Luka 23 - Bibliya Yera 1951 1967 (Burundi)

Yesu ashikirizwa Pilato

¹ Iryo koraniro ryose riva hasi, bamujana kwa Pilato.

² Batangura kumwagiriza, bat’ Uyu twamubonye agomesha ubgoko bgacu, ababuza gutanga ikori rya Kayisari, yivuga ngo ni Kristo, Umwami.

³ Pilato aramubaza, ati Ni wewe Mwami w’Abayuda? Na we aramwishura, at’ Urarivuze.

⁴ Pilato abgira abaherezi bakuru n’ishengero, ati Nta caha mbona kur’ uyu muntu.

⁵ Na bo barashimika, bat’ Asibanganya igihugu, yigisha i Yudaya hose; yahereye i Galilaya ageza n’ino.

Pilato arungika Yesu kwa Herode

⁶ Pilato avyumvise, abaza yuk’ uwo muntu ar’ Umunyagalilaya.

⁷ Amenye yukw ar’ uwo mu gihugu ca Herode, amurungika kwa Herode, kuko na we yar’ i Yerusalemu mur’ iyo misi.

⁸ Herode abonye Yesu aranezerwa cane, kuko yahereye kera yifuza kumurāba, kuko yahora yumva ivyiwe, kandi yaziga ko yobona ikimenyetso yokora.

⁹ Amubaza amajambo menshi, ntiyamwishura na rimwe.

¹⁰ Abaherezi bakuru n’abanyabgenge b’ivyanditswe barahagarara, bakovya kumwagiriza cane.

¹¹ Herode aramutitura, hamwe n’abasoda biwe, aramushinyagurira, maz’ amwambika impuzu y’inyambarabami, amusubiza kwa Pilato.

¹² Herode na Pilato baca buzura uwo musi nyene, kuko bāri basanzwe bankana.

Pilato acira Yesu urubanza

¹³ Pilato akoranya abaherezi bakuru n’abashingantahe n’abantu,

¹⁴ arababgira, ati Mwanzaniye uyu muntu ngw agomesha abantu; none jewe namucunagurije imbere yanyu, nta caha mbona kuri we ku vyo mwamureze.

¹⁵ Na Herode n’uko, kuko yamudushubije: kandi rāba nta co yakoze gikwiye kumwicisha.

¹⁶ Nuko ndamukubita, ndamurekure. [

¹⁷ Kuko yar’ akwiye kubarekurira imbohe imwe mur’ iyo misi mikuru.]

¹⁸ Ariko bose basemererera icarimwe, bati Kūrah’ uyo, uturekurire Baraba.

¹⁹ Uwo yari yashizwe mw ibohero bamuhōye ukugarariza kwabaye mur’ ico gisagara, bo n’ubgicanyi.

²⁰ Pilato yongera kubabgira, kukw agomba kurekura Yesu.

²¹ Ariko bo barayogora, bati Mubambe, mubambe.

²² Ababaza ubugira gatatu, ati Ku ki? Uyu yakoze ikibi ki? Simmubonakw igikwiye kumwicisha; nuko ndamukubita, ndamurekure.

²³ Ariko barīhambīra bavuga n’amajwi arenga, bamusaba kw abambga, amajwi yabo aramunesha.

²⁴ Nuko Pilato aca urubanza nk’uko bamusavye.

²⁵ Arekura uwashizwe mw ibohero bamuhōye ubugarariji n’ubgicanyi, uwo basavye; maz’ atanga Yesu ngw agirwe uko bagomba.

Abagore b’i Yerusalemu baborogera Yesu

²⁶ Bakimujana, bafata umuntu yitwa Simoni Umunyakurene, avuye mu misozi, bamukorera umusaraba, ngw awikorere akurikiye Yesu.

²⁷ Ishengero ry’abantu ryinshi riramukurikira, ririmwo n’abagore bishishitira, bamuborogera.

²⁸ Yesu arabakebuka, ati Yemwe bakobga b’i Yerusalemu, ntimundirire, ariko mwiririre n’abana banyu,

²⁹ kukw imisi izoza bazovuga, bati Hahirwa abāgumbashe n’inda zitigeze kuvyara n’amabere atigeze kwonsa.

