Guharūra 30 - Bibliya Yera 1951 1967 (Burundi)

Ivyo gushitsa amasezerano

¹ Mose abarira abakuru b’ imiryango y’Abisirayeli, at’ Iki ni co Uhoraho yashinze:

² umugabo ni yasezeranira Uhoraho isezerano, cank’ akarahira indahiro, akībohesha ivyo araganye, ntaz’ ace mw ijambo ryiwe, arikw az’ ashitse ivyamuvuye mu kanwa vyose.

³ Kand’ umukobga ni yasezeranira Uhoraho isezerano, akībohesha ivyo araganye, akiri mu rugo kwa se mu bgigeme bgiwe;

⁴ se akumva ivyo asezeranye, n’ingene yibohesheje ivyo araganye, agapfa kwihorera akamureka, ayo masezerano yiwe yose azohama, bo n’ivyo yaraganye vyose yibohesheje.

⁵ Ariko se ni yamubuza kur’ uwo musi avyumviyeko, ntihazogira isezerano ryiwe rihama, canke na kimwe mu vyo yaraganye yari yibohesheje; Uhoraho azomuharira kuko se yamubujije.

⁶ Na ho ni yarongorwa akiri mur’ ayo masezerano, no mu vyo akanwa kiwe kātuntumukanye, akavyībohesha;

⁷ umugabo wiwe akavyumva, agapfa kwihorera akamureka kur’ uwo musi avyumviyeko; ayo masezerano yiwe azohama, bo n’ivyo yaraganye yibohesheje.

⁸ Arik’ umugabo wiwe ni yamubuza ku musi avyumviyeko, azoba akūyeh’ iryo sezerano yarimwo, n’ivyo akanwa kiwe kātuntumukanye, akavyibohesha; kand’ Uhoraho azomuharira.

⁹ Arikw isezerano ry’umupfakazi, canke ry’uwahukanye, ico azoba yībohesheje cose kizomuhambira.

¹⁰ Kand’ umugore ni yasezerana isezerano ari mu rugo, akībohesha ivyo araganye, akarahira,

¹¹ umugabo wiwe akavyumva, agapfa kwihorera akamureka, ntamubuze; ayo masezerano yiwe yose azohama, bo n’ivyo yaraganye vyose yibohesheje.

¹² Arik’ umugabo wiwe ni yavyanzuza ku musi avyumviyeko, ivyamuvuye mu kanwa vyose vy’ amasezerano n’ivyo yaraganye akavyibohesha, ntibizohama, kuk’ umugabo wiwe yavyanjuje; kand’ Uhoraho azomuharira.

¹³ Isezerano ryose n’indahiro yose yokwibohesha ngo yibabaze, umugabo wiwe ni we yobishinga canke ni we yobikūra.

¹⁴ Arik’ umugabo wiwe ni yapfa kwihorera uko bukeye uko bgije, akamureka, azoba akomeje amasezerano yiwe yose n’ivyo yaraganye vyose bimuhambiriye. Kw azoba yarihoreye akamureka ku musi avyumviyeko, azoba yarabishinze.

¹⁵ Ariko ni yavyanzuza amaze igihe yaravyumvise, azogībgako n’ibigabitanyo vy’umugore wiwe.

¹⁶ Ayo ni yo mabgirizwa Uhoraho yabariye Mose, yo ku vy’ umugabo n’umugore wiwe, no ku vy’ umukobga na se, umukobga akiri mu bgigeme bgiwe mu rugo kwa se.