibiragi, n’abandi benshi, babashira imbere y’ibirenge vyiwe, arabakiza.

³¹ Bituma ishengero ritangara ribonye ibiragi bivuga n’ibimuga bikomera n’abacumbagira bagenda neza n’impumyi zibona; bahimbaza Imana y’Abisirayeli.

Yesu ahāza abantu ibihumbi bine

³² Yesu ahamagara abigishwa biwe, at’ Ishengero rinteye akagongwe, kuk’ uyu ar’ umusi ugira gatatu turi kumwe, none ntibagira ico barya. Ariko singomba kubasezera bashonje, ntibagwīre isari mu nzira.

³³ Abigishwa baramubaza, bati Twokūra hehe mur’ aka gahinga imitsima ingana irtyo yo guhāza iri shengero ringaho?

³⁴ Yesu arababaza, ati Mufise imitsima ingahe? Na bo bati N’indwi, n’udufi dukeya.

³⁵ Abarira ishengero ngo ryicare hasi.

³⁶ Yābīra ya mitsima ndwi na za fi, arabishimira, arabimanyagura, abihereza abigishwa biwe, babigaburira ishengero.

³⁷ Bararya bose, barahāga; batororokanya imisigazwa y’utumanyagu, yuzura ibivumvu ndwi.

³⁸ Abāriye bar’ abagabo ibihumbi bine, ukūyemw’ abagore n’abana.

³⁹ Asezera ishengero, atambukira mu bgato, aja mu gihugu c’i Magadani.