Mariko 7 - Bibliya Yera 1951 1967 (Burundi)

Yesu agaya Abafarisayo

¹ Abafarisayo bakoranira kuri we n’abanyabgenge b’ivyanditswe bamwe bavuye i Yerusalemu.

² Babona abigishwa biwe bamwe barisha ivyo kurya intoke zihumanye, bisobanurwa ngo zidakaravye.

³ Arikw Abafarisayo n’Abayuda bose, iyo batīfyikinyuye mu gukaraba ntibārya, kuko bākurikiye imigenzo bābgirijwe n’aba kera.

⁴ Kandi bavuye mu kaguriro, iyo batīmijagiye amazi ntibārya, kandi harih’ ibindi vyinshi bābgirijwe n’aba kera ngo bavyumireko, nko kwoza mu buryo bginshi ibikombe n’inzavya n’inkono zikozwe mu miringa.

⁵ Abafarisayo n’abanyabgenge b’ivyanditswe baramubaza, bati N’iki gitumye abigishwa bawe badakurikira ingeso twabgirijwe n’aba kera, bagapfa kurisha ivyo kurya intoke zihumanye?

⁶ Arabishura, ati Yesaya yavuze neza ivyo yavugishijwe n’Imana kuri mwebge indyarya, nk’uko handitswe, ngw Aba bantu banyubahisha iminwa yabo, Arikw imitima yabo iri kure yanje.

⁷ Bansengera ubusa, Kukw inyigisho bigisha ar’ ivyagezwe n’abantu.

⁸ Ico Imana yageze murakireka ngo mwumire ku migenzo mwābgirijwe n’abantu.

⁹ Kand’ ati Nka ko mwagize neza gukēngēra icagezwe c’Imana, ngo muziririze iyo migenzo yanyu!

¹⁰ Kuko Mose yavuze, ati Wubahe so na nyoko: kand’ at’ Ūtutse se canke nyina, ntaz’ abure kwicwa.

¹¹ Ariko mweho mugira mut’ Umuntu ni yabgira se canke nyina, at’ Ico nari kugufashisha ni Korubani, risobanurwa ngo Ni co nzoshikanira Imana;

¹² ntimuba mukimukundira kugira ico yofasha se canke nyina;

¹³ ijambo ry’Imana mukaritituza imigenzo yanyu mwigishije: kandi mukora n’ibindi vyinshi ben’ ivyo.

¹⁴ Kandi yongera guhamagara ishengero, araribarira, ati Munyumve mwese, mubitahure:

¹⁵ nta kintu kir’ inyuma, iyo kigiye imbere mu muntu gishobora kumuhumanya, arikw ibivuye mu muntu ni vyo bimuhumanya. [

¹⁶ Namba har’ ūfise amatwi yumva, ni yumve.]

¹⁷ Yinjiye mu nzu asize ishengero hanze, abigishwa biwe bamusiguza uwo mugani.

¹⁸ Na we arababaza, ati Mbega namwe mur’ imburabgenge murtyo? Ntimutahura yukw ata kintu kir’ inyuma iyo kigiye imbere mu muntu gishobora kumuhumanya,

¹⁹ kuko kitagiye mu mutima wiwe, ariko kija mu nda, kigaca mu nzira yaco? Ivyo yabivugiye kuzirura ivyo kurya vyose.

²⁰ Kand’ aravuga, at’ Ibiva imbere mu muntu, ni vyo bimuhumanya:

²¹ kukw imbere mu mitima y’abantu havamw’ ivyiyumviro bibi, ubushakanyi,

²² ubgivyi, ubgicanyi, ubusambanyi, ukwifuza, kugira nabi, ubugunge, ivy’ isoni nke, ijisho ribi, ibitutsi, ubgibone, ubupfu:

²³ ivyo bibi vyose biva imbere ni vyo bihumanya umuntu.

Yesu akiza umukobga w’umugore w’i Sirofoyinike

²⁴ Ava aho hantu, aja mu ntāra yo muri Tiro n’i Sidoni. Yinjira mu nzu atagomba ko hogira umuntu abimenya, ariko ntiyashobora kuyoberana.

²⁵ Arik’ uwo mwanya, umugore afise akigeme kinjiwemwo n’impwemu ihumanye, amwumvise, araza, yikubita imbere y’ibirenge vyiwe.

²⁶ Uwo mugore yar’ Umugirikikazi, amamo yiwe n’i Sirofoyinike: aramwinginga ngw asende dayimoni mu mukobga wiwe.

²⁷ Aramubgira, ati Reka abana babanze guhāga, kukw atari vyiza kwābīra umutsima w’abana ukawuterera utubga.

²⁸ Na we aramwishura, ati Nka ko, Mugenzi, utubga na two turi musi y’ameza twīrīra utuvunguka tw’abana.

²⁹ Aramubgira, ati K’uvuze urtyo ni wīgīre, dayimoni avuye mu mukobga wawe.

³⁰ Arīgīra, ashitse mu nzu yiwe asanga umwana aryamye ku buriri, dayimoni amuvuyemwo.

Igipfamatwi kidatobora neza

³¹ Yongera kuva mu ntāra yo muri Tiro, araza aca i Sidoni, ashika ku kiyaga c’i Galilaya, aciye hagati y’intāra y’i Dekapoli.

³² Bamuzanira igipfamatwi kidatobora neza, baramwinginga ngw akirambikekw ikiganza.

³³ Agikūra mw ishengero, aracihererana, agishira intoke mu matwi, acira amate, agikora ku rurimi.

³⁴ Ararangamiza, arāba mw ijuru, yitsa umutima, arakibarira, ati Efata, risobanurwa ngo Zibūka.

³⁵ Amatwi yiwe arazibūka, inkingi z’ururimi rwiwe zirabohoka, avuga neza.

³⁶ Arabihanikiriza ngo ntihagire umuntu babibarira, arikw iy’ abihanikirije barushiriza gukwiza inkuru yiwe rwose.

³⁷ Baratangara cane, baravuga, bat’ Akoze vyose neza: azibūra n’ibipfamatwi, kand’ avugisha ibiragi.