Guharūra 31 - Bibliya Yera 1951 1967 (Burundi)

Abisirayeli batsinda Abamidiyani

¹ Uhoraho abarira Mose,

² ati Subiriza Abamidiyani mu nkōko ku vyo bāgiriye Abisirayeli; hanyuma uzotāmbūra, uhamvye abanyu.

³ Nuko Mose abarira abantu, ati Ni musobanure abantu muri mwebge bo kuja mu ntambara, mubahe ibirwanishwa, baje gutera Abamidiyani, kubgo kwīhōra kw’ Uhoraho, babasubirize mu nkōko.

⁴ Mu muryango wose wo mu miryango y’Abisirayeli mukūremw’ ingabo igihumbi‐igihumbi, mubarungike gutera.

⁵ Nuko mu bihumbi vy’Abisirayeli basobanura mu muryango wose igihumbi‐igihumbi, ziba ingabo ibihumbi cumi na bibiri zitwaje ibirwanishwa.

⁶ Nuko Mose arungika izo ngabo gutera, ukw ar’ igihumbi‐igihumbi mu miryango yose; abarungikana na Finehasi mwene Eleyazari umuherezi, ajanye ibintu vyera n’inzumbete zo kuvuzwa ijwi rirengēra.

⁷ Nuko barwana n’Abamidiyani, nk’uk’ Uhoraho yabariye Mose; bica uw’ izinamuhungu wese.

⁸ Kand’ ukūye abandi bishe, bica abami b’Abamidiyani, ni bo aba: Ewi, na Rekemu, na Tsuri, na Huri, na Reba, abo bami b’Abamidiyani ukw ari batanu; kandi na Balamu mwene Beyori bamwicisha inkota.

⁹ Abisirayeli bafata mpiri Abamidiyanikazi n’abana babo; banyaga inka zabo zose n’imikuku yabo yose, basahura n’ibintu vyabo vyose.

¹⁰ Baturira ibisagara bābamwo vyose, n’insāgo zose bari bashagajemwo.

¹¹ Batabarukana isahu yose n’iminyago yose y’ abantu n’ibigenda.

¹² Abafashwe mpiri n’iminyago n’amasahu babizanira Mose na Eleyazari umuherezi n’ikoraniro ry’Abisirayeli, aho bashagaje mu kiyaya c’i Mowabu, kuri Yorodani, aharābana n’i Yeriko.

Abatabarutse babarirwa kwihumanura

¹³ Mose na Eleyazari umuherezi, n’abakuru bose b’iryo shengero, babasanganirira inyuma y’aho bashagaje.

¹⁴ Maze Mose arakira abagabisha b’ingabo, abagaba ibihumbi n’abagaba amajana, batabarutse mu ntambara.

¹⁵ Arababaza, ati Mbeg’ abagore n’abakobga mwabaretse bose?

¹⁶ Ereg’ abo ni bo bacumuje mwebge Abisirayeli k’Uhoraho ngo mumuhemukire mu vyabaye i Peyori, babitewe n’inama za Balamu, bituma ikīza gitera ishengero ry’Uhoraho.

¹⁷ Nuko rero ni mwice umuhungu wese mu bana, n’umugore n’umukobga wese yigeze kuryamana n’umugabo.

¹⁸ Arikw abigeme bose batigeze kumenya icitwa umugabo abe ari bo mureka, mubītungire.

¹⁹ Kandi namwe ubganyu, mugume inyuma y’aho dushagaje, muhasagaze kumara imisi ndwi; uwishe wese, n’uwakoze ku muvyimba wese, aze yihumanure ku musi ugira gatatu no ku wugira indwi, mwihumanurane n’abo mwafashe mpiri.

²⁰ Muhumanure n’imyambaro yose, n’ivyakozwe mu nsāto vyose, n’ivyajishwe mu bgoya bg’impene vyose, n’ibintu vyose vy’ibibāzano.

²¹ Maze Eleyazari umuherezi abarira izo ngabo zitabarutse, at’ Ibi ni vyo icagezwe Uhoraho yageze Mose kibgiriza:

²² kw ibintu vyo mw izahabu n’ivyo mw ifeza n’ivyo mu miringa n’ivyo mu vyuma n’ivyo mw ibāti n’ivyo mw isāsu,

²³ ibintu vyose birinda umuriro, muze mubicishe mu muriro, bibone guhumanuka; ariko kandi mubihumanuze na ya mazi yo guhumanura; na vy’ ibintu bitarinda umuriro muze mubinyuze mur’ ayo mazi.

²⁴ Maze ku musi ugira indwi muze mumesūre impuzu zanyu, muzoba muhumanutse, hanyuma mubone kugaruka aho dushagaje.

²⁵ Uhoraho abarira Mose,

²⁶ ati Harūra igitigiri c’iminyago yanyazwe y’abantu n’ibigenda, mwe na Eleyazari umuherezi n’abakuru b’amazu ya ba sekuruza, ukw amazu angana mw ishengero.

