Kuvayo 2 - Bibliya Yera 1951 1967 (Burundi)

Mose atorwa n’umukobga wa Farawo

¹ Umuntu wo mu muryango wa Lewi aragenda, arongora umukobga wo mu Balewi nyene.

² Uwo mugore asama inda, avyara umuhungu: maz’ abonye uwo mwana kw ari mwiza, aramunyegeza kumara amezi atatu.

³ Atagishoboye kumuhisha, yābīra agatebo kajishwe mu nkorogoto, agahoma kaburimbi n’ishīshi; ashiramw’ uwo mwana, agashira mu rufunzo mu munyika ku ruzi.

⁴ Mushiki we aramwitangūra, ngw arābe ico yoba.

⁵ Maz’ umukobga wa Farawo amanuka kwiyuhagira mu ruzi, incoreke ziwe zigendagenda ku nkombe y’uruzi. Abona ka gatebo mu rufunzo, atuma incoreke yiwe kukazana.

⁶ Arakarumūra, asanga karimw’ umwana: kand’ uwo mwana yarikw ararira. Amutera akagongwe, at’ Uyu n’umwana wo mu Baheburayo.

⁷ Maze mushiki we abaza uwo mukobga wa Farawo, ati Mbega sinoja kukuronderera umugore wo mu Baheburayo ngw amukwonkereze?

⁸ Umukobga wa Farawo aramwishura, at’ Ego me, genda. Nuk’ uwo mukobga aragenda, ahamagara nyina w’uwo mwana.

⁹ Umukobga wa Farawo aramubarira, ati Jana uyu mwana, umunyonkereze, nzokugerera. Uwo mugore ajana uwo mwana, aramwonsa.

¹⁰ Umwana amaze gukura, amushīra umukobga wa Farawo, acika umwana wiwe. Amwita Mose, ati N’uko namukūye mu mazi.

Mose yishe Umunyegiputa, ahungira i Midiyani

¹¹ Maze Mose amaze gukura, umusi ur’ izina agendera bene wabo, yitegereza ubugene batwazwa ituntu; abona Umunyegiputa akubita Umuheburayo w’i wabo.

¹² Yeraguza hirya no hino, maz’ abonye kw ata wumubona, yica uwo Munyegiputa, umuvyimba awuhisha mu musenyi.

¹³ Bukeye bgaho, asubiye kwanduruka, agize artya aseruka ku bagabo babiri b’Abaheburayo barwana: abaza ūsindiye uwundi, ati N’iki gitumye ukubita mugenzawe?

¹⁴ Aramwishura, ati Ni nde yakugize umukuru cank’ umucamanza wacu? Mbeg’ ugomba kunyica nk’uko wishe wa Munyegiputa? Mose aratinya, arivuganya, ati N’ukuri vyaramenyekanye.

¹⁵ Farawo avyumvise, arondera uko yokwica Mose. Ariko Mose aramuhunga, ahungira mu gihugu c’i Midiyani: yicara i ruhande y’ iriba.

¹⁶ Kandi hār’ umuherezi w’i Midiyani yar’ afise abakobga ndwi: baraza, baravoma, buzuza ingomero, ngo bashore umukuku w’ intama wa se.

¹⁷ Haza abungere, barabirukana: ariko Mose ava hasi, arabatabara, ashora umukuku wabo.

¹⁸ Bashitse kwa se Ruweli, arababaza, ati Ko muje n’ ingoga uyu musi?

¹⁹ Bati N’ uk’ umuntu w’Umunyegiputa yadutabaye abungere, atakw atuvomera n’amazi, ashora umukuku.

²⁰ Abaza abo bakobga, ati Non’ ari hehe? N’iki catumye musiga uwo muntu? Ni mumuhamagare, tumufungurire.

²¹ Maze Mose ashima kubana n’uwo muntu: na we arahava amuha umwigeme wiwe Zipora.

²² Avyara umuhungu, se amwita Gerushomu, ati Nabaye inyambukīra mu gihugu kitar’ icacu.

Umuniho w’Abisirayeli ushika ku Mana

²³ Hashize igihe kirekire, umwami wa Egiputa aratanga: Abisirayeli banihishwa no kuba mu buja, barataka; ugutaka batakishwa n’ubgo buja kuradūga, gushika ku Mana.

²⁴ Imana yumva amaborogo yabo, yibuka isezerano ryayo yasezeraniye Aburahamu na Isaka na Yakobo.

²⁵ Imana yitegereza Abisirayeli, ibona uko bameze.