Mariko 3 - Bibliya Yera 1951 1967 (Burundi)

Yesu akiza umuntu anyunyutse ukuboko

¹ Yongera kwinjira mw isinagogi; kandi hār’ umuntu anyunyutse ukuboko;

² baramugenza ngo barābe kw amukiza kw isabato, ngo bamurege.

³ Abarira uwo muntu anyunyutse ukuboko, ati Va hasi, uhagarare hagati.

⁴ Arababaza, ati Mbeg’ ivyemerwa n’ugukora ivyiza kw isabato canke n’ugukora ibibi? Gukiza umuntu canke kumwica? Barihorera.

⁵ Aberaguzamw’ amaso, aratse, ababazwa n’ukw imitima yabo ikomantaye, abarira uwo muntu, ati Ramvura ukuboko kwawe. Arakuramvura, kurakira.

⁶ Abafarisayo barasohoka, baca bamugīra inama n’abantu ba Herode ngo babone ingene bomwica.

Yesu akiza n’abandi benshi

⁷ Maze Yesu n’abigishwa biwe bavayo, baja ku kiyaga: ishengero ryinshi riramukurikira, bavuye i Galilaya n’i Yudaya

⁸ n’i Yerusalemu no muri Idumaya no hakurya ya Yorodani, n’abahereranye no muri Tiro n’i Sidoni, ishengero ryinshi ryumvise ivyo yakoze riza kuri we.

⁹ Abarira abigishwa biwe ngo bagumishe ubgato butoya hafi kubg’ ishengero, ngo ntirimubānde.

¹⁰ Kuko yakijije benshi, ni co catumye abāri bafise ivyago bose bamuhenukirako, ngo bamukoreko.

¹¹ Impwemu zihumanye na zo uko zimubonye zamwikubita imbere, zigasemerera zit’ Ur’ Umwana w’Imana.

¹² Arazihanikiriza cane, ngo ntizigende ziramwandagaza.

Yesu atoranya intumwa cumi na zibiri

¹³ Maz’ adūga umusozi muremure, ahamagara abo agomba, baza kuri we.

¹⁴ Atoranya icumi na babiri bo kubana na we, maze ngw abatume kwigisha,

¹⁵ no kugira ububasha bgo gusenda abadayimoni.

¹⁶ Nukw atoranya aba cumi na babiri: Simoni, amwita Petero;

¹⁷ atoranya na Yakobo mwene Zebedayo, na Yohana mwene nyina wa Yakobo, na bo abita Bowanerige, risobanurwa ngw Abana b’inkuba;

¹⁸ atoranya na Andereya, na Filipo, na Barutolomayo, na Matayo, na Toma, na Yakobo mwene Alufayo, na Tadayo, na Simoni Umunyakananayo,

¹⁹ na Yuda Isikaryota, ni we yamuguze. Aja mu nzu:

Yishura abashira ibikorwa vya Mpwemu kuri Satani

²⁰ ishengero ryongera gukoranira kuri we, bituma babura ingene botamira n’agatsima.

²¹ Ab’i wabo bavyumvise barasohoka ngo baje kumufata, kuko bāgira ngo Yasaze.

²² Kand’ abanyabgenge b’ivyanditswe bavuye i Yerusalemu baravuga, bat’ Arimwo Beyezebuli: kandi bat’ Umukuru w’abadayimoni ni we amushoboza gusenda abadayimoni.

²³ Arabahamagara, abacira umugani, ati Satani yoshobora ate gusenda Satani?

²⁴ Ubgami iyo bgitandukanije ubgabgo, ubgo bgami ntibushobora kurama.

²⁵ Inzu ni yitandukanya ubgayo, iyo nzu ntizoshobora kurama.

²⁶ Kandi Satani, namba yīhagurukiye, akitandukanya, ntashobora guhangama, arahera.

²⁷ Kandi nta muntu yoshobora kwinjira mu nzu y’umuntu w’inkomezi kumusahura ibintu, atabanje kuboha wa munyenkomezi, maz’ akabona kumusahura ivyo mu nzu yiwe.

²⁸ Ndababgire ukuri: Abana b’abantu bazoharirwa ivyaha vyabo vyose n’ibirogotano vyose bazorogota,

²⁹ arik’ umuntu wese azorogota kuri Mpwemu Yera nta ho azoharirwa, kand’ azoba akoze icaha c’ibihe bidashira.

³⁰ Icatumye avuga artyo n’uko bavuze ngw Arimw’ impwemu ihumanye.

Yesu yerekana umuryango wiwe bgite

³¹ Maze nyina na bene nyina baraza, batuma kumuhamagara, bahagaze hanze.

³² Ishengero ryari ryicaye rimukikije; maze baramubgira, bat’ Ereg’ umuvyeyi wawe na barumuna bawe bari hanze, barakurondera.

³³ Na we arababaza, ati Mama ni nde, canke bene mama ni ba nde?

³⁴ Yeraguza amaso abari bicaye impande zose bamukikije, ati Ngaba mama na bene mama:

³⁵ umuntu wese akora ivyo Imana igomba ni we murumunanje, ni we mushikanje, ni we mama.