²⁷ Uheze ugabanye iminyago mu bitigiri bibiri bingana; kimwe gihabge abahizi batabarutse, ikindi gihabge ishengero ryose.

²⁸ Maze mu gitigiri gihawe abahizi batabarutse, munsobanuriremw’ indogōzo yanje, jewe Uhoraho: ibe kimwe‐kimwe mu majana atanu, uhereye ku bantu, no ku nka, no ku ndogoba, no ku mikuku;

²⁹ ubikūre mu gitigiri cabo, ubihe Eleyazari umuherezi, bibe ishikanwa munshikaniye.

³⁰ Kandi mu gitigiri gihawe ishengero ry’ Abisirayeli musobanure kimwe‐kimwe muri mirongwitanu, uhereye ku bantu, no ku nka, no ku ndogoba, no ku mikuku, mbere ku bigenda vyose; ubihe Abalewi, ari bo bājejwe ivy’ ihema ryanje, jewe Uhoraho.

³¹ Nuko Mose na Eleyazari umuherezi babigenza nk’uk’ Uhoraho yabariye Mose.

³² Kand’ iminyago abo bahizi bari banyaze, iyar’ isigaye ikiriho zar’ intama ibihumbi amajana atandatu na mirongwirindwi na bitanu,

³³ n’ inka ibihumbi mirongwirindwi na bibiri,

³⁴ n’indogoba ibihumbi mirongwitandatu na kimwe,

³⁵ n’ abantu ibihumbi mirongwitatu na bibiri vy’abakobga batigeze kumenya icitwa umugabo.

³⁶ Igitigiri c’umugabane abatabarutse bahawe car’ intama ibihumbi amajana atatu na mirongwitatu n’indwi n’ amajana atanu:

³⁷ izo Uhoraho yirogōjemwo zar’ amajana atandatu na mirongwirindwi na zitanu;

³⁸ inka na zo bahawe zar’ ibihumbi mirongwitatu na bitandatu; izo Uhoraho yirogōje muri zo zari mirongwirindwi na zibiri;

³⁹ indogoba na zo bahawe zar’ ibihumbi mirongwitatu n’amajana atanu; izo Uhoraho yirogōje muri zo zari mirongwitandatu n’imwe.

⁴⁰ Mu bantu banyaze, abo bahawemwo bār’ ibihumbi cumi na bitandatu; abo Uhoraho yirogōje muri bo bari mirongwitatu na babiri.

⁴¹ Nuko Mose ashikiriza Eleyazari umuherezi izo ndogōzo, ni ryo shikanwa ryari rigerewe Uhoraho, nk’uk’ Uhoraho yari yaramubariye.

⁴² Umugabane w’abandi Bisirayeli, uwo Mose yashigaje ku wo abatabarutse bahawe,

⁴³ uwo mugabane w’ishengero war’ intama ibihumbi amajana atatu na mirongwitatu n’indwi n’amajana atanu,

⁴⁴ n’inka ibihumbi mirongwitatu na bitandatu,

⁴⁵ n’indogoba ibihumbi mirongwitatu n’amajana atanu,

⁴⁶ n’abantu ibihumbi cumi na bitandatu.

⁴⁷ Nuko kur’ uwo mugabane w’Abisirayeli Mose akūra kimwe‐kimwe muri mirongwitanu, uhēreye ku bantu no ku bigenda vyose, abiha Abalewi, ari bo bājejwe ivy’ ingoro y’Uhoraho, nk’uk’ Uhoraho yari yaramubariye.

⁴⁸ Maz’ abagabisha b’imitwe y’ingabo, abagaba ibihumbi n’ abagaba amajana, bēgēra Mose,

⁴⁹ baramubarira, bati Twebge abasavyi bawe twaharūye ingabo tugaba, dusanga ntihabuzemwo n’umwe, uko tungana.

⁵⁰ None tuzaniye Uhoraho ishikanwa ry’ utugenegene tw’izahabu ku vyo twaronse: utwambarwa mu bizigira no ku maboko, n’impeta, n’ utwo kwambara ku matwi, n’utwo mw izosi, vyo gutangakw impongano y’amagara yacu imbere y’Uhoraho.

⁵¹ Nuko Mose na Eleyazari umuherezi babākīrira ayo mazahabu: yose yar’ utugenegene tw’uducurano.

⁵² Ayo mazahabu yose, ayo bagereye gushikanira Uhoraho, abo bagabisha bagaba ibihumbi n’abagaba amajana bashikanye, uburemerezi bgayo bgari shekeli ibihumbi cumi na bitandatu n’amajana ndwi na mirongwitanu.

⁵³ Kuk’ umuntu wese mur’ izo ngabo yari yisahuriye isahu.

⁵⁴ Nuko Mose na Eleyazari umuherezi bākīra ayo mazahabu y’abo bagabisha bagaba ibihumbi n’abagaba amajana, bayajana mw ihema ry’ibonaniro, kugira ngw abere Abisirayeli icibutso co kwibukwako imbere y’Uhoraho.