Mariko 8 - Bibliya Yera 1951 1967 (Burundi)

Yesu ahāza abantu ibihumbi bine

¹ Mur’ iyo misi hongera kuba ishengero ryinshi, babura ivyo kurya; ahamagara abigishwa, arababarira,

² at’ Ishengero rinteye akagongwe, kuk’ uyu ar’ umusi ugira gatatu turi kumwe, none ntibagira ico barya.

³ Nobasezera ngo basubire i wabo bashonje, bogwira isari mu nzira, kandi bamwe ar’ aba kure.

⁴ Abigishwa biwe baramubaza, bat’ Umuntu yokūra hehe imitsima yo guhāza aba bantu, ko hano ari mu gahinga?

⁵ Arababaza, ati Mufise imitsima ingahe? Na bo bati N’indwi.

⁶ Abarira ishengero ngo ryicare hasi; yābīra ya mitsima ndwi, arayishimira, arayimanyagura, ayihēreza abigishwa biwe, ngo bayibagaburire: bayigaburira ishengero.

⁷ Kandi bāri bafise udufi duke; araduhezagira, avuga ko batubagaburira na two.

⁸ Bararya, barahāga, batororokanya utumanyagu tw’imisigazwa, twuzura ibivumvu ndwi.

⁹ Bāri nk’ibihumbi bine; arabasezera.

¹⁰ Uwo mwanya atambukira mu bgato, bo n’abigishwa biwe, aja ahēgereye i Dalamanuta.

Yesu yima Abafarisayo ikimenyetso kiva mw ijuru

¹¹ Haza Abafarisayo, batangura kumuhāririza, bamuronderakw ikimenyetso kiva mw ijuru, bamugeza.

¹² Yitsa umutima cane, ati N’iki gitumye ab’iki gihe barondera ikimenyetso? Ndababgira ukuri ab’iki gihe bakazohabga ikimenyetso?

¹³ Abasiga hano, yongera gutambukira mu bgato, ajabuka hakurya.

Umwambiro w’Abafarisayo, ni wo nyigisho zabo

¹⁴ Kandi bāri bibagiye gutekera imitsima, nta yo bāri bafise mu bgato, atar’ irobe rimwe.

¹⁵ Arabihanikiriza, ati Mumenye, mwirinde umwambiro w’Abafarisayo n’umwambiro wa Herode.

¹⁶ Bībūranya muri bo, bati Ntidufise imitsima.

¹⁷ Yesu arabimenya, arababaza, ati N’iki gitumye mwībūranya ngo nta mitsima mufise? Ntimuraruha mubimenya canke mubitahura? Mbega mufise imitima ikomantaye?

¹⁸ Amaso ko muyafise ntimuruha mubona? Mufise amatwi, ntimwumva, kandi ntimwibuka?

¹⁹ Hamwe namanyagurira ya mitsima itanu ibihumbi bitanu, mwatororokanije ibisimbo bingahe vyuzuye utumanyagu? Baramwishura, bati N’icumi na bibiri.

²⁰ Ati Kandi hamwe namanyagurira ya mitsima ndwi ibihumbi bine, mwatororokanije ibivumvu bingahe vyuzuye utumanyagu? Baramwishura, bati N’indwi.

²¹ Arababaza, ati Ntimuraruha mubitahura?

Yesu ahumūra impumyi

²² Baraza bashika i Betsayida. Bamuzanira impumyi, baramwinginga ngw ayikoreko.

²³ Afata iyo mpumyi ukuboko, ayikūra mu mihana, acira amate mu maso yayo, ayirambikakw ibiganza, arayibaza, ati Har’ ico ubona?

²⁴ Iraramura amaso, iramwishura, iti Ndabona abantu kuko mbona ibisa n’ibiti bigendagenda.

²⁵ Yongera kurambika ibiganza ku maso yayo, iritegereza, irakira, yihweza vyose neza.

²⁶ Amurungika i we, ati Ntuje no mur’ iyi mihana.

Petero ashinga intahe yuko Yesu ari Kristo

²⁷ Yesu avanayo n’abigishwa biwe, aja mu mihana y’i Kayisariya mu bga Filipo: bari mu nzira, abaza abigishwa biwe, at’ Abantu bagira ngo ndi nde?

²⁸ Baramwishura, bati Bagira ng’ uri Yohana Umubatizi, abandi ng’ uri Eliya, abandi ng’ ur’ umwe mu bavugishwa n’Imana.

²⁹ Na we arababaza, at’ Ariko mweho mugira ngo ndi nde? Petero aramwishura, at’ Uri Kristo.

³⁰ Arabihanikiriza ngo ntihagire umuntu babgira ivyiwe.

Petero agirira Yesu impuhwe

³¹ Atangura kubigisha, at’ Umwana w’umuntu akwiye kuzobabazwa uburyo bginshi, no kuzokwankwa n’abashingantahe n’abaherezi bakuru n’abanyabgenge b’ivyanditswe, no kuzokwicwa, maze hashize imisi itatu akazuka.

³² Avuga iryo jambo adakingitiranije. Petero aramwihererana, atangura kumwāmira.

³³ Arahindukira, abona abigishwa biwe, akankamira Petero, ati Herēra inyuma yanje, Satani, kukw ivy’ Imana atari vyo ubabaye, ariko n’ivy’ abantu.

Gukurikira Yesu mu nzira y’umusaraba

³⁴ Ahamagara ishengero bo n’abigishwa biwe, arababgira, at’ Umuntu ni yagomba kunkurikira, ni yiyanke, yikorere umusaraba wiwe, ankurikire;

³⁵ kuk’ ūgomba gukiza ubugingo bgiwe azobubura, arik’ ūzoheba ubugingo bgiwe kubganje no kubg’ ubutumwa bgiza, azobukiza.

³⁶ Kand’ umuntu vyomumarira iki kwunguka ivyo mw isi vyose, ni yakwa ubugingo bgiwe kw iciru?

³⁷ Mbeg’ umuntu yotanga iki ngw acungure ubugingo bgiwe?

³⁸ Kuk’ umuntu wese bizotera isoni kunyemera no kwemera amajambo yanje mur’ iki gihe c’ubusambanyi kandi c’ikinyavyaha, n’Umwana w’umuntu bizomutera isoni kumwemera, ah’ azozira afise ubgiza bga Se, azananye n’abamarayika bera.