Kuvayo 26 - Bibliya Yera 1951 1967 (Burundi)

Ivy’ ihema ry’Imana

¹ Maz’ ihema ry’imbere uz’ urikore urtya: urikoreshe impuzu cumi; izo mpuzu zijishwe mu nyuzi zera derere nziza zihinzwe neza, no mu nyuzi z’amasufe no mu z’amashigisha no mu zisa n’agahama; zize zijishwekw ibishushanyo vy’abakerubi, bijishwe n’abahinga bavyo.

² Uburebure bg’impuzu yose buze bube amatambge mirongwibiri n’umunani y’ukuboko uciriye mu nkokora, ubgaguke bgayo bube amatambge ane: impuzu zose zibe cabugerwe.

³ Impuzu zitanu zirōngōranywe ukwazo, zindi zitanu zirōngōranywe ukwazo.

⁴ Kand’ uz’ utēre utugombo tw’udutambara tw’amasufe ku ruhande rumwe rw’impuzu iherera izarōngōranijwe za mbere; uheze utēre n’utundi tugombo nk’utwo ku ruhande rw’ impuzu iherera izindi mu zārōngōranijwe za kabiri.

⁵ Utugombo tuze tube mirongwitanu utwo utēye ku mpuzu imwe, no mu zindi za kabiri zārōngōranijwe, utēre utundi mirongwitanu nyene ku ruhande rw’īherera izindi; utwo tugombo dutumberane.

⁶ Uz’ ucure uturinda mirongwitanu mw izahabu, udufatanishe izo mpuzu zārōngōranijwe: kugira ngw iryo hema ricike rimwe ryiramvuriye.

⁷ Kand’ uz’ ujishe impuzu mu bushenza bg’impene, zibe ihema ryo hejuru ryo gupfuka iryo hema ry’imbere: ujishe impuzu cumi n’imwe.

⁸ Uburebure bg’ impuzu yose bube amatambge mirongwitatu y’ukuboko uciriye mu nkokora, ubgaguke bgayo bube amatambge ane; izo mpuzu ukw ar’ icumi n’imwe zibe cabugerwe.

⁹ Urōngōranye impuzu zitanu ukwazo, zitandatu na zo ukwazo: iya gatandatu uyikubemwo kubiri ku rwinjiriro rw’ihema.

¹⁰ Kand’ uz’ utēre utugombo mirongwitanu ku ruhande rw’impuzu iherera izarōngōranijwe za mbere, uheze utēre n’utundi mirongwitanu nyene ku ruhande rw’impuzu iherera izindi mu zārōngōranijwe za kabiri.

¹¹ Kand’ uz’ ucure uturinda mirongwitanu mu miringa, utwinjize mur’ utwo tugombo, ufatanye ivyo bihimba vy’iryo hema, ricike rimwe ryiramvuriye.

¹² Ikizosāguka mu mpuzu z’ihema ryo hejuru, igihimba kizosāguka, kize cēnēnere ahahera inyuma kur’ iryo hema ry’imbere.

¹³ Ku mpuzu z’ihema ryo hejuru, ibihimba bizorenga vy’itambge rimwe‐rimwe ku mpande zompi, bize vyēnēnere mu mbavu z’iryo hema ry’imbere, biritwikire.

¹⁴ Kand’ uz’ ubarīranye ico kurenza hejuru y’iryo hema ryo hejuru mu nsāto z’amapfizi y’ intama zizizwe mu gahama, hejuru yaco uz’ ukirenzekw ikindi gikozwe mu nsāto z’ibikōko vyitwa tahashi.

Ivy’ imbaho z’iryo hema

¹⁵ Kand’ uz’ ubāze imbaho mu giti c’umushita zo guhagarika iryo hema ry’imbere, uzishinge.

¹⁶ Uburebure bg’urubaho rumwe‐rumwe buze bube amatambge cumi y’ukuboko uciriye mu nkokora, ubgaguke bgarwo bube itambge rimwe n’igihimba.

¹⁷ Kandi ku rubaho rumwe‐rumwe haze habe inkago zibiri zirume kuri rwo: ukw abe ari k’uzokora ku mbaho zose z’iryo hema.

¹⁸ Nuko rer’ uz’ ubāze izo mbaho z’iryo hema, izo mu ruhande ahahera i bumanuko zibe mirongwibiri.

