Kuvayo 31 - Bibliya Yera 1951 1967 (Burundi)

Uhoraho atoranya abakozi b’abahinga

¹ Uhoraho yongera kubarira Mose,

² at’ Ehe rāba, ntoranije Besaleli mwene Uri, Uri mwene Huri, wo mu muryango wa Yuda;

³ kandi ndamwujuje impwemu yanje, kugira ngw agire ubgenge no gutahura no kumenya n’ubuhinga bg’uburyo bgose,

⁴ mu vyo kwigenera ibikorwa vy’ubuhanga, no mu vyo gucura izahabu n’ ifeza n’imiringa,

⁵ no mu vyo gukeba utubuyenge two kurumikwa mw izahabu, no mu bubāji, no mu vy’ubuhinga bg’uburyo bgose.

⁶ Kandi rāba, ndamushizeko Oholiyabu mwene Ahisamaki, wo mu muryango wa Dani; kandi mu mitima y’abantu bose b’ abahinga ndayishizemw’ ubgenge, ngo bakore ivyo nakubariye vyose, ni vy’ibi:

⁷ rya hema ry’ibonaniro, na ya sandugu y’Ibishinga intahe, na wa mutemere wo guhongerako, n’ibindi bintu vyose vyo mur’ iryo hema;

⁸ na ya meza n’ibintu vyayo, na ca giterekwakw amatara c’izahabu iramuye, n’ibintu vyaco vyose, na ca gicaniro co kwoserezakw imibavu;

⁹ na ca gicaniro co kwoserezakw ibimazi n’ibintu vyaco vyose, na ca kigārigāri n’intebe yaco;

¹⁰ na ya myambaro ijishitse, ni yo myambaro yejejwe yo kwambara Aroni umuherezi, n’iy’abana biwe, yo gukoramw’ igikorwa c’ubuherezi;

¹¹ na ya mavuta yo kurobanuza abahabga ibango, na ya mibavu y’ibintu bimoga yo kwosereza Ahēra: ivyo vyose baze babikore nk’uko nyene ndabikugeze.

Uhoraho yihanikiriza ivy’ ukuziririza isabato

¹² Uhoraho abarira Mose,

¹³ ati Kand’ uz’ ubarire Abisirayeli, uti Ntimuze mubure kuziririza amasabato yiwe; uti Kukw ari yo kimenyetso hagati yiwe namwe ukw ibihe vy’urunganwe rwanyu bizogenda bikurikirana, kugira ngo mumenye kw ari we Uhoraho yama abeza.

¹⁴ Uti Nuko muze muziririze isabato, kukw ar’ iyera kuri mwebge; umuntu wese azoyizirūra ntaz’ abure kwicwa: mber’ uwogira ic’ akora cose kur’ uwo musi, az’ arandurwe mu bgoko bgabo.

¹⁵ Mu misi itandatu abe ari ho ibikorwa bikorerwa, arik’ ūgira indwi n’isabato yo kuruhūka bihebuje, yerejwe jewe Uhoraho: ūzogira igikorwa na kimwe akora kur’ uwo musi w’isabato, ntaz’ abure kwicwa.

¹⁶ Nukw Abisirayeli baze baziririze isabato, baze bayitondere ukw ibihe vy’urunganwe rwabo bizogenda bikurikirana, rize ribe isezerano ry’intahava.

¹⁷ N’ikimenyetso hagati yanje n’Abisirayeli kugeza ibihe vyose: kuko mu misi itandatu ari yo jewe Uhoraho naremeyemw’ ijuru n’isi, ku musi ugira indwi nkarangiza, nkaruhūka.

¹⁸ Uhoraho amaze kubonanira na Mose kur’ uwo musozi Sinayi, amuha ibisate bibiri vyanditswekw Ibishinga intahe, ivyo bisate vyar’ ivy’ amabuye, vyanditsweko n’ urutoke rw’ Imana.