³⁰ Ni ho bazotangura kubarira imisozi, bati Ni mutugweko; n’imirambi, bati Ni mudupfuke.

³¹ Ko bagirira bartyo igiti kibisi, non’ icumye kizogirirwa gite?

³² N’abandi babiri, b’inkozi z’ibibi, bajananwa na we kwicanwa na we.

Babamba Yesu, bamushinyagurira

³³ Bashitse ahantu hitwa Nyagihanga, bamubambanaho na za nkozi z’ibibi, umwe i buryo bgiwe, uwundi i bumoso.

³⁴ Yesu aravuga, ati Data, n’ubaharire, kuko batazi ico bakora. Bagabura impuzu ziwe, barazipfindira.

³⁵ Abantu bahagarara barāba. Abashingantahe na bo bamutwengera mw ijigo, bati Yakijije abandi, ni yikize, namb’ ari Kristo w’Imana, uwatoranijwe na yo.

³⁶ N’abasoda baramucurīra, baramwēgēra, bamuha inkarisha,

³⁷ baramubarira, bati Ni waba ur’ Umwami w’Abayuda, ni wikize.

³⁸ Hejuru yiwe kandi hār’ icandiko canditswe, ng’ UYU N’UMWAMI W’ABAYUDA.

Ukwihana kw’umwe mu bambuzi

³⁹ Umwe mu nkozi z’ibibi babambge aramutuka, ati Si wewe Kristo? Ni wikize, natwe udukize.

⁴⁰ Arik’ uwa kabiri amwishura amuhana, ati No kwubaha Imana ntuyubaha, kand’ uciriwe urubanza rumwe n’urwiwe?

⁴¹ Tweho turishuye, kuko tugiriwe ibihwanye n’ivyo twākoze: arik’ uyu nta kibi yakoze.

⁴² Kand’ aravuga, at’ Urahava uz’ unyibuke Yesu, ah’ uzozira mu bgami bgawe.

⁴³ Aramwishura, ati Ndakubgire ukuri: Uyu musi urabana nanje muri Paradiso.

Urupfu rwa Yesu

⁴⁴ Kandi hāri nk’isaha zitandatu, ubgirakabiri bukorana mu gihugu cose, bushitsa mw isaha y’icenda,

⁴⁵ izuba ryazimanganye; igihuzu gikingiriza ahēra cane h’urusengero gitantamukamwo kubiri.

⁴⁶ Yesu amaze gusemerera n’ijwi rirenga, aravuga, ati Data, mu maboko yawe ni ho nshize ubugingo bganje. Ahejeje kuvuga artyo aracīkāna.

⁴⁷ Umugabisha w’abasoda ijana abonye ibibaye, ahimbaza Imana, ati N’ukuri uyu muntu yar’ umugororotsi.

⁴⁸ Ishengero ryose ryari ribikungereye, babonye ibibaye basubira inyuma bishishitira.

⁴⁹ Abazinanyi na Yesu bose n’abagore bāri bavanye i Galilaya na we bāri bahagaze kure barāba ivyo.

Yosefu aja guhamba Yesu

⁵⁰ Maze hār’ umuntu yitwa Yosefu, yar’ umunyekombe, kandi yar’ umunyangeso nziza agororotse.

⁵¹ Uwo ntiyari yafatanije inama n’abandi n’ivyo bākoze; yar’ Umunyarimataya, igisagara c’Abayuda, yar’ areretse ubgami bg’Imana.

⁵² Uyo aja kuri Pilato, asaba ikiziga ca Yesu.

⁵³ Arakibambūra, akizingira mu mpuzu yera, agishira mu mva yimbge mu bitandara, itarahambgamw’ umuntu.

⁵⁴ War’ umusi wo Kwitegura, isabato igira ishike.

⁵⁵ Abagore bāri bavanye na Yesu i Galilaya bakurikira Yosefu, babona iyo mva, n’ingen’ ikiziga ciwe gishizwemwo.

⁵⁶ Basubira inyuma, bategura ibimota neza n’amavuta atāmirana. Kandi kw isabato bararuhuka, nk’uko vyagezwe.