¹⁹ Kand’ uz’ ucure ibitereko mirongwine mw ifeza, bije musi y’izo mbaho ukw ari mirongwibiri: ibitereko bibiri‐bibiri bije musi y’urubaho rumwe‐rumwe, vyo kurokezwamwo za nkago ukw ari zibiri, birtyo birtyo.

²⁰ Kand’ uz’ ubāze izindi mbaho mirongwibiri z’urundi ruhande rw’iryo hema, ruhera i burārūko,

²¹ na zo uzicurire ibitereko vyazo mirongwine mw ifeza: ibitereko bibiri‐bibiri bije musi y’urubaho rumwe‐rumwe.

²² Kand’ uz’ ubāze imbaho zitandatu z’ahahera inyuma kur’ iryo hema, hahera i burengerazuba.

²³ Kand’ utek’ ubāze imbaho zibiri zo ku mfuruka z’iryo hema, ahahera inyuma nyene.

²⁴ Hasi zibe zibiri‐zibiri, arikw ahahera hejuru zimatanywe, ah’ ikigombo ca mbere kigera: abe ari ko zimera zompi; zibe izo ku mfuruka zompi z’ahahera inyuma.

²⁵ Nukw izo mbaho zose na zose zizoba munani, n’ibitereko vyazo vy’ifeza cumi na bitandatu: ibitereko bibiri‐bibiri bije musi y’urubaho rumwe‐rumwe.

²⁶ Kand’ uz’ ubāze ibiti vy’ intumba mu giti citwa umushita: ibiti bitanu vyo kuja ku mbaho zo ku ruhande rumwe rw’iryo hema,

²⁷ n’ibindi bitanu vyo kuja ku zo ku rundi ruhande rwaryo, n’ibindi bitanu vyo kuja ku z’ ahahera inyuma kur’ iryo hema nyene, ahahera i burengerazuba.

²⁸ Igiti co hagati y’ibindi, kiri hagati kur’ izo mbaho, kize kibe umwishikira.

²⁹ Kand’ izo mbaho uz’ uzomekekw izahabu, uheze uzicurire ibigombo vy’izahabu vyo gusobekamwo vya biti; n’ivyo biti na vyo uz’ uvyomekekw izahabu.

³⁰ Nuk’ uz’ ushinge iryo hema, nk’ukw ikigereranyo caryo werekewe kur’ uyu musozi kimeze.

Ivy’ igihuzu gikingiriye ahēra, n’ico ku muryango

³¹ Kand’ uz’ ujishe igihuzu co gukingīra, ukijishe mu nyuzi z’ amasufe no mu z’amashigisha no mu zisa n’agahama, no mu zera derere nziza zihinzwe neza; kize kijishwekw ibishushanyo vy’abakerubi, bijishwe n’abahinga bavyo.

³² Uz’ ukimanike ku misumari yacuzwe mw izahabu, iri ku nkingi zine zabājwe mu giti c’ umushita zometswekw izahabu, zineze mu bitereko bine vy’ifeza.

³³ Kand’ ico gihuzu uz’ ukimanike ugitumbereje musi ya twa turinda, uze winjize ya sandugu y’Ibishinga intahe hirya yaco: ico gihuzu kize kibabere ico gutandukanya Ahēra n’Ahēra cane.

³⁴ Kandi wa mutemere wo guhongerako uz’ uwurumye kur’ iyo sandugu y’ Ibishinga intahe, ir’ Ahēra cane.

³⁵ Kandi ya meza uz’ uyashire hino y’ico gihuzu, na ca giterekwakw amatara uz’ ugishire ku ruhande rw’i bumanuko mur’ iryo hema, aharābana n’ayo meza; ayo meza na yo uyaherereze mu ruhande rw’i burārūko.

³⁶ Wongere ujishe n’igihuzu co gukinga ku muryango w’ihema, mu nyuzi z’amasufe no mu z’amashigisha no mu zisa n’agahama, no mu zera derere nziza zihinzwe neza, kijererenzwekw amabara n’ abahinga.

³⁷ Kand’ uz’ ubāze inkingi zitanu mu giti c’umushita z’ico gihuzu co gukinga, uzomekekw izahabu: imisumari yo kuri zo icurwe mw izahabu nyene; kand’ uz’ uvugutire imiringa, uyikūremw’ ibitereko bitanu vyo kunegamw’ izo nkingi.