Mariko 1 - Bibliya Yera 1951 1967 (Burundi)

Yohana Umubatizi

¹ Itanguriro ry’ubutumwa bgiza bga Yesu Kristo, Umwana w’Imana.

² Nk’uko vyanditswe na Yesaya yavugishwa n’Imana, Ng’ Umve, ngira ntume integuza yanje imbere y’amaso yawe, Ikuroranirize inzira.

³ Ijwi ry’ūsemererera mu bugaragwa, Ati Ni mutegure inzira y’Uhoraho, Mugorore iz’ ibihamo ziwe.

⁴ Ni ko Yohana yaje, abatiriza mu bugaragwa, yigisha ukubatizwa kwo kwihana, ngo babohorwe ivyaha.

⁵ Igihugu c’i Yudaya cose n’ab’i Yerusalemu bose bava i wabo, baza kuri we: ababatiriza mu ruzi Yorodani, bātuye ivyaha vyabo.

⁶ Kandi Yohana yambara ubgoya bg’ingamiya, akabukenyeza umukanda w’urusato mu rukenyerero, kandi yarya inzige n’ubūki bgo mw ishamba.

⁷ Yaravuga, at’ Ūndusha ubushobozi azoza mu nyuma yanje, ntibimbereye no kwunama ngo mpfundurure utugozi tw’inkweto ziwe.

⁸ Jeho ndababatirishije amazi, ariko we azobabatirisha Mpwemu Yera.

Yesu amaze kubatizwa ageragezwa na Satani

⁹ Mur’ iyo misi Yesu ava i Nazareti i Galilaya, araza, abatizwa na Yohana muri Yorodani.

¹⁰ Avuye mu mazi, aca abona ijuru ritandukanye, Mpwemu aramanuka amugwako, asa n’inuma.

¹¹ Ijwi riva mw ijuru, riti Ni wewe Mwana wanje nkunda ukampimbara.

¹² Mpwemu aca amushorera mu bugaragwa.

¹³ Amaray’ imisi mirongwine, ageragezwa na Satani; kandi yaba hamwe n’ibikōko, abamarayika bakamukorera.

Yesu avuga ubutumwa bgiza, atangura guhamagara abigishwa

¹⁴ Yohana amaze gushirwa mw ibohero, Yesu aja i Galilaya, ababgira ubutumwa bgiza bg’Imana,

¹⁵ at’ Igihe kirashitse, ubgami bg’Imana buri hafi: mwihane, mwemere ubutumwa bgiza.

¹⁶ Aciye i ruhande y’ikiyaga c’i Galilaya, abona Simoni na Andereya mwene nyina baterera urusenga mu kiyaga, kuko bār’ abarovyi.

¹⁷ Yesu arababarira, ati Ni munkurikire, nzobagira abaroba abantu.

¹⁸ Baca bareka insenga, baramukurikira.

¹⁹ Yīgiye imbere gato, abona Yakobo mwene Zebedayo na Yohana mwene nyina, na bo bari mu bgato basana insenga.

²⁰ Aca arabahamagara, basiga se Zebedayo mu bgato hamwe n’abakozi biwe, baramukurikira.

Akiza umuntu yinjiwemwo n’impwemu ihumanye

²¹ Bashika i Kaperinawumu, aca yinjira mw isinagogi kw isabato, arabigisha.

²² Batangazwa n’inyigisho ziwe, kuko yabigisha nk’ūfise ububasha, ntase n’abanyabgenge b’ivyanditswe.

²³ Uwo mwanya mw isinagogi yabo hār’ umuntu yinjiwemwo n’impwemu ihumanye, arasemerera,

²⁴ ati Duhūriye hehe ga Yesu Munyanazareti? Uje kuduhonnya? Ndakuzi uw’ uri we, ur’ Uwera w’Imana.

²⁵ Yesu aramuzibiza, ati Hora, muvemwo.

²⁶ Iyo mpwemu ihumanye iramujegeza, irasemerera, ivuga n’ijwi rirenga, imuvamwo.

²⁷ Bose baratangara, bituma babazanya, bat’ Iki n’iki? N’ukwigisha gusha! N’ububasha agera n’impwemu zihumanye na zo, zikamwumvira.

²⁸ Inkuru yiwe ica ikwira hose mu gihugu cose c’i Galilaya kihakikije.

Akiza inabukwe wa Simoni n’abandi benshi

²⁹ Bavuye mw isinagogi, baca bajana na Yakobo na Yohana mu nzu kwa Simoni na Andereya.

³⁰ Kandi inabukwe wa Simoni yar’ aryamye, afashwe n’umururumbo, baca bamubarira ivyiwe.

³¹ Araza, amufata ukuboko, aramuvyutsa, umururumbo urazima, arabazimana.

³² Ku kagoroba, ku kirengazuba, bamuzanira abarwaye bose n’abinjiwemwo n’abadayimoni.

³³ Igisagara cose gikoranira kw irembo.

³⁴ Akiza benshi bāri barwaye indwara zitari zimwe, asenda abadayimoni benshi, ntiyakundira abo badayimoni ko bavuga, kuko bāri bamuzi.

Ava i Kaperinawumu, kand’ akiza umunyamibembe

³⁵ Mw ijoro rishīra ubuca aravyuka, arasohoka, aja mu gahinga, asengerayo.

³⁶ Simoni n’abandi bāri kumwe na we baramukurikira:

³⁷ bamubonye baramubgira, bati Bose bariko barakurondera.

³⁸ Arabishura, ati Tuje ahandi mu bisagara biri hafi, na ho nyene nigisheyo, kukw ari co canzanye.

³⁹ Yinjira mu masinagogi yabo i Galilaya hose, avuga ijambo ry’Imana, asenda abadayimoni.

⁴⁰ Haza umunyamibembe kuri we, amwinginga amupfukamiye, at’ Ukunze, woshobora kumpumanura.

⁴¹ Amugirira akagongwe, aramvura ukuboko, amukorako, ati Ndakunze, humanuka.

⁴² Imibembe ica imuvako, arakira.

⁴³ Aramwihanikiriza rwose, aca amurungika uwo mwanya,

⁴⁴ aramubarira, ati Wirinde, ntugire uwo ubikerukiriza, ariko genda, wiyereke umuherezi, utange ivy’ uguhumanurwa kwawe, nk’uko Mose yageze, bibe ikimenyetso kibabere icabona.

⁴⁵ Maz’ avaho, atangura kwandagaza no gukwiza ivyabaye; ni co catumye Yesu atābaye agishobora kuja mu gisagara abandi babizi, arikw aguma inyuma yaco mu gahinga: abava hose baza kuri we.