Kuvayo 21 - Bibliya Yera 1951 1967 (Burundi)

Ivyagezwe vyo ku bagurano na ba shebuja

¹ Ibi ni vyo vyagezwe uzobashikiriza.

² Ni hagira ūgura umugurano w’Umuheburayo nka we, az’ amujākarire imyaka itandatu: mu mwaka ugira indwi az’ arekurwe, yībēre mu mwidegemvyo, ata co yicunguje.

³ Namb’ azoba yaraje wenyene, agende wenyene; namb’ azoba yazananye n’umugore, ajane na we.

⁴ Kandi shebuja namba yaramuhaye umugore, bakavyarana abahungu cank’ abakobga, nya mugore n’abana biwe bazosigara ar’ aba shebuja, na we agende wenyene.

⁵ Arik’ uwo mugurano ni yavuga amaramaje, ati Nkunda databuja n’umugore wanje n’abana banje, singomba kurekurwa ngo nje mu mwidegemvyo:

⁶ shebuja amuzane aho ndi, jewe Imana, aheze amuhagarike ku rugi canke ku gishimaryango, amutoboze ugutwi umugera; uwo az’ arinde apfa akimujākariye.

⁷ Umuntu ni yashōra umwana wiwe w’umukobga akaja kuba umugurano, igihe kigeze ntaz’ arekurwe nk’uko barekura abagurano b’abagabo.

⁸ Ariko n’atātunganira shebuja, yari yaramurongoye, shebuja aze yemere acungurwe. Ariko kumugura n’abanyamahanga ntivyemerwa, kukw azoba yaramwononye.

⁹ Canke ni yamuha umuhungu wiwe, amutere itēka nk’uko yogiriye umukobga wiwe.

¹⁰ Na ho ni yamuharika uwundi, ntaz’ ahaze umutēko wiwe w’ inyama yamugereye cank’ imyambaro yiwe, cank’ imbu ziwe.

¹¹ Ni yaramuka atiriganye mur’ ivyo ukw ari bitatu, uwo mugore az’ arekurwe gusa, ata mahera atanzwe.

Ivyagezwe vy’uwishe umuntu

¹² Ūkubise uwundi, agapfa, ntaz’ abure kwicwa.

¹³ Arik’ uwobigira atavyitumye, ari jewe Imana ntumye amugwa mu maboko, nzokurangira ah’ azohungira.

¹⁴ Arik’ umuntu ni yatera mugenzi we ibigirankana, ngw amwice mu bugunge, muze mumukūre ku gicaniro canje, kugira ngo yicwe.

¹⁵ Ūkubise se canke nyina, ntaz’ abure kwicwa.

¹⁶ Uwivye umuntu ngw amushōre, ar’ ūmaze kumugura, cank’ ar’ ūmufatanywe, ntaz’ abure kwicwa.

¹⁷ Ūvumye se canke nyina, ntaz’ abure kwicwa.

¹⁸ Abantu ni barwana, umwe agatera uwundi ibuye, cank’ akamusekura igipfunsi, akamara imisi arwaye, ariko ntapfe:

¹⁹ amaze gusubira kuvyuka, akāndārira ku kibando, uwamukubise ntaze yicwe, arikw az’ amurihe imisi amaze arwaye, atekw amuvūze, kugeza akize neza.

²⁰ Umuntu ni yakubita inkoni umugurano wiwe, cank’ umuguranokazi, akamugwa mu maboko, ntaz’ abure guhanwa;

²¹ ariko ni yasība rimwe canke kabiri atarahwera, ntaz’ abihanirwe: kuko vyar’ ibintu vyiwe.

²² Abantu ni barwana, bagaca ku mugore akuriwe, bigatuma inda yiwe ikoroka, ariko ntāgire ikindi aba: ūmuciyeko ntaz’ abure kuriha ico umugabo w’uno mugore azomucira cose; az’ arihe nk’ ukw abacamanza bazoshinga.

²³ Ariko ni yagira ikindi aba, uz’ ugere k’ubugingo buhōrwa ubundi,

²⁴ ijisho rihōrwe irindi, iryinyo rihōrwe irindi, igikonjo gihōrwe ikindi, ikirenge gihōrwe ikindi,

²⁵ ubushe buhōrwe ubundi, uruguma ruhōrwe urundi, umushishu w’inkoni uhōrwe uwundi.

²⁶ Umuntu ni yakubita umugurano wiwe cank’ umuguranokazi, akamumena ijisho, amurekure yidegemvye kukw amumennye ijisho.

²⁷ Kandi ni yakubita umugurano wiwe cank’ umuguranokazi, akamuhongora iryinyo, amurekure yidegemvye kukw amuhongoye iryinyo.

Ivyagezwe vyo ku nka zica

²⁸ Ni hagira inka yica umugabo cank’ umugore, agashika, iyo nka ntiz’ ibure kwicishwa amabuye, kandi ntiz’ iribge; ariko nyene yo ntaz’ ashirwe mu rukinja.

²⁹ Arikw iyo nka ni yaba yar’ isanzwe yica, nyene yo bakaba baramwihanije, ntayizigame, ikica umugabo cank’ umugore, agashika, iyo nka ize yicishwe amabuye, na nyene yo na we bamwice.

³⁰ Na ho ni bamwaka indihano, atange ico bazomucira cose, kugira ngw acungure ubugingo bgiwe.

³¹ Naho yokwica umwana w’umuntu, ar’ umuhungu cank’ umukobga, nyene yo agirwe nk’ukw ico cagezwe kivuga.

³² Arikw inka ni yica umugurano cank’ umuguranokazi, nyene yo az’ arihe shebuja w’uno shekeli z’ifeza mirongwitatu, iyo nka na yo ize yicishwe amabuye.

³³ Umuntu ni yarumūra urwobo rwo kubīka amazi, canke ni yarwimba ntarurumye, inka ikarukorokeramwo cank’ indogoba;

³⁴ nyene rwo az’ arihe ico yar’ imaze, ahe nyene yo amahera, umuvyimba ube uwa nyen’ urwobo.

³⁵ Inka y’umuntu ni yica iy’ uwundi, igahwera, iyishe iyindi bayigure, bagabure ivyo iguzwe, n’ umuvyimba na wo nyene bawugabure.

³⁶ Na ho ni vyaba bizwi kw iyo nka yar’ isanzwe yica, nyene yo ntayizigame, ntaz’ abure kuyiriha iyindi, umuvyimba ukaba uwiwe.